قاراعاندى قالاسىندا ەكى جىلدان بەرى «حاديا» اتتى قايىرىمدىلىق دۇكەنى جۇمىس ىستەيدى. مۇندا قالا تۇرعىندارى مۇقتاج جاندارعا دەپ كيىم-كەشەك, ازىق-ت ۇلىك, كەڭسە تاۋارلارىن جانە باسقا دا تۇرمىسقا قاجەتتى زاتتار اكەلىپ وتكىزەدى.
سونداي-اق, دۇكەن ىشىندە قايىرىمدىلىق جاشىك ورناتىلعان. وعان جينالعان قاراجات از قامتىلعان, كوپ بالالى وتباسىلار مەن جالعىزباستى انالاردىڭ تۇرعىن ءۇي تولەمىنە جۇمسالادى.
– ءبىز كوپ بالالى جانە از قامتىلعان وتباسىلارعا, بالالارىن جالعىز ءوسىرىپ وتىرعان انالارعا جانە تۇرمىستىق قيىن جاعدايعا تاپ بولعان مۇقتاج ادامدارعا كومەكتەسەمىز. وسى ماقساتتا قالا تۇرعىندارى مەن كاسىپكەرلەردەن بالالار ءۇشىن زاتتار, ازىق-ت ۇلىك, مەكتەپ زاتتارىن جانە قارجىلاي كومەك قابىلدايمىز, – دەيدى «حاديا» دۇكەنىنىڭ ۇيىمداستىرۋشىسى مارات ءتۇسىپوۆ.
قازىرگى تاڭدا «شىعىس» ساۋدا ءۇيىنىڭ عيماراتىندا ورنالاسقان «حاديا» دۇكەنى ارقىلى 600-گە تامان ادام كومەك العان.
– 2015 جىلدان باستاپ قاراعاندى وبلىسىندا «قمدب زەكەت قورى» كورپوراتيۆتىك قورى جۇمىس ىستەيدى. بۇگىنگى كۇنگە دەيىن قور وكىلدەرى كوپتەگەن مۇقتاج ادامدارعا كومەك كورسەتتى. ەرىكتىلەردىڭ كومەگىمەن «حاديا» قايىرىمدىلىق دۇكەنى اشىلدى. مۇندا كەلە المايتىندارعا ءبىز ازىق-ت ۇلىك پەن زاتتاردى ءوزىمىز اپارىپ بەرەمىز, – دەيدى انەت بابا اتىنداعى مەشىتتىڭ باس يمامى ومىرزاق بەكقوجا.
اتالعان قور قۇرىلعاننان بەرى بىرنەشە وتباسى تۇرعىن ۇيمەن قامتاماسىز ەتىلگەن. جينالعان قاراجات ەسەبىنەن ءۇش جىل بۇرىن سۇرىپتاۋ ستانساسىندا باسپاناسى جانىپ كەتكەن كوپ بالالى وتباسى ءۇشىن ءۇي سالىنىپتى. بۇدان بولەك, بىلتىر ۇيلەرىندە ءورت بولعان ەكى وتباسىنىڭ شاڭىراعىنا جوندەۋ جۇرگىزىلگەن.
– بيىل قور مۇقتاج جاندارعا 200 توننا كومىر ءبولدى. كومەك قاجەت ەتەتىن وتباسىلاردىڭ ءتىزىمىن اكىمشىلىكتەن الامىز. سونداي-اق, ءدارى-دارمەك پەن ەمدەۋ ءۇشىن قاراجات جەتىسپەيتىن نەمەسە مۇلدەم مۇمكىندىگى جوق اۋىر ناۋقاستارعا قول ۇشىن بەرەمىز, – دەيدى وبلىستىڭ باس يمامى.
«حاديا» دۇكەنىندەگى بارلىق زاتتار مەن ونىمدەر مۇقتاج دەپ تانىلعان جاندارعا تەگىن تاراتىلادى. ولار ازىق-ت ۇلىك بەرۋ پۋنكتىنە 3 ايدا ءبىر رەت كەلە الادى. دۇكەندە ءبىر قولعا ءبىر رەت 10 زاتقا دەيىن بەرىلەدى دەگەن تالاپ ورناتىلعان.
قايرات ءابىلدا,
«ەگەمەن قازاقستان»
قاراعاندى