بۇگىن «نۇر وتان» پارتياسىنىڭ كەزەكتى XVIII سەزىندە ەلباسى ەلىمىزدىڭ جەتكەن جەتىستىكتەرىنە توقتالىپ ءوتتى.
«بۇگىن سىزدەرمەن اتقارعان شارۋالاردى قورىتىندىلاپ, بولاشاقتا اتقارىلاتىن جۇمىستارعا توقتالامىن. ءبىرىنشى, ەلىمىزدىڭ جەتىستىكتەرىنە توقتالىپ وتەيىن. بىراق ونىڭ بارلىعىن ايتىپ ءوتۋ مۇمكىن ەمەس. ەڭ ماڭىزدىسى, ءبىز تاۋەلسىز مەملەكەت قۇردىق, دۇنيەجۇزىنە تانىلدىق. ءوز ەلوردامىزدى قالىپتاستىردىق. ەكونوميكامىز ايتارلىقتاي ءوستى. سىرتقى ساۋدا اينالىمى 9 ەسەدەن استام ءوستى. قازاقستانعا شەتەلدەن 350 ميلليارد دوللارعا جۋىق تىكەلەي ينۆەستيتسيا تارتىلدى. سول ينۆەستيتسيالار ەكونوميكامىزدى كوتەرۋگە كومەكتەستى. ازاماتتاردىڭ كىرىسى 16 ەسە كوبەيدى. 141 ملن-نان استام شارشى مەتر تۇرعىن ءۇي سالىندى. بۇكىل ەلىمىزدە الەۋمەتتىك ماڭىزى بار ينفراقۇرىلىم نىساندارى بوي كوتەردى. 1400 زاماناۋي اۋرۋحانا مەن ەمحانا جانە 2865 مەكتەپ, كوللەدجدەر, بالاباقشالار اشىلدى. بۇل - بۇرىن-سوڭدى بولماعان ماسەلەلەر. بۇنىڭ بارلىعى حالقىمىزدىڭ ەرەن ەڭبەگىنىڭ ناتيجەسى. «نۇر وتان» پارتيا مۇشەلەرىنىڭ دە ەڭبەگى بار» دەدى ەلباسى ءوز سوزىندە.