استانا اكىمى بيزنەسمەندەردى مۇمكىندىگى شەكتەۋلى بالالارعا كومەك كورسەتىپ جۇرگەن كوممەرتسيالىق ەمەس ۇيىمدارعا قولداۋ كورسەتۋگە شاقىردى, دەپ حابارلايدى ەلوردا اكىمدىگىنىڭ رەسمي سايتى.
باقىت سۇلتانوۆ تۇرعىندارمەن ەسەپ بەرۋ كەزدەسۋىندە مۇگەدەك بالالاردى ءبىلىم بەرۋمەن قامتاماسىز ەتۋ بويىنشا اكىمدىك قابىلداعان شارالارعا ەرەكشە توقتالدى.
«بۇل – باتىر بالالار. ءبىز مۇمكىندىگى شەكتەۋلى بالالار تاربيەلەپ وتىرعان كوپبالالى وتباسىلاردى ءجيى كەزدەستىرەمىز. ماسساج كۋشەتكاسىنىڭ بىرنەشە سانتيمەترىن باعىندىرعان بالالارى ءۇشىن اتا-انالارى قالاي قۋاناتىنىن كورسەڭىزدەر عوي. بالالارى دا ءارى قاراي جۇمىس ىستەۋگە جانە دامۋعا دايىندىعىن ايتادى.مەن استانانىڭ بارلىق كاسىپكەرلەرىن وسى سالادا جۇمىس ىستەيتىن كوممەرتسيالىق ەمەس ۇيىمداردى قولداۋعا شاقىرامىن» دەدى ب.سۇلتانوۆ.
قازىرگى ۋاقىتتا استانادا 80% مۇگەدەك بالا نەمەسە 6 مىڭ وسىنداي بىلىممەن قامتىلعان. ەرەكشە قاجەتتىلىگى بار بالالاردى وقىتۋ ءۇشىن 77 مەكتەپتە, 13 بالاباقشادا, ءتورت كوللەدجدە جاعداي جاسالعان. سونىمەن قاتار, قالا اكىمى پەداگوگتاردى قولداۋ شارالارى تۋرالى ايتتى. بيىل ولارعا تاعى 1 مىڭ تۇرعىن ءۇي سەرتيفيكاتى بەرىلەدى, 300 ورىندىق جاتاقحانانىڭ قۇرىلىسى اياقتالۋدا, پەداگوگتاردىڭ ەڭبەكاقىسى مەن مارتەبەسىن جۇيەلى تۇردە ارتتىرۋعا شەشىم قابىلداندى. ءمجا تەتىكتەرى ارقىلى جان باسىنا قارجىلاندىرۋدى ەنگىزۋدىڭ ارقاسىندا اكىمشىلىكتە قاراجاتتى بوساتۋ جانە ولاردى مۇعالىمدەردىڭ جالاقىسىنا جىبەرۋ مۇمكىندىگى پايدا بولدى. بۇل سونداي-اق, ءبىلىم بەرۋ سالاسىنا جەكە بيزنەس پەن جەكەمەنشىك مەكتەپتەردى تارتۋعا مۇمكىندىك بەرەدى.
«بالالاردىڭ قاۋىپسىزدىگى ماڭىزدى مىندەت بولىپ تابىلادى. اعىمداعى جىلدىڭ سوڭىنا دەيىن ءبىز وقۋ ورىندارىن, سونىڭ ىشىندە, ونداعى اسحانالاردى بەينەباقىلاۋ كامەرالارىمەن, 100 پايىز قامتاماسىز ەتەمىز» دەدى سۇلتانوۆ.