ۇلىستىڭ ۇلى كۇنى قارساڭىندا كاتونقاراعاي اۋدانىنداعى بالعىن اۋىلىنىڭ تۇرعىندارى كوپبالالى انا نادەجدا كونستانتينوۆانى قۇشاق جايا قارسى الدى.
اۋداننىڭ تۋماسى, كاسىپكەر, «تەرەزە» جشس ديرەكتورى جانبولات قازانوۆ «باقىتتى وتباسى» ۇلتتىق جوباسى اياسىندا بەس بالا تاربيەلەپ وتىرعان اناعا ءوز قاراجاتىنا باسپانا تارتۋ ەتتى. كومىر مەن وتىندى اۋىل تۇرعىندارى جەتكىزىپ بەرىپتى. «بۇعان دەيىن ۇلكەن نارىن اۋىلىندا تۇردىق. بالالارىم جالاڭ اياق جۇگىرىپ, اسىر سالىپ وينايتىن جىلى, ۇلكەن ءۇيىمىز بولسا دەپ ارماندايتىن ەدىك. ارمان-تىلەگىمىز ورىندالعانداي. كورشىلەرىم, بالعىندىقتار سونداي مەيىرىمدى جاندار, كەلىپ كومەكتەسىپ جاتىر. بۇدان بىلاي ءبىز ءۇشىن, بالالارىم ءۇشىن باقىتتى كەزەڭدەر باستالدى دەپ ويلايمىن. «جاڭا ءۇي جاڭا ءومىردىڭ باستاۋى» دەپ بەكەر ايتپايدى عوي. بارشاڭىزعا كوپ راحمەت», - دەيدى قۋانىشى قوينىنا سىيماعان نادەجدا.
ەرەكشە اتاپ وتەرلىگى, نادەجداعا باسپانا سىيلاعان كاسىپكەر ءوزى تۋعان اۋىل – بالعىنعا كوپبالالى جانە از قامتىلعان وتباسىلاردى كوشىرۋ ءۇشىن ءوز قاراجاتىنا 5 ءۇي ساتىپ الىپتى. نادەجدا العان باسپانا – سول 5 ءۇيدىڭ ءبىرى. «قازىرگى تاڭدا حالىقتىڭ اۋىلدى جەرلەردەن قالاعا كوشىپ, كەتىپ جاتقانى جاسىرىن ەمەس. بۇل - وتە وزەكتى ماسەلە. سوندىقتان جەرگىلىكتى ءبىلىم شاڭىراقتارىنداعى وقۋشىلار سانىن ساقتاۋ ءۇشى, اۋىلعا ازاماتتاردى تارتۋ ماقساتىندا مەتسەناتتارمەن بىرگە كوپبالالى, از قامتىلعان وتباسىلارعا وسىنداي كومەك كورسەتۋدى ءجون كوردىك. ەكى جاققا دا ءتيىمدى شەشىم دەپ ويلايمىن. كەلىسىمشارتقا ساي وسى ۇيدە بەس جىل تۇرعاننان كەيىن نادەجدا باسپانانى ءوز اتىنا تەگىن اۋدارىپ الادى», – دەيدى كاتونقاراعاي اۋدانىنىڭ اكىمى احمەتقالي نۇرعوجين.
«Nur Otan» پارتياسى وبلىستىق فيليالىنىڭ ءباسپاسوز قىزمەتىنىڭ حابارلاۋىنشا, اۋدان اكىمى دە ءوز اتىنان كوپبالالى وتباسىعا توڭازىتقىش تارتۋ ەتىپتى. ال «Nur Otan» پارتياسىنىڭ جەرگىلىكتى فيليالىنىڭ قىزمەتكەرلەرى ازىق-ت ۇلىك, جاتار ورىن جابدىقتارى, سونىمەن قاتار تۇرمىسقا قاجەتتى زاتتاردى جەتكىزىپ بەرىپتى.
ازامات قاسىم,
«Egemen Qazaqstan»
شىعىس قازاقستان وبلىسى,
كاتونقاراعاي اۋدانى