كوميتەت باسشىسى ۆلاديمير بەككەردىڭ ايتۋىنشا, بۇگىندە ءشۇلبى سۋ قويماسى 100 پروتسەنتكە تولىپ تۇر. وسىعان بايلانىستى قر اۋىل شارۋاشىلىعى مينيسترلىگى قويماداعى سۋدى كوپتەپ جىبەرۋگە شەشىم قابىلدادى. قازىرگى كەزدە ەرتىس وزەنىندە مۇز كەپتەلىسى جوق. سوندىقتان 15 ءساۋىر مەن 2 مامىر ارالىعىندا ءشۇلبى قويماسىنان سۋ كوپتەپ جىبەرىلەدى. قازىردىڭ وزىندە ول سۋدىڭ كولەمى سەكۋندىنا 2 400 تەكشە مەترگە دەيىن ارتتى. ال 17-23 ءساۋىر كۇندەرى سەكۋندىنا 3 500 تەكشە مەتر جىبەرىلەتىن بولادى. وسىنىڭ الدىندا ايتقانمىن, پاۆلودار وبلىسىندا 11 ەلدى مەكەننىڭ شەتكى ۇيلەرىنە سۋ جاقىنداۋى مۇمكىن. بارلىعى وزەنگە جاقىن تومەنگى جاقتا ورنالاسقان. نەگىزى, ءبارىن باقىلاۋدا ۇستاپ وتىرمىز. دەگەنمەن, ءبىر ماسەلەنى ەسكەرۋ كەرەك, سۋ كوپتەپ جىبەرىلگەندە وزەننىڭ دەڭگەيى كۇرت كوتەرىلىپ كەتەدى, دەدى ۆ.بەككەر ەلورداداعى ءباسپاسوز ءماسليxاتىندا.
ايتا كەتەيىك, وتكەن اپتاداعى بريفينگتە كوميتەت باسشىسى پاۆلودار وبلىسىندا ەرتىس وزەنىنىڭ تاسۋىنان قاي اۋىلدارعا قاۋىپ ءتونىپ تۇرعانىن ايتتى. بىراق اتالعان ەلدى مەكەندەردە تەك شەتكى بىرنەشە ءۇيدى عانا سۋ الىپ كەتۋى مۇمكىن. پاۆلودار وبلىسى بويىنشا سۋ تاسقىنى قاتەرى 11 ەلدى مەكەنگە ءتونىپ تۇر. ولاردىڭ ىشىندە كەنجەكول, لەنينسكي, اقسۋ قالاسى, پەسچانوە, اقسۋ كەنتى, قاراسۇق, تەرەڭكول, اقق ۇلى, اقساراي, جاڭاساراي, گوسپلەمەنستانتسيا سياقتى ەلدى مەكەندەر بار. بارلىعى ەرتىستىڭ بويىن جاعالاي ورنالاسقان. بىراق بۇل جەردە ماڭىزدى ءبىر ماسەلەنى ەسكەرۋ كەرەك, سۋ اتالعان ەلدى مەكەندەردىڭ ءبارىن الىپ كەتەدى دەگەن ءسوز ەمەس. ءاربىر اۋىلدا سۋ بىرنەشە ۇيگە عانا كىرۋى مۇمكىن. ماسەلەن, پەسچانوە اۋىلىندا ءۇش ۇيگە قاۋىپ ءتونىپ تۇرسا, قاراسۋدا ەكى-اق ءۇي سۋعا جاقىن تۇر. سول سياقتى اقسۋ قالاسىندا بەس ۇيگە عانا سۋ كىرۋى مۇمكىن, دەپ اتاپ كورسەتكەن ەدى ۆ.بەككەر.