قازىرگى زاماننىڭ ءومىر ءسۇرۋ سالتى, ياعني ادامنىڭ قيمىل-قوزعالىسىنىڭ ازايۋى سالدارىنان جۇرەك-قان تامىرلارى اۋرۋلارى, قانت ديابەتى, سۋسامىر, پروستاتيت, بۇيرەك جانە باۋىر اۋرۋلارى, ت.ب. كوبەيىپ, كەتىپ وتىر. دۇنيەجۇزىلىك دەنساۋلىق ساقتاۋ ۇيىمىنىڭ ددۇ بولجامىنا سۇيەنەتىن بولساق, بۇل قورقىنىشتى دەرەكتەر جىلدان جىلعا ۇلعايا بەرەتىن سىڭايلى.
الەمدەگى كەيبىر عالىمداردىڭ پىكىرىنشە, حالىقتى ەڭ وڭاي, حالىقتى جوعارىدا اتالعان سىرقاتتاردان اراشالاپ الۋدىڭ ەڭ قولجەتىمدى ءارى ءتيىمدى جولى كۇن سايىن تازا اۋادا جاياۋ ءجۇرۋ. ماسەلەن, جاپون عالىمدارى كۇن سايىن 10 مىڭ قادام (شامامەن 6-7 كم) جاياۋ جۇرگەن ادامنىڭ دەنى ساۋ ءارى كوپتەگەن اۋرۋدان ادا بولاتىنىن ايتادى. ال امەريكانىڭ ونكولوگتار قاۋىمداستىعى قاتەرلى ىسىكتىڭ الدىن الۋدىڭ ءتيىمدى جولى رەتىندە دە جاياۋ ءجۇرۋدى ۇسىنادى. مۇنداي ماتەريالدار مەديتسينالىق باق-تاردا, عالامتوردا وتە كوپ. ءوزىمىز جۇرگىزگەن ساۋالدامالاردى دا ساراپتايتىن بولساق, شىن مانىندە جاياۋ ءجۇرۋدى كۇندەلىكتى داعدىسىنا اينالدىرعان ازاماتتار ىشىندە جوعارىدا اتالعان اۋرۋلارعا شالدىققاندار جوق ەكەن.
وكىنىشكە قاراي, ءبىزدىڭ ازاماتتار جاياۋ جۇرمەيدى, تاياق تاستام جەرگە دە كولىكپەن بارعاندى دۇرىس كورەدى, ويتكەنى, كوپشىلىگى جاياۋ ءجۇرۋدىڭ زور دەنساۋلىقتىڭ كەپىلى ەكەندىگىن, اتالعان اۋرۋلاردىڭ الدىن الاتىنىن بىلمەيدى, ال بىلەتىندەرى جاياۋ جۇرۋگە ەرىنەدى نەمەسە وسى ماڭىزدى ماسەلەگە ءمان بەرمەيدى. سوندىقتان حالىق اراسىندا ۇگىت-ناسيحات جۇمىستارىن جۇرگىزۋىمىز كەرەك.
قازاقستاننىڭ جاياۋ ءجۇرۋ جانە سكانديناۆياشا جاياۋ ءجۇرۋ فەدەراتسياسى (بۇدان ءارى – فەدەراتسيا) جاياۋ ءجۇرۋدى حالىق اراسىندا جاپپاي ناسيحاتتاپ, ونى جالپىۇلتتىق قوزعالىسقا اينالدىرۋدى جوسپارلاپ وتىر. فەدەراتسيانى دامىتۋ ءۇشىن قاتارىمىزعا قالىڭ بۇقارانى تارتىپ, ەرىكتى ازاماتتارمەن جۇمىس ىستەيتىن بولامىز. فەدەراتسيانىڭ رەسمي سايتى www.hodba.kz
ءبىز ءبىر توپ بەلسەندى ازامات حالقىمىزدىڭ دەنساۋلىعىن جاقسارتۋعا ءوز ۇلەسىمىزدى قوسۋ ءۇشىن وسى فەدەراتسيانى قۇردىق. ەندى «كۇن سايىن 10 000 قادام جۇرەيىك» دەپ اتالاتىن جالپىۇلتتىق باعدارلامامىزدى قالىڭ جۇرتشىلىققا ۇسىنامىز. ءبىزدىڭ بۇكىل باعدارلامامىز ءبىر عانا سويلەمنەن تۇرسا دا ونىڭ كوتەرەر جۇگى اۋىر, ءمان-ماڭىزى جوعارى. ياعني, فەدەراتسيانىڭ ءاربىر مۇشەسى كۇن سايىن 10 000 قادام ءجۇرىپ وتۋگە مىندەتتەنەدى. ءاربىر ادامنىڭ وسى ماقساتتى ورىنداۋى ءۇشىن كومەكتەسەتىن بولامىز, ياعني وقىتامىز, ۇيرەتەمىز, ءتيىستى شارالار ۇيىمداستىرامىز جانە قاجەت بولسا ارنايى دايىندايمىز. ءبىز الدىمىزعا وسىنداي وتە قاراپايىم دا قولجەتىمدى, بىراق حالىق ءۇشىن پايداسى اسا زور ماقسات قويىپ وتىرمىز. شىن مانىندە جاياۋ ءجۇرۋدىڭ ادامنىڭ دەنساۋلىعىن جاقسارتىپ, ءومىر جاسىن ۇزارتاتىندىعىنا ەش كۇمان بولماۋى كەرەك.
