اقتوبە وبلىسى اكىمدىگىندە ءوڭىر باسشىسى بەردىبەك ساپارباەۆتىڭ توراعالىعىمەن وتكەن جيىندا قۇرىلىس جانە تۇرعىن ءۇي – كوممۋنالدى شارۋاشىلىق سالاسىنىڭ 2019 جىلعا ارنالعان مىندەتتەرى تالقىلاندى. بۇل تۋرالى اقتوبە وبلىسى اكىمىنىڭ ءباسپاسوز قىزمەتى حابارلادى.
بيىل كەمىندە 1 ملن تەڭگە شارشى مەتر تۇرعىن ءۇيدى, 8500-گە جۋىق پاتەردى پايدالانۋعا بەرۋ جوسپارلانىپ وتىر. سونىمەن بىرگە, قۇرىلىس, ساۋلەت جانە قالا قۇرىلىسى باسقارماسىنىڭ باسشىسى نۇرلان يمانالين بايانداعانداي, وڭىرگە «بازيس-ا», «BI Group», «Highvill» سىندى ءىرى قۇرىلىس كومپانيالارىن تارتۋ جوسپاردا بار.
جالپى, قۇرىلىس جۇمىستارىنىڭ كولەمى 207,3 ملرد. تەڭگەنى قۇرايدى. ونىڭ ىشىندە 46,9 ملرد تەڭگە بيۋدجەت قاراجاتىنان, 15 ملرد. تەڭگە مەملەكەتتىك—جەكە سەرىكتەستىك جەلىسى بويىنشا, 145,4 ملرد. تەڭگە جەكە ينۆەستيتسيالار ەسەبىنەن جۇزەگە اسىرىلماق. وبلىس باسشىسى قۇرىلىس جوبالارىن جۇزەگە اسىرۋدا ينۆەستورلاردى تارتۋدى, جەكە ينۆەستيتسيالار ۇلەسىن ۇلعايتۋدى تاپسىردى.
سونداي-اق, ءوڭىر باسشىسى مەملەكەتتىك ساۋلەت-قۇرىلىس باقىلاۋ باسقارماسى مەن باسقا دا قۇزىرلى مەملەكەتتىك ورگانداردان ۇزاق مەرزىمدى قۇرىلىس ماسەلەسىن شەشۋدى, جوبالىق-سمەتالىق قۇجاتتامانى ازىرلەۋ جانە بەكىتۋ شارتتارىن وڭتايلاندىرۋدى, قۇرىلىس سالاسىندا ستاندارتتى جوبالاردى كەڭىنەن قولدانۋدى تالاپ ەتتى.
بۇدان باسقا, بەردىبەك ساپارباەۆ جاۋاپتى مەكەمەلەردى قىمبات تۇراتىن الەۋمەتتىك نىسانداردىڭ قۇرىلىسى ءۇشىن سىنعا الدى.
«قۇرىلىس ماتەريالدارىن ۇنەمدەڭىزدەر, بيۋدجەت قاراجاتىن ۇنەمدەڭىزدەر. جەكە قۇرىلىس سالۋشىلاردا قىمباتشىلىق جوق. ال قازىنا ءۇشىن الەۋمەتتىك نىسانداردىڭ قۇرىلىسى جىل سايىن قىمباتقا تۇسۋدە»,- دەدى وبلىس اكىمى.
بۇعان قوسا, ءوڭىر باسشىسى «7-20-25» مەملەكەتتىك باعدارلاماسىنىڭ جۇزەگە اسىرىلۋ قارقىنىنىڭ تومەندىگىنە كوڭىل اۋداردى.
«اقتوبە ءوڭىرى تۇرعىن ءۇيدى مەملەكەتتىك باعدارلامامەن ساتۋدا ارقاشان كوش باسىنداعىلاردىڭ قاتارىندا بولدى, بىراق بيىل التىنشى بولىپ تۇر»,- دەدى جاعدايدى تۇزەتۋمەن اينالىسۋدى تاپسىرعان ب.ساپارباەۆ.
بۇدان باسقا, جاڭا عيماراتتاردىڭ ساۋلەت بەينەسىنە, قاسبەتتەرىن گۇلمەن بەزەندىرۋ جانە زاماناۋي ارلەۋ ماتەريالدارىن پايدالانۋعا ءتيىستى دارەجەدە كوڭىل ءبولۋ تاپسىرىلدى.
وبلىستا «اقىلدى قالا» پيلوتتىق جوباسى بەلسەندى جۇزەگە اسىرىلىپ جاتىر. قازىرگى تاڭدا باعدارلاما اياسىندا «نۇر اقتوبە» شاعىن اۋدانىنداعى ۇيلەر پايدالانۋعا بەرىلىپ, اقتوبە مەن ىرعىز اۋدانىنداعى ەكى ءىرى نىساندا بەينە باقىلاۋ جۇيەلەرى ورناتىلدى. بەردىبەك ساپارباەۆ جاڭعىرتىلىپ جاتقان ەنەرگيا كوزدەرى بويىنشا جوبالاردى كوبەيتۋ كەرەكتىگىنە نازار اۋداردى. كۇن ساۋلەسىنىڭ باتارەيالارىنا, گاز-پىسپەكتى قوندىرعىلاردى بەلسەندىرەك ينۆەستيتسيالاۋدى تاپسىردى.
قالا مەن اۋىلداعى ينجەنەرلىك ينفراقۇرىلىمداردىڭ دامۋى جايلى وبلىستىق ەنەرگەتيكا جانە تۇرعىن ءۇي – كوممۋنالدى شارۋاشىلىق باسقارماسىنىڭ باسشىسى داستان امانوۆ ەسەپ بەردى.
باسقارما مالىمەتى بويىنشا, 2019-2020 جىلدارى 7 مىڭنان اسا حالقى بار 13 ەلدى مەكەن گازداندىرىلماق. جالپى قۇنى 6,3 ملرد تەڭگە بولاتىن 20 گازبەن جابدىقتاۋ جوباسىن جۇزەگە اسىرۋ جوسپارلانىپ وتىر. وبلىستاعى سۋمەن جابدىقتاۋ جۇيەلەرىن دامىتۋدا جەتى اۋىسپالى جانە ءتورت جاڭا جوبانى جالعاستىرۋ ءۇشىن بيىل 2,2 ملرد تەڭگە قاراستىرىلعان.
سونداي-اق, اقتوبە قالاسى مەن وبلىس اۋداندارىنىڭ اكىمدىكتەرىنە وبلىستىڭ بۇكىل جەرىندەگى, اسىرەسە مەكتەپتەردەگى ترانسفورماتورلىق قوسالقى ستانسالاردى قورشاۋ جۇمىستارىن جالعاستىرۋ تاپسىرىلدى.