ءبىلىم جانە عىلىم مينيسترلىگى 2018 جىلى اتقارىلعان جۇمىستارىن قورىتىندىلاپ, الداعى جوسپارلارىمەن ءبولىستى. القالى جيىنعا پرەزيدەنت اكىمشىلىگىنىڭ وكىلدەرى, پارلامەنت دەپۋتاتتارى, ءبىلىم سالاسىنىڭ قىزمەتكەرلەرى قاتىستى.
وسىعان وراي, ورتالىق كوممۋنيكاتسيالار قىزمەتىندە وتكەن بريفينگتە پارتيا توراعاسىنىڭ ءبىرىنشى ورىنباسارى ماۋلەن اشىمباەۆ اتالعان باعىتتاعى باستامالارعا توقتالىپ, كەڭەس اياسىندا جۇمىسىن باستاعان بىرىڭعاي الەۋمەتتىك تەرەزە جۇيەسى مەن مۇقتاج ازاماتتارعا كومەك كورسەتۋدى جەتىلدىرۋدىڭ ءتيىمدى تەتىكتەرى تۋرالى ايتتى. سونداي-اق ول بالالار قۇقىعىن قورعاۋ ماسەلەسىندە مەملەكەتتىك ورگانداردىڭ, ۇكىمەتتىك ەمەس ۇيىمداردىڭ جانە ەرىكتىلەردىڭ قىزمەتىن ۇيلەستىرۋدەگى پارتيانىڭ رولىنە نازار اۋداردى.
ءىس-شارا بارىسىندا ماۋلەن اشىمباەۆ ەلىمىزدە مەملەكەت باسشىسىنىڭ تاپسىرماسىمەن الەۋمەتتىك سالانى دامىتۋ ماقساتىندا اۋقىمدى جۇمىستار اتقارىلىپ جاتقانىن ايتتى. سونىمەن قاتار ول حالىققا كورسەتىلىپ كەلە جاتقان مەملەكەتتىك الەۋمەتتىك كومەك تۇرلەرىنە نازار اۋداردى. «ەلباسىنىڭ تاپسىرماسىمەن مەملەكەت تاراپىنان قوعامداعى الەۋمەتتىك ماسەلەلەردى وڭ شەشۋگە باعىتتالعان اۋقىمدى جۇمىستار اتقارىلۋدا. مەملەكەت باسشىسىنىڭ بەس الەۋمەتتىك باستاماسى مەن سوڭعى جولداۋىندا دا حالىقتىڭ ءال-اۋقاتىن جاقسارتىپ, تۇرمىس ساپاسىن ارتتىرۋعا باسىمدىق بەرىلگەنى بەلگىلى. اتاپ ايتقاندا, جولداۋدا ەلباسى باسپانانىڭ قولجەتىمدىلىگىن قامتاماسىز ەتۋ, تاريفتەردى شەكتەۋ, ەڭ تومەنگى جالاقى كولەمىن ءوسىرۋ, مەديتسينالىق قىزمەت ساپاسىن ارتتىرۋ جانە تاعى باسقا دا ناقتى ماسەلەلەرگە نازار اۋدارىپ, ءتيىستى تاپسىرمالار بەردى. بۇگىندە سول باعىتتار بويىنشا مەملەكەتتىك ورگاندار جۇيەلى جۇمىس جۇرگىزۋدە», – دەدى ماۋلەن اشىمباەۆ.
سونىمەن قاتار بۇگىندە كوپ بالالى وتباسىلارعا قولداۋ كورسەتۋ ىسىندە دە ايتارلىقتاي جۇمىس ىستەلگەنىنە نازار اۋدارعان پارتيا توراعاسىنىڭ ءبىرىنشى ورىنباسارى وتكەن جىلى تەك رەسپۋبليكالىق بيۋدجەت پەن الەۋمەتتىك ساقتاندىرۋ قورىنان بالالارى بار وتباسىلارعا قولداۋ كورسەتۋ ءۇشىن 311 ملرد تەڭگە بولىنگەنىن تىلگە تيەك ەتتى.
مەملەكەتتىك قولداۋدىڭ تەك الەۋمەتتىك جاردەماقىلارمەن شەكتەلمەيتىنىن ايتقان ماۋلەن اشىمباەۆ باسقا دا ناقتى كومەكتەرگە توقتالىپ ءوتتى. «مۇقتاج جاندارعا جەرگىلىكتى اتقارۋشى ورگاندار تاراپىنان دا ايتارلىقتاي الەۋمەتتىك كومەكتەر كورسەتىلىپ كەلەدى. ماسەلەن, وڭىرلەردە تۇرعىن ءۇي تولەمدەرى, ەسەپتەگىش قۇرالدارىن ورناتۋ تولەمدەرى, مەكتەپتەردە بالالاردى ىستىق تاماقپەن قامتاماسىز ەتۋ, از قامتىلعان وتباسىلار ءۇشىن بالاباقشامەن قامتۋعا بايلانىستى تولەمدەر سياقتى ناقتى قولداۋلار بار», – دەگەن پارتيا توراعاسىنىڭ ءبىرىنشى ورىنباسارى مۇنداي الەۋمەتتىك كومەكتەر الداعى ۋاقىتتا دا جالعاساتىنىن جەتكىزدى.