ددۇ دەرەكتەرىنە سۇيەنەتىن بولساق, سوڭعى كەزدە وبىر, جۇرەك-قان تامىرلارى اۋرۋلارى, پروستاتيت, قانت ديابەتى, وكپە قابىنۋى, بۇيرەك جانە باۋىر اۋرۋلارىنا شالدىعۋ سانى بۇكىل الەم بويىنشا ءوسىپ كەلەدى, ءبىزدىڭ ەلىمىز دە ودان شەت قالىپ وتىرعان جوق. ال ونىڭ الدىن الۋدىڭ ەڭ ءتيىمدى دە جالعىز جولى جاياۋ ءجۇرۋ ەكەندىگى قازىرگى مەديتسينادا دالەلدەنگەن. سوندىقتان وسى قورقىنىشتى اۋرۋلاردان حالقىمىزدى قۇتقارۋدىڭ ءتيىمدى جولى − كۇن سايىن جاياۋ ءجۇرۋ. ءبىز كەڭەسىمىزدى 1000 ادامعا تىڭداتا الساق, ولاردى وسى زاۋالداردان قۇتقاردىق دەپ ەسەپتەيمىز. ەگەر ءبىزدىڭ قاتارىمىزعا 1 000 000 ادام كىرەتىن بولسا, قوعامداعى ميلليون جاننىڭ دەنى ساۋ بولىپ, باقىتتى بولۋىنا ءوز ۇلەسىمىزدى قوسقانىمىز. فەدەراتسيا اۋرۋحانالار سالمايدى, ادام ەمدەۋمەن دە اينالىسپايدى, بىراق وسىلايشا شىن مانىندە مىڭداعان ادامنىڭ ءومىرىن قۇتقارۋعا اتسالىسادى.
ءبىزدىڭ ەلىمىزدە جاياۋ ءجۇرۋ جانە سكانديناۆياشا جاياۋ ءجۇرۋ سپورت تۇرىندە تانىلماعان, ياعني رەسپۋبليكالىق سپورتتىق تىزبەدە سپورت ءتۇرى رەتىندە تىركەلمەگەن. سوندىقتان ءبىزدى وسى سپورت تۇرلەرىن زاڭدى تۇردە تىركەتىپ, رەسمي مويىندالۋى ءۇشىن جۇرگىزىلەتىن ۇلكەن جۇمىستار كۇتىپ تۇر. وسى ماقساتتا سكانديناۆياشا جاياۋ ءجۇرۋ سپورتى بويىنشا فينلياندياداعى حالىقارالىق سكانديناۆياشا جاياۋ ءجۇرۋ فەدەراتسياسىنىڭ ستاندارتتارى مەن نورماتيۆتەرىن قابىلدايمىز. ال جاياۋ ءجۇرۋ سپورتى بويىنشا ءوزىمىزدىڭ نورماتيۆتەرىمىز بەن ستاندارتتارىمىزدى ازىرلەيمىز جانە سوعان سايكەس ءوزىمىزدىڭ تارتىپتەرىمىز بەن ەرەجەلەرىمىزدى جاساپ شىعارامىز.
فەدەراتسيامىز رەسپۋبيكالىق جانە حالىقارالىق دەڭگەيدەگى ءتيىستى اككرەديتتەۋ جانە مويىندالۋ راسىمدەرىنەن وتكەننەن كەيىن ەلىمىزدەگى باسقا دا مويىندالعان سپورتتىق فەدەراتسيالار سەكىلدى زاڭدىق نەگىزدە ءوز سپورتشىلارىمىز بەن جاتتىقتىرۋشىلارىمىزعا ءتيىستى سپورتتىق رازريادتار مەن اتاقتار بەرەمىز. ماماندار دايىنداپ, تيىسىنشە ءوزىمىزدىڭ جاتتىقتىرۋشىلارىمىز بەن سپورتشىلار قۇرامىن جاساقتايمىز.
قازاقستاننىڭ جاياۋ ءجۇرۋ جانە سكانديناۆياشا جاياۋ ءجۇرۋ فەدەراتسياسىن ەلىمىزدىڭ بارلىق وڭىرىندە قۇرامىز. وسىعان بايلانىستى, ءوز دەنساۋلىعىمەن بىرگە حالىقتىڭ دەنساۋلىعىن دا جاقسارتۋعا ۇلەس قوسۋعا نيەتتەس ازاماتتاردى قۇرامىمىزعا كىرۋگە شاقىرىپ, فەدەراتسيا فيليالىنىڭ پرەزيدەنتى, ۆيتسە-پرەزيدەنتتەرى لاۋازىمدارىنا كونكۋرس جاريالادىق. بارلىق اقپارات www.hodba.kz سايتىندا.
جامبىل احمەتبەكوۆ,
پارلامەنت ءماجىلىسىنىڭ دەپۋتاتى, قازاقستاننىڭ جاياۋ ءجۇرۋ جانە
سكانديناۆياشا جاياۋ ءجۇرۋ فەدەراتسياسىنىڭ پرەزيدەنتى