وڭىردە «سالاماتتى انا مەن بالا» ايلىق-اكتسياسى جالعاسۋدا. وبلىستىق دەنساۋلىق ساقتاۋ باسقارماسى ءباسپاسوز قىزمەتىنىڭ حابارلاۋىنشا, 7 كۇن ىشىندە 1200 كوپبالالى وتباسى (مىڭعا جۋىعى - انا, 2999-ءى – بالا) تەكسەرۋدەن ءوتىپ, دارىگەردەن كەڭەس الىپتى.
ايلىق اياسىندا مەدبيكەلەر, الەۋمەتتىك قىزمەتكەرلەر مەن مەديتسينالىق ۇيىمداردىڭ پسيحولوگتارى ءۇيدى-ءۇيدى ارالاپ, كوپبالالى وتباسىلاردىڭ دەنساۋلىقتارىن تەكسەرۋدە. «ايەلدىڭ ءبىر مىندەتى – ومىرگە ۇرپاق اكەلۋ. بىراق دۇنيەگە بالا اكەلۋ وڭاي ما؟ كوپ كۇش-جىگەر جۇمسايمىز, دەنساۋلىعىمىز السىرەيدى. بالا-بالا دەپ ءجۇرىپ كەيدە ءوزىمىزدىڭ دەنساۋلىعىمىزدى قاراۋعا ۋاقىتىمىزدىڭ بولماي كەتەتىنى راس. دارىگەرلەر ءبىزدىڭ ۇيگە دە كەپ بالالاردى كورىپ كەتتى, ءوزىم ەمحاناعا باردىم», - دەيدى كوكپەكتى اۋىلىنىڭ تۇرعىنى, 7 بالانىڭ اناسى اينۇر نۇرپەيىسوۆا.
اكتسيا اياسىنداعى ءبىر اپتادا 1 مىڭ انادان 375 تىنىس الۋ ورگاندارى مەن گينەكولوگيالىق دەرت بەلگىلەرى انىقتالىپتى. بالالار اراسىندا تىنىس ورگاندارى اۋرۋلارى 52 پروتسەنتتى قۇراپتى. ولارعا امبۋلاتورلىق جانە ستاتسيونارلىق ەم تاعايىندالىپتى.
ەستەرىڭىزگە سالا كەتەيىك, «سالاماتتى انا مەن بالا» ايلىق-اكتسياسى وبلىستا 12 اقپاندا باستالعان بولاتىن. 12 ناۋرىزعا دەيىن جالعاساتىن اكتسيا اياسىندا ءتورت جانە ودان كوپ بالالارى بار وتباسىلاردىڭ مۇشەلەرى تۇرعىلىقتى جەرلەرى بويىنشا ديسپانسەرلىك جانە الدىن الۋ تەكسەرۋلەرىنەن ءوتىپ, كونسۋلتاتسيالىق كومەكتەر الادى.
ازامات قاسىم,
«Egemen Qazaqstan»
شىعىس قازاقستان وبلىسى