ەليزابەتكە ەل ريزا

كۇن شىعىس ەلىندە كىل مىقتىلار باس قوستى. جارىس جولىنا شىققان 40 مانەرلەپ سىرعاناۋشىنىڭ بارلىعىنىڭ دا ەسىمى سپورت سۇيەر قاۋىمعا ەتەنە تانىس. ولاردىڭ الدى وليمپيا ويىندارى مەن الەم چەمپيوناتتارىندا تەڭدەسسىز ونەرلەرىمەن تانىلىپ, جەڭىس تۇعىرىنا كوتەرىلگەن شوق جۇلدىزدار. ءبىرازى قۇرلىقتىق جارىستاردا جاسىنداي جارقىراپ, اسا ءىرى حالىقارالىق دودالاردا دارالانعان مىقتىلار. تىپتەن, اۋتسايدەرلەر ساناتىنا جاتقىزىلعان سپورتشىلاردىڭ ەڭ كەمىندە ءوز ەلدەرىنىڭ ىشكى بىرىنشىلكتەرىنىڭ جەڭىمپازدارى جانە جۇلدەگەرلەرى دەگەن اتاقتارى بار. مىنە, ەليزابەتكە وسىنداي مىقتىلارمەن «تىرەسۋگە» تۋرا كەلدى.

قىسقا باعدارلامادا قازاق قىزى ليۋدۆيگ ۆان بەتحوۆەننىڭ «اي سوناتاسىن» تاڭداعان ەكەن. راسىندا دا ونەرى ءمىنسىز بولدى. ەڭ كۇردەلى دەگەن ەلەمەنتتەردىڭ وزدەرىن جىلدامدىعىن ەش باسەڭدەتپەگەن كۇيدە شەبەر ورىنداپ, «سايتاما سۋپەر ارەناعا» جينالعان سان مىڭ جانكۇيەر مەن تەلەديدارعا ۇڭىلگەن ميلليونداعان كورەرمەننىڭ زور قوشەمەتىنە بولەندى. تورەشىلەر دە تۇرسىنباەۆانىڭ ونەرىن لايىقتى باعالاپ, ونىڭ ەنشىسىنە 75,96 ۇپاي جازدى. ەليزابەت تەك رەسەيلىك الينا زاگيتوۆا (82,08 ۇپاي) مەن جاپونيالىق كاوري ساكاموتونى (76,86 ۇپاي) العا جىبەرىپ, ءۇشىنشى ورىنعا تابان تىرەدى.  

سايتاماعا ساپار شەككەن 40 سپورتشىنىڭ اراسىنان سۋىرىلىپ شىققان 24 سۇلۋ اراعا ءبىر تاۋلىك سالىپ ەركىن باعدارلامادا باق سىنادى. بۇل جولى دا ەليزابەت تۇرسىنباەۆا ءمىنسىز ونەر كورسەتتى. ارگەنتينالىق استور پياتسوللانىڭ «بۋەنوس-ايرەستەگى جىل مەزگىلدەرىن» اسقان شەبەرلىكپەن ورىنداعان قانداسىمىز الەم چەمپيوناتىنىڭ كۇمىس جۇلدەگەرى اتاندى. قازاقستاندىق سپورتشىنىڭ قوس باعدارلاما بويىنشا جيعان ۇپايى – 224.76. تاعى ءبىر ايرىقشا اتاپ وتۋگە تۇراتىن جايت, تۇرسىنباەۆانىڭ ەسىمى ايتۋلى جارىستىڭ ەركىن باعدارلاماسىندا «سالحوۆ تورتىگىن» العاشقى بولىپ ورىنداعان مانەرلەپ سىرعاناۋشى رەتىندە سپورتتىق شەجىرەگە التىن ارىپتەرمەن جازىلدى. 

كۇن شىعىس ەلىندەگى جارىستا ەليزابەت تەك رەسەيدىڭ ايگىلى مانەرلەپ سىرعاناۋشىسى, وليمپيادا جانە ەۋروپا چەمپيونى, تاتار قىزى الينا زاگيتوۆادان (234.50 ۇپاي) عانا قالىپ قويدى. ەكى دۇركىن الەم جانە ەۋروپا چەمپيونى, وليمپيا ويىندارىنىڭ كۇمىس جۇلدەگەرى ەۆگەنيا مەدۆەدەۆا (223.80 ۇپاي) قولا مەدالدى قاناعات تۇتتى. ال جاپونيانىڭ ءۇش بىردەي جۇلدىزى – ريكا كيحيرا (223.49 ۇپاي), كاوري ساكاموتو (222.83 ۇپاي) جانە ساتوكو مياحارا (215.95 ۇپاي) جەڭىس تۇعىرىنا كوتەرىلە الماي, 4-6 ورىنداردى ءوزارا ءبولىستى. وسىلايشا, ءوز ەلىندە, ءوز جەرىندە, ءوز جانكۇيەرلەرىنىڭ كوز الدىندا وتكەن اسا جاۋاپتى جارىستا جاپون قىزدارى جەر سيپاپ قالدى. سونداي-اق, امەريكالىق برەدي تەننەل (213.47 ۇپاي) مەن مەرايا بەلل (208.07 ۇپاي), رەسەيلىك سوفيا سامودۋروۆا (208.58 ۇپاي) جانە كورەيالىق ليم ىن سۋ (205.57 ۇپاي) سىندى جۇلدىزدار وسى باسەكەدە ۇزدىك وندىقتىڭ قاتارىنان كورىنۋمەن عانا شەكتەلدى.

