قازاقستان رەسپۋبليكاسىنىڭ سىرتقى ىستەر ءمينيسترى بەيبىت اتامقۇلوۆ تۇرىكمەنستاننىڭ توراعالىعىمەن ماسكەۋدە وتكەن تاۋەلسىز مەملەكەتتەر دوستاستىعى سىرتقى ىستەر مينيسترلەرى كەڭەسىنىڭ كەزەكتى وتىرىسىنا قاتىستى.
ءىس-شارا بارىسىندا سىرتقى ساياسي ۆەدومستۆولارىنىڭ باسشىلارى دوستاستىق اياسىنداعى ءوزارا ءىس-قيمىلدىڭ وزەكتى ماسەلەلەرىن تالقىلادى. نەگىزگى نازار تمد-عا قاتىسۋشى مەملەكەتتەردىڭ قازىرگى زامانعى قاۋىپ-قاتەرلەرگە قارسى تۇرۋ جونىندەگى ىنتىماقتاستىعىن نىعايتۋعا, سونداي-اق ەكونوميكالىق, مادەني-گۋمانيتارلىق جانە عىلىمي-تەحنيكالىق سالالارداعى ءوزارا ءىس-قيمىلدى كەڭەيتۋگە اۋدارىلدى.
دەلەگاتسيا باسشىلارى 2018 جىلى تمد شەڭبەرىندە كوپ دەڭگەيلى ءسىم-ارالىق كونسۋلتاتسيالار جوسپارىن ىسكە اسىرۋ قورىتىندىلارى تۋرالى ەسەپتى تىڭداپ, 2019 جىلعا ارنالعان جاڭا جوسپاردى بەكىتتى. بۇل قۇجاتقا سايكەس, سىرتقى ساياسي جوسپارلاۋعا, قازىرگى زامانعى قاۋىپ-قاتەرلەرگە قارسى ءىس-قيمىلعا, قارۋسىزدانۋ تاقىرىبىنا, ەكونوميكالىق ىنتىماقتاستىقتى دامىتۋعا, اقپاراتتىق سالاداعى ءوزارا ءىس-قيمىلعا, سونداي-اق بۇۇ, ەۋروپاداعى قاۋىپسىزدىك جانە ىنتىماقتاستىق ۇيىمى جانە ەۋروپا وداعى سياقتى حالىقارالىق ۇيىمدارمەن ىنتىماقتاستىققا قاتىستى كونسۋلتاتسيالار وتكىزۋ جوسپارلانعان.
وتىرىس بارىسىندا ب. اتامقۇلوۆ «قازاقستان تمد-نىڭ سەنىمدى جانە بەلسەندى قاتىسۋشىسى بولا وتىرىپ, دوستاستىققا قاتىسۋشى مەملەكەتتەر اراسىنداعى ءوزارا ءتيىمدى ىنتىماقتاستىقتى بارلىق سالالاردا دامىتۋدى جالعاستىرۋعا باعىتتالعانىن» اتاپ ءوتتى.
قازاقستان سىرتقى ساياسي ۆەدومستۆوسىنىڭ باسشىسى جۇرگىزىلگەن بىرلەسكەن جۇمىستىڭ ارقاسىندا قازاقستان رەسپۋبليكاسىنىڭ تۇڭعىش پرەزيدەنتى – ەلباسى نۇرسۇلتان نازارباەۆتىڭ تمد-نىڭ قازىرگى زامانعى جاعدايلارعا بەيىمدەلۋى تۋرالى باستاماسى تابىستى ىسكە اسىرىلعانىن اتاپ ءوتتى. ناتيجەسىندە سوڭعى ۋاقىتتا قاتىسۋشى مەملەكەتتەردىڭ ۇيىم قىزمەتىنە مۇددەلىلىگىنىڭ ايتارلىقتاي ءوسۋى بايقالادى.
سونىمەن قاتار, دوستاستىققا قاتىسۋشى مەملەكەتتەر باسشىلارىنىڭ نۇسقاۋلارىنا سايكەس تمد ەلدەرىنىڭ ەكونوميكالىق سالاداعى ءوزارا ءىس-قيمىلىن جانداندىرۋ قاجەتتىلىگى اتاپ ءوتىلدى.
قازاقستان ءسىم باسشىسى سونداي-اق تاجىكستان رەسپۋبليكاسىنىڭ 2018 جىلى دوستاستىقتاعى توراعالىعىنىڭ قورىتىندىسىنا جوعارى باعا بەرىپ, ونىڭ وتە مازمۇندى جانە جەمىستى بولعانىن اتاپ ءوتتى. وعان قوسا, قازاقستان تاراپى تۇرىكمەنستاندى ۇيىمعا توراعالىقتىڭ قابىلدانۋىمەن قۇتتىقتاپ, تۇركمەن تاراپى ۇسىنعان توراعالىق تۇجىرىمداماسىن تابىستى ىسكە اسىرۋعا جان-جاقتى جاردەمدەسۋگە دايىن ەكەندىگىن ءبىلدىردى.
وتىرىس بارىسىندا دەلەگاتسيا باسشىلارى قابىلداۋ باستاماسى تۇركىمەن تاراپىنا تيەسىلى تمد-عا قاتىسۋشى مەملەكەتتەردىڭ سىرتقى ساياسي ۆەدومستۆولارى اراسىنداعى ارىپتەستىكتى جانداندىرۋ جونىندەگى ءىس-قيمىل باعدارلاماسىنىڭ جوباسىن قاراپ, ىرگەلى زەرتتەۋلەر سالاسىنداعى مەملەكەتارالىق قاتىناستاردى ۇيلەستىرۋ تۋرالى, مۇراجاي ءىسى سالاسىنداعى ىنتىماقتاستىق تۋرالى, سونداي-اق تمد جوعارى ورگاندارىنىڭ - مەملەكەت باسشىلارى كەڭەسىنىڭ جانە ۇكىمەت باسشىلارى كەڭەسىنىڭ الداعى وتىرىستارىنا ەنگىزىلەتىن باس بوستاندىعىنان ايىرۋمەن بايلانىستى ەمەس جازالاردىڭ ورىندالۋىن بەرۋ تۋرالى حالىقارالىق شارتتاردىڭ جوبالارىن ماقۇلدادى.
سىرتقى ىستەر مينيسترلەرى 1941-1945 جىلعى ۇلى وتان سوعىسىنىڭ اسكەري جەرلەۋ ورىندارى مەن اسكەري ەسكەرتكىشتەرىنە ءتيىستى كۇتىم جاساۋ جانە ساقتاۋ قاجەتتىلىگى تۋرالى ۇندەۋ قابىلدادى, سونداي-اق ەكىنشى دۇنيەجۇزىلىك سوعىس باستالۋىنىڭ 80 جىلدىعىنا بايلانىستى تمد-عا قاتىسۋشى مەملەكەتتەر باسشىلارىنىڭ مالىمدەمەسىنىڭ جوباسىن ماقۇلدادى.
تمد سىرتقى ىستەر مينيسترلەرى كەڭەسىنىڭ كەزەكتى وتىرىسى اشحابادتا 2019 جىلى 10 قازاندا وتەدى.