پرەزيدەنت قاسىم-جومارت توقاەۆ تۇركىستان قالاسىنىڭ جۇرتشىلىق وكىلدەرىمەن كەزدەسۋدە جاستار ساياساتىن ۇتىمدى جۇرگىزۋدىڭ قاجەتتىگىن مالىمدەدى.
«ەلباسى 2019 جىلدى جاستار جىلى دەپ جاريالاعانىن بىلەسىزدەر. ءبىز جاستارعا جاڭا مۇمكىندىكتەر بەرۋىمىز كەرەك. بۇل – بيزنەس اشۋ, ءبىلىم الۋ, جۇمىسقا ورنالاسۋ, تابىس تابۋ دەگەن ءسوز. ءوز ءومىرىن جاقسارتۋعا, مانسابى بويىنشا جوعارىلاۋعا ارنالعان الەۋمەتتىك ليفتتەر ءىس جۇزىندە جۇمىس ىستەۋى كەرەك. ەلىمىزدىڭ جاستارى مەن تالانتتى ازاماتتارى مەملەكەتتىك قىزمەتتە ىلگەرىلەۋ ءۇشىن ارنايى كادرلىق باعدارلاما دايىندايمىز» دەدى ق.توقاەۆ.
مەملەكەت باسشىسى بولاشاق جاستاردىڭ قولىندا ەكەنىن ايتا كەلە, رۋحاني جانە ادامگەرشىلىك قۇندىلىقتاردى ودان ءارى نىعايتۋ قاجەتتىگىن اتاپ كورسەتتى.
«بۇل ماسەلە بويىنشا جول سىلتەيتىن تەمىرقازىق بار. بۇل – ەلباسىنىڭ «رۋحاني جاڭعىرۋ» باعدارلاماسى جانە « ۇلى دالانىڭ جەتى قىرى» اتتى ماقالاسى. وسى قاعيداتتاردى قاتاڭ ۇستانۋ ارقىلى عانا ءبىز جاھاندىق الەمدەگى ۇلتتىق بىرەگەيلىگىمىزدى ساقتاپ قالامىز. ۇلتىمىزدىڭ مادەني كودىنا سۇيەنبەسەك, ەلىمىزدى ودان ءارى جاڭعىرتا المايتىنىمىز انىق» دەدى مەملەكەت باسشىسى.