شىمكەنت قالاسىندا بىرقاتار كوشە جولدارىنا جوندەۋ جۇمىستارى جۇرگىزىلمەك. ناقتىراق ايتقاندا, ادىربەكوۆ كوشەسى مەن ا2 جولى, بايتۇرسىن ۇلى كوشەسىندە ورتاشا جوندەۋ جۇرگىزىلەدى, قاراباستاۋ ەلدىمەكەنىندەگى بادام وزەنىنەن وتەتىن كوپىر جاڭارتىلادى. سونداي-اق قالاداعى كولىك كەپتەلىسىنىڭ الدىن الۋ ماقساتىندا قوناەۆ داڭعىلىن قالا سىرتىنا قاراي ۇزارتۋ جۇمىستارى باستالادى.
– ادىربەكوۆ كوشەسىندەگى قۇرىلىس جۇمىستارى 5 كەزەڭگە ءبولىنىپ جوبالانعان. جول قۇرىلىسىنا جاۋاپتى مەردىگەر – «Kaz Construction» جشس. ەكى باعىتتاعى كوشەنى جاڭارتۋ بارىسىندا جولدىڭ ەكى شەتىنە جاياۋ جۇرگىنشىلەرگە ارنالعان جول سالىنادى, اباتتاندىرىلادى. ادىربەكوۆ كوشەسى ارقىلى بۇگىندە تاۋلىگىنە 13450 كولىك وتەدى, كەپتەلىس ءجيى بولادى. قايتا قۇرۋ جۇمىستارىنان كەيىن 4 جولاقتى جول سالىنىپ, بۇل كولىك قوزعالىسىنا دا وڭتايلى بولماق, – دەيدى قالالىق جولاۋشىلار كولىگى جانە اۆتوموبيل جولدارى باسقارماسىنىڭ باسشىسى قۋاتجان جۇماتاەۆ.
باسقارما باسشىسىنىڭ سوزىنە سۇيەنسەك, ادىربەكوۆ كوشەسىن كەڭەيتۋ بارىسىندا مەملەكەت مۇقتاجدىعى ءۇشىن 65 جەر تەلىمى مەملەكەت مەنشىگىنە قايتارىلماق.
مەردىگەر مەكەمە جەرگىلىكتى بيلىك تاراپىنان جەر مەن كوممۋنالدىق سۇراقتار تەز شەشىمىن تاپسا, جول قۇرىلىسىن جىلدامداتىپ, ەرتە اياقتاۋعا كۇش سالامىز, دەپ وتىر.
جول قۇرىلىسىنىڭ جوباسىمەن تانىسقان قالا اكىمى عابيدوللا ءابدىراحىموۆ اكىمدىك تاراپىنان بۇل ماسەلەنىڭ قولعا الىناتىندىعىن ايتىپ, مەردىگەرلەردى جۇمىستىڭ ساپاسىنا باسا نازار اۋدارۋعا شاقىردى. جول قۇرىلىسىنا بايلانىستى قالالىق جەر قاتىناستارى جانە جەردىڭ پايدالانىلۋى مەن قورعالۋىن باقىلاۋ, ەنەرگەتيكا جانە كوممۋنالدىق شارۋاشىلىق باسقارمالارىنا دا تاپسىرما بەرىپ, اتالعان كوشەنىڭ قايتا قۇرۋ جوباسىنا ۆەلوسيپەد جولاعىن قوسۋدى ەسكەرتتى.
ءوز كەزەگىندە مەردىگەر مەكەمەنىڭ وكىلى جول جوندەۋ جۇمىستارىن ۋاقتىلى اياقتاۋعا ۋادە بەردى.
بىلتىر عانا قۇبىرلارى جوندەلگەن بايتۇرسىن ۇلى كوشەسىن ارالاپ كورگەن شاھار باسشىسى ونداعى باستاپقى ۇلگىلەرمەن تانىسىپ, تروتۋار ديزاينىنا تاڭداۋ جاسادى. اكىم اتالعان كوشەگە تەك وتاندىق قۇرىلىس ونىمدەرىن پايدالانۋدى تاپسىردى.
نۇرشات توكەن,
«Egemen Qazaqstan»
شىمكەنت