اقتاۋ قالالىق مامانداندىرىلعان حالىققا قىزمەت كورسەتۋ ورتالىعىنداعى اشىلعان «ادالدىق دۇكەنىنە» قر مەملەكەتتىك قىزمەت ىستەرى جانە سىبايلاس جەمقورلىققا قارسى ءىس-قيمىل اگەنتتىگىنىڭ ماڭعىستاۋ وبلىسى بويىنشا دەپارتامەنتىنىڭ باسشىسى, «ماڭعىستاۋ – ادالدىق الاڭى» جوباسىنىڭ تەڭ كۋراتورى نۇرگۇل جاننازاروۆا, «ازاماتتارعا ارنالعان ۇكىمەت» مك كەاق ماڭعىستاۋ وبلىستىق فيليالىنىڭ ديرەكتورى ەربول بايجىگىت, قالالىق مامانداندىرىلعان حقكو باسشىسى مۇرات تاسيروۆ, جوبا جەتەكشىسى كيىكباي ەشمانوۆ, مەكەمەمە قىزمەتكەرلەرى جانە قىزمەت الۋشىلار قاتىستى.
اشىلۋ سالتاناتىندا لەنتا قيعان قالا تۇرعىنى قىزىعۋشىلىق تانىتىپ, اتالعان دۇكەننەن تاۋارىن الىپ تا ۇلگەردى. سونىمەن قاتار, كەلگەن ساتىپ الۋشىلاردىڭ اراسىندا دۇكەنگە ەسەپتەۋىش قۇرالىن (كالكۋلياتور) قويۋعا ۇسىنىس بىلدىرگەن ازامات تا بولدى
ەندى ساتۋشىسىز دۇكەندە كەز كەلگەن ازامات ارنايى تولەم جاشىگىنە اقشاسىن قالدىرىپ, قالاعان نارسەسىن الا الادى. ياعني, ساتىپ الۋشىلار دۇكەندە ساتۋشىنىڭ جوقتىعىنا قاراماستان, ادالدىق قاعيداسىنا وراي وزدەرىنە وزدەرى ەتەدى. دۇكەننىڭ باستى ەرەكشەلىگى دە وسىندا.
اگەنتتىكتىڭ اۋماقتىق دەپارتامەنت باسشىسى نۇرگۇل جاننازاروۆا مۇنداي دۇكەندەردىڭ اشىلۋى قوعام مەن ازاماتتار اراسىنداعى ادامگەرشىلىك قاسيەتتەرىن دامىتۋعا, مەيىرىمدى, ادال بولۋعا جانە ءوزىن-ءوزى دامىتۋعا باعىتتالعانىن اتاپ ءوتتى.
ايتا كەتۋ قاجەت, اقتاۋ قالالىق مامانداندىرىلعان حالىققا قىزمەت كورسەتۋ ورتالىعىنا كۇنىنە شامامەن 1500 ادام كەلىپ, قىزمەت الادى. دەمەك, ورتالىققا كەلىپ-كەتۋشىلەر سانى ايىنا 30 مىڭعا جۋىق ادامدى قامتيدى. ال پوليتسيا باسقارماسىندا 600-دەن استام قىزمەتكەر مەن كەلۋشىلەر ساتۋشىسىز دۇكەننەن قالاعان نارسەسىن ساتىپ الا الادى. بۇل دەگەنىمىز – قىزمەت الۋشىلار اراسىندا جانە قوعامدا سەنىم اتموسفەراسىن قالىپتاستىرىپ, وزدەرىن جاقسى, ادال تۇلعا رەتىندە تانۋعا مۇمكىندىك بەرۋ. سونداي-اق, حالىقتىڭ الەۋمەتتىك جاۋاپكەرشىلىگىن شىڭداپ, «سىبايلاس جەمقورلىققا قارسى يممۋنيتەتتى» قالىپتاستىرۋعا اسەر ەتەتىن نىسان بولىپ تابىلادى.
مەملەكەتتىك قىزمەت ىستەرى جانە سىبايلاس جەمقورلىققا قارسى ءىس-قيمىل اگەنتتىگىنىڭ ماڭعىستاۋ وبلىسى بويىنشا دەپارتامەنتىنىڭ ءباسپاسوز قىزمەتىنىڭ حابارلاۋىنشا, جوبا شەڭبەرىندە اتالعان دۇكەندەردىڭ سانى قازىرگى تاڭدا جۇزدەن استى. الداعى ۋاقىتتا دا حالىق كوپ جينالاتىن ورىنداردا «ادالدىق دۇكەندەرىنىڭ» اشىلۋى جالعاسىن تاباتىن بولادى.