قازاقستان رەسپۋبليكاسىنىڭ تۇڭعىش پرەزيدەنتى – ەلباسى نۇرسۇلتان نازارباەۆتىڭ پرەزيدەنتتىك وكىلەتتىگىن توقتاتۋ تۋرالى تاريحي شەشىمى جاريا بولعان ساتتەن باستاپ قوعامدا تۇڭعىش پرەزيدەنتتىڭ ساياسي باعىتىن جالعاستىرۋعا دەگەن سۇرانىس تۋىندادى.
ەلىمىزدىڭ الەۋمەتتىك-ەكونوميكالىق دامۋ قارقىنىن ساقتاۋ ءۇشىن بيلىك اۋىسىمى ۇدەرىسىن بارىنشا تەزىرەك اياقتاۋ قاجەت. سول كەزدە عانا ۇزاق مەرزىمدى مىندەتتەر مەن كۇن تارتىبىندەگى الەۋمەتتىك ماڭىزدى باعدارلامالاردى, جوبالاردى جۇزەگە اسىرۋ جوسپارىندا ايقىندىلىق ورىن الادى. ءتۇرلى بولجامدار سەيىلەدى.
ءوز ۇندەۋىندە قازاقستان پرەزيدەنتى قاسىم-جومارت توقاەۆ قازاقستانداعى ىشكى ساياسي ماڭىزدى ۇدەرىستەر قازاقستاندىق قوعام كەمەلدىگىنىڭ ايقىن كورىنىسى بولاتىنداي تۇراقتى ءارى ساليقالى جۇرگىزىلىپ كەلە جاتقانىن ءادىل اتاپ ءوتتى. دەموكراتيالىق ۇدەرىستەرگە سايكەس, مەملەكەت باسشىسى 2019 جىلدىڭ 9 ماۋسىمىندا مەرزىمىنەن تىس پرەزيدەنتتىك سايلاۋ وتكىزۋ تۋرالى جاريالادى.
الداعى سايلاۋدىڭ جاريالىلىعىنا كەپىلدىك بەرۋ وتە ۇلكەن ماڭىزعا يە ەكەنىن ايتا كەتكەن ءجون. پرەزيدەنت ق.توقاەۆ اتاپ وتكەندەي, سايلاۋ تازا, اشىق ءارى ءادىل وتپەك. وسىلايشا, ەلىمىزدىڭ ورتالىق سايلاۋ كوميسسياسى الدىنا بارىنشا جاريالىلىقتى قامتاماسىز ەتۋ جانە وزگە دە قاجەتتى شارالاردى تولىقتاي ەسكەرىپ, سايلاۋدى جوعارى دەڭگەيدە ۇيىمداستىرۋ مىندەتى قويىلىپ وتىر. ەرجان سالتىباەۆ,الەمدىك ەكونوميكا جانە ساياسات ينستيتۋتىنىڭ ديرەكتورى