كىم كىمگە دە ءوز ءۇيى, باسىبايلى باسپاناسى بولعاننان ارتىق باقىت جوق. اتىراۋ وبلىسى يساتاي اۋدانىنىڭ تۇرعىنى مەدەت سۇپىعاليەۆ تە وسى جايلى ارماندايتىن. تۋا ءبىتتى مەشەل اۋرۋىنا شالدىعىپ, مۇگەدەكتەر ارباسىنا تاڭىلسا دا, سپورتپەن اينالىستى, ءتىپتى حالىقارالىق دارەجەدەگى سپورت شەبەرى دارەجەسىنە دەيىن جەتتى.
شاڭىراق كوتەرىپ, ءۇش بالالى بولدى. تاعدىردىڭ قاتال سىنى ونىڭ جىگەرىن جاسىتا العان جوق. اۋىلدا پاتەر جالداپ تۇرىپ جاتقان قوڭىرقاي تىرلىگىنە دە رازى ەدى. ۇلىق مەيرام – ناۋرىز تويى قارساڭىندا سۇپىعاليەۆتەر وتباسى كۇتپەگەن قۋانىشقا كەنەلدى. «سازانقۇراق» جشس باسشىسىنىڭ ورىنباسارى, اتىراۋ قالالىق ءماسليحاتىنىڭ دەپۋتاتى, مەتسەنات الىبەك سەمعاليەۆ ءۇش بولمەلى پاتەر كىلتىن تابىستاپ, مەدەتتىڭ ءوزىن عانا ەمەس, بالا-شاعاسىن, اعايىن-تۋىسىن, اۋىلداستارىن قۋانتتى.
- مەدەتتىڭ تاعدىرى تۋرالى العاش رەت الەۋمەتتىك جەلىدەن وقىدىم. مۇمكىندىگى شەكتەۋلى ازاماتتىڭ قايسارلىعى, ەرىك-جىگەرى ءتانتى ەتتى. وتباسىن قۇرىپ, سپورتتا جەتىستىككە جەتۋى, پاراليمپيادالىق جارىستاردا جەڭىس تۇعىرىنان كورىنۋى ۇلگى بولارلىقتاي. ءار جەردە پاتەر جالداپ جۇرگەنىن ەستىگەننەن كەيىن كومەك قولىن سوزۋدى ۇيعاردىم. ەلىمىزدىڭ تاعى ءبىر وتباسى باسپانالى بولۋىنا ۇلەسىمىزدى قوسۋ – ازاماتتىق پارىزىمىز», - دەيدى الىبەك سەمعاليەۆ.
ايتا كەتەيىك, مەتسەنات وتكەن جىلى دا اتىراۋ قالاسىنداعى كوپبالالى جالعىزباستى اكەگە جەكە ءۇي الىپ بەرگەن بولاتىن. اينالاسىنداعى احۋالعا الاڭداپ, جاقسىلىق جاساۋعا دايىن تۇراتىن ازاماتتاردىڭ كوبەيىپ كەلە جاتقانى قۋانتادى.
باقىتگۇل باباش,
«Egemen Qazaqstan»
اتىراۋ