وسى رەتتە ماۋلەن اشىمباەۆ ودان باسقا دا ورتالىق جانە جەرگىلىكتى اتقارۋشى ورگاندار ارقىلى جۇزەگە اسىرىلاتىن ءتۇرلى تەتىكتەرگە كوڭىل ءبولدى. بۇل جۇمىستاردىڭ بارلىعىن ورتاق جۇيەگە كەلتىرۋ ءۇشىن «باقىتتى وتباسى» پارتيالىق جوباسى قايتا جانداندى. بۇل جوبا از قامتىلعان كوپ بالالى وتباسىلارعا جۇيەلى قولداۋ كورسەتۋگە باعىتتالعان». بۇگىندە كوپتەگەن قازاقستاندىق وتباسىلاردىڭ زاڭ بويىنشا وزدەرىنە تيەسىلى كومەكتى الا الماي وتىرعانى بايقالادى. سول سياقتى جەرگىلىكتى اتقارۋشى ورگاندار تاراپىنان دا بەرىلەتىن كومەكتەن قاعىلىپ وتىرعان وتباسىلار بار. وعان بيۋروكراتيالىق كەلەڭسىزدىكتەردەن باستاپ, جاي عانا كوڭىل بولمەۋگە دەيىنگى ءتۇرلى جايتتار سەبەپ. سوندىقتان پارتيا اتالعان كەڭەس اياسىندا ەلىمىز بويىنشا بىرىڭعاي الەۋمەتتىك تەرەزە جوباسىن قولعا الدى. بۇل جوبا پارتيانىڭ قوعامدىق قابىلداۋ بولمەلەرى ارقىلى قىزمەت كورسەتەدى. ول جەردە كوپ بالالى جانە از قامتىلعان وتباسىلار مەن مۇقتاج ازاماتتارعا مەملەكەت پەن جەرگىلىكتى بيۋدجەتتەن بەرىلەتىن وزدەرىنە تيەسىلى الەۋمەتتىك كومەكتەر تۋرالى ناقتى كەڭەستەر الۋعا مۇمكىندىك بار. ءبىزدىڭ قىزمەتكەرلەرىمىز تەك اقپارات بەرىپ قانا قويماي, ءىستىڭ سوڭىنا دەيىن جەتكىزىلۋىن قاداعالايدى», – دەدى «نۇر وتان» پارتياسى توراعاسىنىڭ ءبىرىنشى ورىنباسارى.
قازىرگى تاڭدا پارتيانىڭ ەلىمىز بويىنشا 230-عا جۋىق قابىلداۋ بولمەسى بار. ياعني, اتالعان الەۋمەتتىك تەرەزە سولاردىڭ بارلىعىندا اشىلادى. وندا كوپ بالالى انالاردى جۇمىسپەن قامتۋ, قايتا وقىتۋ, بالالاردى بالاباقشا مەن مەكتەپتەرگە ورنالاستىرۋ, زاڭگەرلىك كەڭەستەر سياقتى باسقا دا كوپتەگەن قولداۋلار مەن قىزمەتتەر كورسەتىلەدى. سونىمەن بىرگە اتالعان الەۋمەتتىك تەرەزەلەر ارقىلى مۇقتاج جاندارعا كومەكتەسكىسى كەلەتىن ۇكىمەتتىك ەمەس ۇيىمدار مەن كاسىپكەرلەرگە دە مول مۇمكىندىكتەر تۋماق. ناقتى ايتقاندا, پارتيانىڭ قابىلداۋ بولمەلەرىندە كومەككە ءزارۋ وتباسىلاردىڭ ءتىزىمى جاساقتالادى. بۇدان باسقا, «باقىتتى وتباسى» جوباسى اياسىندا الەۋمەتتىك قورعاۋ ورگاندارىمەن جانە اكىمدىكتەرمەن بىرلەسىپ ءۇي-ءۇيدى ارالاۋ ءىسى قولعا الىنىپ وتىر.
ءوز كەزەگىندە بريفينگكە قاتىسقان «نۇر وتان» پارتياسى جانىنداعى بالالار قۇقىعىن قورعاۋ جونىندەگى رەسپۋبليكالىق كەڭەس توراعاسىنىڭ ورىنباسارى دينارا زاكيەۆا كەڭەستىڭ جۇمىسى مەن ونىڭ باعىتتارى تۋرالى ەگجەي-تەگجەيلى ايتىپ بەردى. ال ەڭبەك جانە حالىقتى الەۋمەتتىك قورعاۋ مينيسترلىگى ەڭبەك, الەۋمەتتىك قورعاۋ جانە كوشى-قون كوميتەتى توراعاسىنىڭ ورىنباسارى دامەجان سادۋاقاسوۆا مەملەكەت تاراپىنان كورسەتىلەتىن الەۋمەتتىك كومەكتەرگە كەڭىنەن توقتالدى.
ايتا كەتەرلىگى, «نۇر وتان» پارتياسى جانىنداعى بالالار قۇقىعىن قورعاۋ جونىندەگى رەسپۋبليكالىق كەڭەس ەلباسى تاپسىرماسىمەن 2019 جىلدىڭ 7 اقپانىندا قۇرىلدى. اتالعان كەڭەس ارقىلى «نۇر وتان» كوپ بالالى وتباسىلارعا قولداۋ كورسەتۋدى ايتارلىقتاي ارتتىرىپ, وسكەلەڭ ۇرپاقتىڭ قۇقىقتارى مەن زاڭدىق مۇددەلەرىن قورعاۋ ءىسىن قايتا قاراۋدى كوزدەپ وتىر. جاڭا كونسۋلتاتيۆتىك-كەڭەسشى ورگاننىڭ قۇرامىندا پارلامەنت ءماجىلىسىنىڭ دەپۋتاتتارى, مەملەكەتتىك ورگاندار مەن ۇكىمەتتىك ەمەس ۇيىمدار وكىلدەرى, سالالىق ساراپشىلار جانە قوعام قايراتكەرلەرى بار.
سەرىك ابدىبەك,
«Egemen Qazaqstan»