تاراز قالاسىندا بۇگىندە جاسى عاسىردان اسقان 6 اجە بار. ونىڭ ىشىندە كۇلشات اتامقۇلوۆا – 108, ايگۇل ماحانوۆا – 106, شىرىنكۇل ورازىمبەتوۆا – 105, كەلەكە ەسپەرديەۆا – 105, بەيسەكۇل جارىلقاپوۆا – 105 جانە التىنكۇل تاتاەۆا 102 جاسقا جەتىپ وتىر. ەلى امان, جۇرتى تىنىش, ۇل-قىزدارىنان شوبەرە-شوپشەك ءسۇيىپ وتىرعان اجەلەر ەلدەگى قوي ۇستىنە بوزتورعاي جۇمىرتقالاعان تىنىش زامان وسىلايشا جالعاسا بەرسە ەكەن دەپ تىلەيدى.
جامبىل وبلىسىنىڭ اكىمى قانات بوزىمباەۆ 8 ناۋرىز – حالىقارالىق ايەلدەر مەرەكەسى قارساڭىندا تاراز قالاسى, كوشەك باتىر كوشەسىندە تۇراتىن 102 جاستاعى التىنكۇل تاتاەۆا اجەنىڭ شاڭىراعىنا ارنايى بارىپ, ءاز انانىڭ حال-جاعدايىن سۇراپ, ەمەن-جارقىن ءاڭگىمە شەرتتى. “ ۇلىق بولساڭ كىشىك بول”, دەگەن وسى. عاسىر جاساعان كەيۋانا دا الدىنا كەلىپ, اماندىعىن بىلگەن اكىمگە راحمەتىن ايتىپ, اق باتاسىن بەرىپ, وبلىس باسشىسىنىڭ قولىنان العان سىيلىققا بالاشا ءماز بولىپ قالدى.
وبلىس ومىرىندە العاش رەت قولعا الىنىپ وتىرعان وسى جاقسى ءداستۇر بويىنشا جۇزدەن اسقان ا.تاتاەۆادان باسقا اجەلەردىڭ وتباستارىنا وبلىس اكىمىنىڭ ورىنباسارلارى ك.كوكىرەكباەۆ, ب.يماناليەۆ, م.ءتولەپبەرگەن ارنايى بارىپ, باعالى سىيلىقتارمەن قۇتتىقتاپ شىقتى.
انالار مەن قىز-كەلىنشەكتەرگە دەگەن وبلىس اكىمدىگىنىڭ قۇرمەتى مۇنىمەن شەكتەلگەن جوق. ەلباسى ن.نازارباەۆتىڭ جارلىعىمەن التىن جانە كۇمىس مەدالدارعا يە بولعان كوپ بالالى انالاردىڭ دا مەرەيىن ءوسىرىپ, وزدەرىنە تيەسىلى مەدالدارىن سالتاناتتى جاعدايدا تابىس ەتتى. وبلىستاعى سوتسياليستىك ەڭبەك ەرى, ۇلى وتان سوعىسىنىڭ ارداگەرلەرى, جەسىرلەرى مەن مۇگەدەكتەرى دە نازاردان تىس قالعان جوق.
جامبىل وبلىسى.
كوسەمالى ساتتىباي ۇلى.