بۇل – استانالىقتاردىڭ ءومىر ءسۇرۋ ساپاسىن جاقسارتۋعا باعىتتالعان ستراتەگيالىق قۇجاتتار, دەپ حابارلايدى ەلوردا اكىمدىگىنىڭ رەسمي سايتى. حالىققا ەسەپ بەرۋ كەزدەسۋىندە ەلوردا اكىمى باقىت سۇلتانوۆ استانانىڭ ەرەكشە قالا ەكەندىگىن اتاپ ءوتىپ, اكىمدىكتىڭ ونى ودان دا جايلى ەتۋ ءۇشىن بار كۇشىن جۇمساۋى كەرەكتىگىن ايتتى.
«بۇرىنعى قارجى ءمينيسترى رەتىندە ماعان ءوز ەسەبىمدى ادەتتەگىدەي سانداردان باستاعان ىڭعايلى. الايدا, قالانىڭ تۇرمىس-تىرشىلىگى مەن ەكونوميكاسى – بۇل, ءبىرىنشى كەزەكتە, ادامدار. سول سەبەپتى ءبىز استانانىڭ 2050 جىلعا دەيىنگى دامۋ ستراتەگياسى جانە قالا دامۋىنىڭ جوسپارى سياقتى ەكى قۇجاتتى ازىرلەۋگە كىرىستىك», دەدى ب. سۇلتانوۆ.
ونىڭ ايتۋىنا قاراعاندا, ستراتەگيا بىزگە باعىت-باعدار كورسەتەر قۇجات بولسا, ەكىنشىسى – مەجەگە قالاي قول جەتكىزەتىندىگىمىزدىڭ ەگجەي-تەگجەيلى جوسپارى.
«ەلباسى حالىقپەن كەرى بايلانىس ورناتۋ كەرەكتىگىنە ۇنەمى نازار اۋدارادى. تەك جىل باسىنان اۋدان اكىمدەرى مەن قالا اكىمى ورىنباسارلارىنىڭ 33ەسەپ بەرۋى كەزدەسۋى ءوتتى. ارينە, جەكە كەزدەسۋ دەگەن ەڭ ءتيىمدى فورمات بولماعان سوڭ, ءبىز iKomek قىزمەتىن قۇردىق. وتكەن جىلى قىزمەتكە 1 ملن ءوتىنىم كەلىپ تۇسسە, ولاردىڭ شامامەن 100% ورىندالعان. بۇل – كەرەمەت كورسەتكىشتەر. كومەك قىزمەتىن پايدالانۋشىلار دا, ورتالىقتىڭ جۇمىسىنا جاۋاپتىلار دا جارايسىزدار!», دەدى سۇلتانوۆ.
ونىڭ ايتۋىنشا, اكىمدىكتەردەگى, باسقارمالارداعى اشىق ەسىك كۇندەرى مەن iKomek قىزمەتىنە تۇسكەن حابارلامالار, الەۋمەتتىك جەلىلەر ارقىلى تۇسكەن شاعىمدار, وسىلاردىڭ بارلىعى قالا اكىمى مەن ونىڭ توبىنا قالالىقتاردى جاقسى تۇسىنۋگە كومەكتەسەدى.
«مەن سىزدەردەن ءبىزدىڭ جۇمىسىمىزعا قاتىستى پىكىرىڭىزدى بەلسەندى تۇردە ءبىلدىرۋىڭىزدى جالعاستىرۋىڭىزدى سۇرايمىن. جاعدايلارىڭىزدى تۇسىنەمىن. مەن سىزدەردىڭ تۇسىرگەن ءاربىر شاعىمىڭىز جايلى بىلەمىن. ماسەلەلەر ءوز شەشىمىن تاباتىن بولادى. ارينە, ونىڭ بارلىعى ءبىر ساتتە شەشىلمەگەنىمەن, ۋاقىت وتە كەلە ءبىز ءار ماسەلەگە جەتەتىن بولامىز», دەدى سۇلتانوۆ.