قاراعاندىدا مەملەكەتتىك قىزمەت ىستەرى جانە سىبايلاس جەمقورلىققا قارسى ءىس-قيمىل اگەنتتىگىنىڭ قاراعاندى وبلىستىق دەپارتامەنتىندە سىبايلاس جەمقورلىق قۇقىق بۇزۋشىلىقتارى بويىنشا اكىمشىلىك پراكتيكانىڭ ناتيجەلەرى تاقىرىبىندا بريفينگ ءوتتى.
وعان اتالعان دەپارتامەنت باسشىسىنىڭ ورىنباسارى تانات مەدەت, سىبايلاس جەمقورلىقتىڭ الدىن الۋ باسقارماسىنىڭ باسشىسى باۋىرجان حۋساينوۆ جانە «سارىارا – ادالدىق الاڭى» جوبالىق كەڭسەسىنىڭ باسشىسى ماليكا كۋسەنباەۆا قاتىستى.
سىبايلاس جەمقورلىققا قارسى 2015-2025 جىلدارعا ارنالعان ستراتەگيادا كوزدەلگەن سىبايلاس جەمقورلىقتىڭ الدىن الۋ شارالارىن جانداندىرۋعا باسا نازار اۋدارۋ قاجەتتىلىگى كورسەتىلگەن. وسى ورايدا, بريفينگتە ءسوز العان قاتىسۋشىلار مەملەكەتتىك قىزمەت ىستەرى جانە سىبايلاس جەمقورلىققا قارسى ءىس-قيمىل جونىندەگى ۋاكىلەتتى ورگان ءۇشىن قىلمىستىق قۋدالاۋ ەمەس, سىبايلاس جەمقورلىق كورىنىستەرىنىڭ سەبەپتەرى مەن جاعدايلارىن ايقىنداۋعا جانە ونى جويۋعا باعىتتالعان الدىن الۋ شارالارىن وتكىزۋگە باسىمدىق بەرىلىپ وتىرعانىن اتاپ ءوتتى.
وسىعان وراي, مەملەكەتتىك قىزمەت ىستەرى جانە سىبايلاس جەمقورلىققا قارسى ءىس-قيمىل جونىندەگى ۋاكىلەتتى ورگانعا بىرنەشە باپ بويىنشا اكىمشىلىك حاتتاما تولتىرۋ قۇقىعى بەرىلدى. مىسالعا الساق, قاراعاندى وبلىسى بويىنشا مەملەكەتتىك كىرىستەر دەپارتامەنتىنەن تۇسكەن ماتەريالدار نەگىزىندە جىل باسىنان باستاپ اتالعان كودەكستىڭ ەكى بابى, ياعني, 676-شى جانە 681-باپتار بويىنشا اكىمشىلىك حاتتامالار تولتىرىلعان.
اتاپ ايتقاندا, قاراعاندى وبلىسى بويىنشا مەملەكەتتىك كىرىستەر دەپارتامەنتىنە قاراستى اۋداندىق باسقارمالارىنىڭ قىزمەتشىلەرىنە زاڭسىز اقشالاي سىياقى ۇسىنعانى ءۇشىن وبلىسىمىزدىڭ ەكى ازاماتى كودەكستىڭ 676-بابى بويىنشا اكىمشىلىك جاۋاپكەرشىلىككە تارتىلدى. اتالعان فاكتىلەردىڭ بىرىندە جەكە تۇلعالار جەكە كاسىپكەر رەتىندە تىركەلۋ جانە ساتۋ بولىمشەسىن اشۋ ءراسىمى تۋرالى بەرىلگەن كەڭەس ءۇشىن العىس رەتىندە اقشا ۇسىنسا, ەكىنشىسىندە, پاتەنتتى تىركەۋ جانە جەكە تاسىمالداۋ بويىنشا بيزنەس اشۋ تۋرالى كەڭەس بەرگەنى ءۇشىن اقشالاي زاڭسىز سىياقى بەرگەن. مەملەكەتتىك قىزمەتشىلەرگە زاڭسىز سىياقى ۇسىنعانى ءۇشىن ەكى ازاماتقا جالپى كولەمى 589 200 تەڭگە كولەمىندە ايىپپۇل سالىنعان.
سونىمەن قاتار, مەملەكەتتىك قىزمەت ىستەرى جانە سىبايلاس جەمقورلىققا قارسى ءىس-قيمىل اگەنتتىگىنىڭ قاراعاندى وبلىسى بويىنشا دەپارتامەنتىنىڭ قىزمەتكەرلەرىمەن جۇرگىزىلگەن تالداۋ ناتيجەسىندە, شەت اۋدانىنداعى ءبىر مەكەمەنىڭ باسشىسى بۇرىن سىبايلاس جەمقورلىق قىلمىس جاساعان ادامدى جۇمىسقا قابىلداعانى ءۇشىن كودەكستىڭ 681-بابىنا سايكەس اكىمشىلىك جاۋاپكەرشىلىككە تارتىلىپ, 126 250 تەڭگە كولەمىندە ايىپپۇل تولەدى دەگەن مالىمەت كەلتىردى بريفينگ قاتىسۋشىلارى.
وسىنداي قۇقىق بۇزۋشىلىقتاردى مەملەكەتتىك قىزمەتشىلەردىڭ حابارلاۋى اتالعان دەپارتامەنتپەن بىرگە وبلىستاعى مەملەكەتتىك ورگانداردا ۇزدىكسىز جۇرگىزىلىپ وتىرعان سىبايلاس جەمقورلىققا قارسى اعارتۋ جۇمىستارىنىڭ ناقتى ناتيجەسى دەپ ايتۋعا بولادى.
قايرات ءابىلدا,
«ەگەمەن قازاقستان»
قاراعاندى