ەمحانادا ەمدەلۋشىلەرگە ارنايى كوپسالالى دايىندىقتان وتكەن ءتاجىريبەلى دارىگەرلەر قىزمەت كورسەتەدى. تۇرعىندارعا ساپالى العاشقى مەديتسينالىق-سانيتارلىق كومەك بەرۋدى ماقسات ەتكەن ەمحانادا اقپاراتتىق قولداۋ جۇيەسى جۇمىس ىستەيدى. سونىڭ ىشىندە تاۋلىك بويى قىزمەت كورسەتەتىن call-ورتالىق, سەنىم تەلەفونى جانە ەمحانانىڭ ۆەب-سايتى بار.
سونداي-اق قاسىم-جومارت توقاەۆ ماڭعىستاۋ وڭىرلىك كاسىپكەرلەر پالاتاسىنا باردى.
مەملەكەت باسشىسىنا «اتامەكەن» ۇكپ باسقارما توراعاسى ا.مىرزاحمەتوۆ وبلىستىق كاسىپكەرلەر پالاتاسى بازاسىندا قۇرىلعان, ەل اۋماعىندا العاشقى «بيزنەسكە ارنالعان ۇكىمەت» جوباسىن تانىستىردى. جوبا ماقساتى – «ءبىر تەرەزە» قاعيداتى بويىنشا بيزنەستى قولداۋ مەن دامىتۋدىڭ بارلىق شارالارىن ءبىر ورتالىقتان كورسەتۋ. وڭىرلىك كاسىپكەرلەر پالاتاسى عيماراتىندا قىزمەت كورسەتۋدىڭ 5 باعىتى جۇمىس ىستەيدى.– «بيزنەسكە ارنالعان ۇكىمەت» جوباسى ارقىلى ءار كاسىپكەر ءوزىنىڭ بيزنەسىن دامىتۋ, بىلىكتىلىكتى جوعارىلاتۋ مەن قارجىلاندىرۋعا قاتىستى كونسۋلتاتسيالار مەن قىزمەت كورسەتۋدىڭ كەڭ اۋقىمىن الا الادى. كاسىپكەرلەرگە بارلىق قىزمەتتەردى ءبىر جەردەن الۋعا جاعداي جاسالعان. ەڭ باستىسى – كاسىپكەرلەر ماسەلەنىڭ كۇردەلىلىگىنە قاراماستان, قايدا جۇگىنۋ قاجەت ەكەنىن ناقتى بىلەدى. «بيزنەسكە ارنالعان ۇكىمەت» ارقىلى ءبىز كاسىپكەرلەرگە ارنالعان بىرىڭعاي حاب قۇرامىز, بۇل جۇمىس, جالپى العاندا, ەل ەكونوميكاسىنا وڭ اسەر ەتەتىن بولادى. «اتامەكەن» كەلەشەكتە اتالعان جوبانى رەسپۋبليكانىڭ بارلىق وڭىرلەرىندە تاراتۋدى جوسپارلاپ وتىر», – دەپ اتاپ ءوتتى «اتامەكەن» ۇكپ باسقارما توراعاسى ابىلاي مىرزاحمەتوۆ.
جۇمىس ساپارى بارىسىندا قازاقستان پرەزيدەنتى قاسىم-جومارت توقاەۆ وڭىردە «باستاۋ» جوباسى ارقىلى كاسىپ اشقان كاسىپكەرلەرمەن كەزدەستى. سولاردىڭ ءبىرى – التىنگۇل قاۋقاروۆا. ول كاسىپكەرلىك نەگىزدەرىنەن ءبىلىم الىپ, شەتپە اۋىلىندا بالاباقشا اشتى. «اتامەكەن» وڭىرلىك ميكروقارجىلىق ۇيىمى 10 ملن تەڭگە نەسيە ءبولدى. تۇپقاراعان اۋدانىنان ايتورە بۇحاەۆا ستوماتولوگيالىق كابينەت اشتى. ەندى تۇرعىندار اۋدان اۋماعىنان ۇزاماي-اق كەشەندى ەم قابىلداي الادى. قۇرىق اۋىلىنان جاس كاسىپكەر كومەكباي قويباعار تۇيە شارۋاشىلىعىن قولعا الدى. قازىر اۋىل حالقىن تۇيە ءسۇتى ءونىمدەرىمەن قامتاماسىز ەتىپ وتىر.
2018 جىلى «باستاۋ» باعدارلاماسى بويىنشا 1056 ادام وقۋعا قاتىستى, ونىڭ ىشىندە 305-ءى جەكە كاسىبىن باستاپ, 1 مىڭعا جۋىق جۇمىس ورنىن اشتى.جالپى ماڭعىستاۋ وبلىسىندا 2018 جىلى كاسىپكەرلىككە بەرىلگەن نەسيە كولەمى 11,9 ملرد تەڭگەنى قۇرايدى. جالپى سوماسى 4,8 ملرد تەڭگەگە 424 جوبا سۋبسيديالاندى. «بيزنەستىڭ جول كارتاسى-2020» باعدارلاماسى بويىنشا 168 جوباعا 3,3 ملرد تەڭگە بولىنسە, «نۇر كاپيتال» باعدارلاماسى شەڭبەرىندە 44 جوباعا 845,4 ملن تەڭگە جۇمسالدى. ال شاعىن نەسيە رەتىندە 710 جوباعا 7,1 ملرد تەڭگە باعىتتالدى.
