استانا الەمنىڭ باسقا ءىرى قالالارى سياقتى, ءتيىمدى لوگيستيكالىق تۇجىرىمدامانى ەنگىزۋدە, دەپ مالىمدەدى قالا اكىمى باقىت سۇلتانوۆ تۇرعىندارعا ەسەپ بەرۋ كەزدەسۋىندە. بۇل تۋرالى ەلوردا اكىمدىگىنىڭ رەسمي سايتى حابارلادى.
«مەنىڭ ويىمشا, قولدانىستاعى مارشرۋتتاردى وڭتايلاندىرۋ – بۇل قوعامدىق كولىكتىڭ جۇمىسىن جاقسارتۋدىڭ ەڭ ءتيىمدى ءتاسىلى. وتكەن جىلى ءتورت جاڭا باعدار اشۋدان باسقا ءبىز قولدانىستاعى 11 سحەمانى وزەكتەندىردىك, قوعامدىق كولىكتىڭ قوزعالىس ينتەرۆالى 30% - عا قىسقارتىلدى», – دەدى اكىم.
سونىمەن قاتار, جولاۋشىلارعا ىڭعايلى بولۋ ءۇشىن قالانىڭ شەتى مەن ورتالىعىن بايلانىستىراتىنن 20 تىكەلەي باعدار قىزمەت كورسەتۋدە. جاقىن ارادا جاڭا ماگيسترالدىق ەكسپرەسس-باعىتتار ىسكە قوسىلادى. بۇگىنگى تاڭدا قالالىق اۆتوبۋس پاركى 70% - عا جاڭارتىلدى, جاقىن ارادا گازبەن جۇرەتىن تاعى 80 اۆتوبۋس ساتىلىپ الىنادى دەپ جوسپارلانۋدا, پيلوتتىق رەجيمدە ەلەكتروبۋس ىسكە قوسىلدى. قالا اكىمى جىلى ايالدامالاردىڭ العاشقىدا سىنعا ۇشىراعانىن, كەيىن تۇرعىندار ولاردىڭ قاجەتتىگىن تۇسىنگەنىن ەسكە سالدى.
وتكەن جىلى استانادا بيۋدجەت جانە ءمجا ەسەبىنەن وسىنداي 74 ايالداما ورناتىلعان, بولاشاقتا ولاردىڭ سانى ۇلعايتىلادى دەپ جوسپارلانۋدا. كولىكتىك كارتا جۇيەسى ءوزىنىڭ تيىمدىلىگىن دالەلدەدى. قازىرگى ۋاقىتتا ولاردى جولاۋشىلاردىڭ 96% پايدالانادى. كولەڭكەلى اينالىمنان تابىستىڭ 30% شىقتى.
ۇلكەن دەرەكتەردى تالداۋ قالالىق جوسپارلاۋدىڭ اجىراماس بولىگىنە اينالدى. قولما-قول اقشاسىز اقى تولەۋدى ەنگىزۋ 670 مىڭ تۇرعىننىڭ كۇن سايىن قايدا جانە قالاي بارا جاتقانىن تۇسىنۋگە مۇمكىندىك بەردى. بۇل بىزگە كولىك جۇيەسىنىڭ ناقتى ەكونوميكالىق مودەلىن بولجاۋعا جانە باعىتتاردى وڭتايلاندىرۋ مەن ساۋلەتتىك شەشىمدەر قابىلداۋعا مۇمكىندىك بەرەدى.