«قازاق ونەرى اۋىر قازاعا دۋشار بولدى. 71 جاسقا قاراعان شاعىندا بەلگىلى مۋزىكاتانۋشى, ونەر زەرتتەۋشىسى, عالىم اعامىز جارقىن شاكارىم دۇنيەدەن ءوتتى, قايعىلى حاباردى ەستىپ قابىرعامىز قايىسىپ وتىر... قازاق حالقىنىڭ رۋحاني كەمەلدەنۋىنە ۇلەس قوسىپ, مۋزىكا ونەرىنىڭ حالىقتىق مۇددەگە ساي وركەن جايۋىنا ەڭبەك ەتكەن, بەلگىلى كۇيشى, مۋزىكاتانۋشى, امىرەتانۋشى, قوعام قايراتكەرى جارقىن اعامىزدان ايىرىلىپ قالدىق», - دەلىنگەن حابارلامادا.
وسىعان بايلانىستى مينيستر مارقۇمنىڭ وتباسىنا, تۋعان-تۋىستارىنا قايعىرىپ كوڭىل ايتتى.
«ءومىر بويى تۋعان حالقىنا, ونىڭ رۋحاني سالاسىنا قالتقىسىز قىزمەت ەتكەن جومارت جۇرەكتى جاقسى ادامنىڭ بۇل قازاسى قابىرعامىزدى قايىستىرىپ كەتتى. ءبىزدىڭ ءبىر كوڭىلگە مەدەت ەتەتىنىمىز, جارقىن اعانىڭ ارتىندا ولمەيتۇعىن مۇراسى قالدى. ارداقتى اعامىز شىنىندا دا ءبارىمىز جاقسى كورگەن ابزال ازامات ەدى. ول ءوزىنىڭ بارىنشا ادال دا تازا قالپىمەن, اقجارقىن دا جايدارى مىنەزىمەن جانىمىزعا جاقىن بولدى. نۇرى پەيىشتە شالقىسىن. قازاق رۋحانياتىنا جاساعان ادال قىزمەتى ەشقاشان ۇمىتىلمايدى...», - دەپ كوڭىل ايتتى ارىستانبەك مۇحامەدي ۇلى.
جارقىن جاقيا ۇلى شاكارىم 1947 جىلدىڭ 4 مامىرىندا شىعىس قازاقستان وبلىسى اياگوز قالاسىندا دۇنيەگە كەلگەن. 1968 جىلى قاراعاندى مۋزىكالىق ۋچيليششەسىن تامامداعان, ال 1973 جىلى الماتى كونسەرۆاتورياسىن (قازىرگى قازاق ۇلتتىق كونسەرۆاتورياسى) اياقتاعان. 1973 - 1976 جىلدارى ماسكەۋدەگى بۇكىلوداتىق «مەلوديا» فيرماسىنىڭ الماتى كۇيتاباققا جازۋ ستۋدياسىندا اعا رەداكتور, 1976 - 1980 جىلدارى «جالىن» باسپاسىندا رەداكتور, 1980 - 1982 جىلدارى رەسپۋبليكالىق مۋزىكا اسپاپتارى مۇراجايىنىڭ ديرەكتورى, 1982 - 1983 جىلدارى قازاق فيلارمونياسىندا كۇيشى-لەكتور قىزمەتتەرىن اتقارعان. 1983 جىلدان قازاق تەلەديدارىنىڭ مۋزىكا باعدارلامالارى باس رەداكتسياسىنىڭ رەداكتورى, ءبولىم مەڭگەرۋشىسى بولا ءجۇرىپ «3امانا بۇلبۇلدارى», «دومبىرا سازى», «تەرمە», «شاشاۋ», «مۋزىكالىق كينوجيناما», «كۇي-شەجىرە», «ءىنجۋ-مارجان» ءتارىزدى حابارلاردى جارىققا شىعارعان.