مەملەكەت باسشىسى Yessenov University-دە بولىپ, جاستارمەن كەزدەستى. پرەزيدەنتتى ۋنيۆەرسيتەت باسشىسى ءبىر توپ وقىتۋشىلارمەن قارسى الدى. وقۋ ورنىندا مەملەكەت باسشىسىنا الدىمەن ستۋدەنتتەرگە قىزمەت ەتۋ ورتالىعى تانىستىرىلدى.
بۇل ورتالىقتا بارلىق ءبىلىم الۋشىلارعا قىزمەت كورسەتىلەدى. ستۋدەنتتەردىڭ تولىق اقپاراتتى ءبىر تەرەزەدەن الۋعا مۇمكىندىكتەرى بار. انىقتامالارعا جانە ترانسكريپتكە تاپسىرىستى ونلاين جۇيە ارقىلى بەرىپ, ەلەكتروندى كەزەك ارقىلى دايىن تاپسىرىستارىن الا الادى. سونىمەن قاتار ستۋدەنتتەرگە قىزمەت كورسەتۋ ورتالىعىندا 13 مەملەكەتتىك قىزمەت كورسەتىلەدى.ۋنيۆەرسيتەت رەكتورى بەرىك احمەتوۆ مەملەكەت باسشىسىنا ۋنيۆەرسيتەتتىڭ ينفراقۇرىلىمى جونىندە بايانداپ, ۋنيۆەرسيتەتتە ەنگىزىلىپ جاتقان جاڭا تىڭ يدەيالاردى تانىستىردى.
باياندامادان سوڭ پرەزيدەنت تەڭىز اكادەمياسىنىڭ جۇمىسىمەن تانىستى. مەملەكەت باسشىسىنىڭ نازارىنا نورۆەگيالىق Kongsberg كومپانياسىنىڭ كەمە جۇرگىزۋشىلەردى جانە كەمە مەحانيكتەرىن وقىتۋعا ارنالعان جوعارى تەحنولوگيالىق ترەناجەرلارى كورسەتىلدى. ترەناجەرلاردى جۇمىس كەزىندە ستۋدەنتتەردىڭ وزدەرى تانىستىرعان بولاتىن. قازىرگى تاڭدا Yessenov University ستۋدەنتتەرى كاسپي تەڭىز جانە وزەن كولىگى ينستيتۋتىندا تاجىريبەدەن وتۋدە. اتالعان ينستيتۋت – تەڭىز, وزەن جانە ارالاس «وزەن-تەڭىز» سۋلارىندا جۇزەتىن بارلىق ۇلگىدەگى كەمەلەردە جۇمىس ىستەۋگە قۇقىعى بار سۋ كولىگى ءۇشىن ماماندار دايىندايتىن كاسپي ماڭىنداعى جالعىز سالالىق ءبىلىم بەرۋ كەشەنى. ستۋدەنتتەردىڭ ءىرى سالالىق كاسىپورىنداردا, سونداي-اق وزەن جانە تەڭىز فلوتىنىڭ كەمەلەرىندە پراكتيكالىق داعدىلاردى الۋعا ءمۇمكىندىگى بار.
سونداي-اق قازاقستان پرەزيدەنتى قاسىم-جومارت توقاەۆ «اقتاۋ حالىقارالىق تەڭىز ساۋدا پورتى ۇلتتىق كومپانياسى» اكتسيونەرلىك قوعامىنا باردى.
ساپار بارىسىندا مەملەكەت باسشىسىنا اقتاۋ تەڭىز پورتىنىڭ قازىرگى جۇمىستارى, كاسپي تەڭىزى ارقىلى وتەتىن جۇك تاسىمالىن ارتتىرۋدىڭ پەرسپەكتيۆالارى, سونداي-اق اقتاۋ قالاسىنداعى شيپاجاي ايماعىنىڭ ينفراقۇرىلىمىن دامىتۋ جونىندە مالىمەت بەرىلدى. قاسىم-جومارت توقاەۆ وندىرىستىك مىندەتتەردى تولىققاندى ورىنداۋعا, سونىڭ ىشىندە جۇك تاسىمالى وپەراتسيالارىن جۇرگىزۋگە, كەمەلەردى ايلاققا قويۋعا جانە قىزمەت كورسەتۋگە سەپتىگىن تيگىزەتىن پورتتىڭ تەحنيكالىق مۇمكىندىكتەرىمەن تانىستى. پرەمەر-ءمينيستردىڭ ورىنباسارى جەڭىس قاسىمبەك اقتاۋ حالىقارالىق تەڭىز ساۋدا پورتىنىڭ جاھاندىق كولىك ءدالىزىنىڭ قيىلىسىندا ورنالاسۋى, جىلىنا 17,7 ميلليون توننا قۇرعاق جۇكتەردى, شيكى مۇناي مەن مۇناي ونىمدەرىن تاسىمالداۋعا مۇمكىندىك بەرەتىنىن باياندادى.
سونىمەن قاتار قازاقستان پرەزيدەنتىنە «ماڭعىستاۋ» زىمىراندى-ارتيللەريالىق كەمەسى كورسەتىلدى. سونداي-اق قازاقستان رەسپۋبليكاسى قورعانىس مينيسترلىگىنىڭ اسكەري-تەڭىز كۇشتەرىنىڭ ارنايى تەحنيكاسىمەن, قارۋ-جاراقتارىمەن جانە كيىم ۇلگىلەرىمەن تانىستى. مەملەكەت باسشىسىنىڭ ماڭعىستاۋداعى ساپارى جالعاسۋدا. ماڭعىستاۋ وبلىسى