قالا دامۋىنىڭ مىندەتتەرى تۋرالى پرەمەر-ءمينيستردىڭ ءبىرىنشى ورىنباسارى اسقار مامين ايتتى. بۇل تۋرالى استانا قالاسى اكىمدىگىنىڭ رەسمي سايتى حابارلادى.
«ەلباسى تاپسىرماسىمەن ۇكىمەت استانا قالاسىن دامىتۋ جونىندەگى كەشەندى جوسپار قۇردى. قويىلعان ماقساتقا قول جەتكىزۋ ءۇشىن تىرشىلىكتى قامتاماسىز ەتۋ جۇيەلەرىن, الەۋمەتتىك نىساندار, قولجەتىمدى تۇرعىن ءۇي سالۋ, جول-كولىكتىك ينفراقۇرىلىمدى جانە يندۋستريالىق ايماقتاردى قامتاماسىز ەتۋ, قالانى اباتتاندىرۋ جانە قاۋىپسىزدىك باعىتىن دامىتۋ بويىنشا جوبالار ىسكە اسىرىلاتىن بولادى. جالپىلاي العاندا, كەشەندى جوسپار اياسىنداعى ءىس-شارالاردى ىسكە اسىرۋعا بەس جىل ىشىندە 1,5 تريلليون تەڭگە ينۆەستيتسيا قۇيىلاتىن بولادى. 10 مىڭنان استام جۇمىس ورنى اشىلادى. ءبىزدىڭ ماقسات – قالانى جايلى, قاۋىپسىز, ىڭعايلى ەتۋ», – دەدى اسقار مامين استانا قالاسىنىڭ اكىمى باقىت سۇلتانوۆتىڭ تۇرعىندار الدىنداعى ەسەپتىك كەزدەسۋىندە.
سپيكەر اتاپ وتكەندەي, جۇرگىزىلىپ وتىرعان الەۋمەتتىك ساياساتتىڭ نەگىزگى ماقساتى – حالىق تابىسىن ۇلعايتۋ, لايىقتى ءومىر ءسۇرۋ ساپاسىن قامتاماسىز ەتۋ.
«بىرىنشىدەن, تۇرعىنداردىڭ قولجەتىمدى ءارى ساپالى باسپانامەن, بىلىممەن جانە مەديتسينالىق قىزمەتتەرمەن قامتاماسىز ەتۋگە قاتىستى نەگىزگى قاجەتتىلىكتەرىن قاناعاتتاندىرۋ. مەملەكەت باسشىسى كوممۋنالدىق قىزمەت تاريفتەرىن, ازىق-ت ۇلىك جانە ءدارى-دارمەك باعاسىن ەرەكشە باقىلاۋدا ۇستاۋدى تاپسىردى. ەكىنشىدەن, استانا اكىمدىگىنىڭ الدىنا جاڭا جۇمىس ورىندارىن اشۋ, شاعىن جانە ورتا بيزنەستىڭ دامۋىنا قولايلى ورتا قۇرۋ تالاپتارى قويىلعان. ۇشىنشىدەن, حالىقتىڭ الەۋمەتتىك وسال توپتارىن: كوپبالالى انالار, مۇگەدەكتەر, از قامتىلعان وتباسىلاردى قولداۋدا ناقتى شارالاردى جۇزەگە اسىرۋ», – دەپ تۇيىندەدى ءسوزىن ا. مامين.
ۆيتسە-پرەمەر مەملەكەت باسشىسىنىڭ تاپسىرماسى بويىنشا ۇكىمەت استانانى دامىتۋداعى الەۋمەتتىك-ەكونوميكالىق وزەكتى مىندەتتەردى شەشۋدە ىقپال ەتەتىندىگىن ايتتى.