قاراعاندىدا ادام كوپ جينالاتىن جەرلەردە, سونىمەن قاتار شەتكەرىرەك ورنالاسقان شاعىن اۋدانداردا بۇيىرىندە «جۇمىسقا ورنالاستىرۋ بويىنشا ءموبيلدى پۋنكت» دەگەن جازۋى بار ارنايى اۆتوكولىكتەر پايدا بولدى.
ولار ءبىر تەرەزە قاعيداسى بويىنشا جۇمىس ىستەيدى, بۇل جەردە جۇمىسقا ورنالاسۋعا, كاسىپتىك وقۋعا, ءوز ءىسىن اشۋ جانە دامىتۋ ءۇشىن شاعىن نەسيە الۋ بويىنشا ءتۇرلى اقىل-كەڭەس الۋعا بولادى. تەك سوڭعى ايدىڭ ىشىندە 1000-نان استام ادام وسى ءموبيلدى توپتاردىڭ كومەگىنە جۇگىنگەن.
– ارنايى جابدىقتالعان اۆتوكولىك كەستە بويىنشا جۇمىس ىستەيدى. ءبىز ونى الەۋمەتتىك جەلىلەردە, قالالىق جۇمىسپەن قامتۋ ورتالىعىنىڭ اككاۋنتتارىندا جاريالايمىز. وسىعان ۇقساس ءموبيلدى پۋنكتتەر جاقىن ارادا وبلىستىڭ بارلىق قالالارى مەن اۋداندارىندا پايدا بولادى, – دەيدى جۇمىسپەن قامتۋدى ۇيلەستىرۋ جانە الەۋمەتتىك باعدارلامالار ءبولىمىنىڭ باسشىسى مۇحتار تولەي.
جىلجىمالى پۋنكتتەردىڭ ناتيجەلى جۇمىس ىستەي باستاعانىن ايتا كەتكەن ءجون. مىسالى, جوبا باستالعان العاشقى كۇنى قاراعاندىنىڭ قاق ورتاسىنداعى 45 ورامدا تۇسكە دەيىنگى ۋاقىتتىڭ وزىندە 80 ادام ءموبيلدى توپتىڭ كومەگىنە جۇگىنىپ, جۇمىسپەن قامتۋ ورتالىعى ماماندارىنىڭ كەڭەسىن الدى. سونىڭ ناتيجەسىندە 15 ادام تۇراقتى جۇمىسقا ورنالاسۋعا جولداما الىپ, 10 ادام كاسىپتىك تەگىن وقۋ كۋرسىنا جازىلدى. سونىمەن قاتار, 30-دان استام ادام تولىق كەڭەس الىپ, الداعى ۋاقىتتا مەملەكەتتىك باعدارلامالارعا قاتىسۋعا تىلەك بىلدىرگەن.
جالپى, قاراعاندىلىقتار مۇنداي پۋنكتتەردىڭ پايدا بولۋى وتە جاقسى يدەيا دەپ سانايدى.
– جۇمىسقا ورنالاسۋ پۋنكتىن كورىپ, قانداي جۇمىستار بارىن ءبىلىپ شىعايىن دەپ شەشتىم. مەن بۇرىننان بەرى وزىمە قوسىمشا تابىس كوزىن ىزدەپ جۇرگەن ەدىم. ماعان مۇندا ءبارىن ءتۇسىندىردى, قايدا بارۋ كەرەكتىگىن ايتتى. مەنىڭ ويىمشا, مۇنداي پۋنكتتەر وتە پايدالى. مەنىڭ جۇمىسپەن قامتۋ ورتالىعىنا بارۋىم ەكىتالاي ەدى. ال بۇگىن جولداماعا يە بولىپ, جۇمىس ۇسىنۋشىلاردىڭ بايلانىس نومىرلەرىن وزىمە جازىپ الدىم. وسىنىڭ بارلىعىن ۇيىمداستىرۋشىلارعا دەگەن العىسىم زور, – دەيدى قالا تۇرعىنى ۆالەريا گۋدينا.
قاراعاندى قالالىق جۇمىسپەن قامتۋ ورتالىعىنىڭ مالىمەتىنە ساي, بۇگىنگى كۇندە وبلىس ورتالىعىندا 1800 بوس جۇمىس ورنى بار. بۇدان بولەك, جاستار تاجىريبەسى, الەۋمەتتىك جۇمىس ورىندارى, قوعامدىق جۇمىستار سياقتى تاعى 500 ۋاقىتشا جۇمىس ورنى اشىلعان. ال بىرەگەي جوبا اۆتورلارى جىلجىمالى بەكەتتەردىڭ كومەگىمەن قالاداعى جۇمىسسىزدىقتى جويۋ ىسىندە ناقتى ناتيجەلەرگە قول جەتكىزۋگە بولاتىنىنا سەنىمدى.
قايرات ءابىلدا,
«ەگەمەن قازاقستان»
قاراعاندى