مانەرلەپ سىرعاناۋدان الەم چەمپيوناتىنىڭ تۇساۋى سوناۋ 1896 جىلى كەسىلگەن بولاتىن. قازاقستاننىڭ ورەندەرى اراسىندا وسى جارىستىڭ جۇلدەسىنە العاشقى بولىپ يەلىك ەتكەن داڭقتى دەنيس تەن ەكەنى بارشاعا ءمالىم. 2013 جىلى كانادادا ول كۇمىس السا, 2015 جىلى قىتايدا قولاعا قول سوزدى. ال ايەلدەر اراسىنداعى دۇنيەجۇزىلىك دودا 1906 جىلدان بەرى ۇيىمداستىرىلىپ كەلەدى. سول جارىستاردىڭ ەشبىرىندە وتانداستارىمىزعا جەڭىس تۇعىرىنا كوتەرىلۋ باقىتى بۇيىرماعان ەدى. ارادا تابانى كۇرەكتەي 113 جىل وتكەننەن كەيىن عانا الاش جۇرتىنىڭ وسى ارمانى ورىندالدى. 19 جاستاعى ەليزابەت تۇرسىنباەۆا سىندى سۇلۋىمىز بارشا قازاقستاندىق جانكۇيەرلەرگە الەم چەمپيوناتى مەدالىنىڭ سىڭعىرىن ەستىتتى. 

سايتاماداعا جارىس اياقتالعان بەتتە باق وكىلدەرىنە سۇحبات بەرگەن ەليزابەت: «قازىر مەنىڭ باقىتتان باسىم اينالىپ تۇر. ەموتسيامدى دا جاسىرا الاتىن ەمەسپىن. شىنىمدى ايتسام, ايتۋلى دودادا كۇمىس مەدالدى يەلەنەمىن دەپ ەش ويلاعان جوق ەدىم. دەسەك تە مەن جەڭىسكە جەتۋ جولىندا ەش ايانبادىم. ناتيجەسىندە كوزدەگەن ماقساتىما قول جەتكىزدىم. بۇل – مانەرلەپ سىرعاناۋدان الەم چەمپيوناتىنداعى ايەلدەردىڭ جەكەلەگەن سايىسىنداعى قازاقستاننىڭ تۇڭعىش جۇلدەسى! بايراقتى باسەكەدە ءوز حالقىمدى قۋانتا العانىما ريزامىن», – دەپ اعىنان جارىلدى.  

حالىق تا ەليزابەتكە ءدان ريزا. وسىعان دەيىن ول الەم چەمپيوناتتارىنا ءۇش مارتە قاتىسىپ, مىناداي ناتيجەلەرگە قول جەتكىزگەن ەدى: 2016 جىل – 12 ورىن, 2017 جىلى – 9 ورىن جانە 2018 جىلى – 11 ورىن. ال بۇل جولى قارشىعاداي عانا قازاق قىزى تورتكۇل دۇنيەنىڭ تەڭدەسسىزدەرى جينالعان ءدۇبىرلى دودادا بارشا قازاقستاندىقتاردى قۋانىش پەن شاتتىققا بولەدى. كۇللى الەمدى ءوزىنىڭ ءمىنسىز ونەرىمەن ءتانتى ەتتى. وسىنداي سىمباتتى قىز, اسا دارىندى سپورتشىنى ومىرگە اكەلىپ, بالاۋسا كەزىنەن باعىتىن ايقىنداپ بەرگەن اكەسى بايتاق پەن اناسى پاديشاحانعا مىڭ دا ءبىر العىس! بۇگىنگىدەي بيىك بەلەستى باعىندىرۋعا بارىنشا ۇلەس قوسقان رەسەيلىك مامان ەتەري تۋتبەريدزەگە دە ريزاشىلىعىمىز شەكسىز.

اينالدىرعان جەتى-سەگىز اي ارالىعىندا تۇرسىنباەۆانىڭ كۇرە تامىرىن ءدوپ باسقان بىلىكتى باپكەر قازاق قىزىنىڭ بابىن كەلىستىرىپ, باعىن اشتى. وسىدان بىرەر اپتا بۇرىن عانا كراسنويارسكىدە وتكەن دۇنيەجۇزىلىك ۋنيۆەرسيادادا كۇمىس مەدالدى موينىنا ىلگەن ول سايتاماداعى الەمدىك دودادا سول ناتيجەسىن قايتالادى. ەليزابەت تۇرسىنباەۆانى ءبىز بولاشاقتا بۇدان دا بيىك بەلەستەردەن كورەمىز دەپ ۇمىتتەنەمىز!

الەم چەمپيوناتىنىڭ جەڭىمپازدارى مەن جۇلدەگەرلەرى

ايەلدەر:

1. الينا زاگيتوۆا (رەسەي),

2. ەليزابەت تۇرسىنباەۆا (قازاقستان),

3. ەۆگەنيا مەدۆەدەۆا (رەسەي).

ەرلەر:

1. نەتان چەن (اقش),

2. يۋدزۋرۋ حانيۋ (جاپونيا),

3. ۆينسەنت چجوۋ (اقش).   سپورتتىق جۇپ:

1. سۋي ۆەنتسزين / حان تسۋن (قىتاي),

2. ەۆگەنيا تاراسوۆا / ۆلاديمير موروزوۆ (رەسەي),

3. ناتاليا زابياكو / الەكساندر ەنبەرت (رەسەي).

مۇزداعى بي:

1. گابريەلا پاپاداكيس / گيوم سيزەرون (فرانتسيا),

2. ۆيكتوريا سينيتسينا / نيكيتا كاتسالاپوۆ (رەسەي),

3. مەديسون حاببەلل / زاحاري دونوحيۋ (اقش).

عالىم سۇلەيمەن,

«Egemen Qazaqstan»