مەزگىل جاز ايى. شىلىڭگىر شىلدە. كۇن ىسىپ تۇر. جايىق پەن شاعان وزەندەرىنىڭ قيىلىسقان جەرىندە سۋعا شومىلۋشىلار كوپ. بۇل تۇستىڭ استى دا, جاعاسى قۇمايت. اعىسى باسەڭ. جاعاجايى دا ۇلكەن-كىشىنىڭ تۇسۋىنە ىڭعايلى. بىردەن اعىزىپ اكەتپەيدى. قيىلىستىڭ ارعى جاعى مەن بەرگى جاعى كوككە بوي سوزعان ءزاۋلىم بايتەرەكتەر. شىلىكتەر مەن جەيدەلەر. سول دەمالۋشىلاردىڭ ءبىرى ەدىم. سۋعا ءبىر قۇلاشتاپ ءجۇزىپ كەلدىم دە, جاعاجايعا شىعىپ, كۇنگە ءسال قىزدىرىنىپ العاندى ءجون كوردىم. ەت بەتىمنەن جاتقان كۇيىمدە قالعىپ كەتىپپى. ءبىر كەزدە ءوز-وزىمنەن سەلك ەتە ءتۇسىپ, باسىمدى كوتەرىپ وتىرا قالدىم دا شىلىك جاققا كوز تاستادىم.
و, توبا, جۋاندىعى باس بارماقتىڭ ۇلكەندىگىندەي, ۇزىندىعى ەكى ەلى ءنان قارا باس جىلان ءتىلىن سۇيرەكتەتىپ تۇپ-تۋرا ماعان قاراي يرەلەڭدەپ كەلەدى ەكەن. جالما-جان ۇشىپ تۇرەگەلدىم. وسى ساتتە ارامىزدا ءبىر مەتردەي عانا جەر قالىپتى. جىلان قالت تۇرا قالدى دا ساناۋلى سەكۋنتاردىڭ ىشىندە باسىن كۇرت كەرى بۇرىپ, جورعالاي جونەلدى. ارتىنان قۋمادىم. تيىسپەدىم. كىم بىلەدى, ءدال سول ارادا اياق استىنان تاس پەن تاياق تابىلا قالعاندا كەسەكتەر مە ەدىم, قاق باسىنان سىلەيتىپ ۇرار ما ەدىم.
ويلانىپ قالدىم, اپىرماي جىلان ادامدارعا وزدىگىنەن تيىسپەيدى, ۋى مەن ءزارىن شاشپايدى دەمەيتىن بە ەدى. بۇل تىرشىلىك يەلەرى وزدەرىنە ادامدار قاۋىپ توندىرگەندە عانا قورعانىس امالىنا كوشىپ, ونى شاعىپ الۋعا ارەكەتتەنۋى باسقا امالىنىڭ جوقتىعىنان دەگەندى دە ەستىگەنبىز. سوندا قالاي بولعانى؟
مەن جىلانعا وزدىگىمنەن تيىسكەن جوقپىن عوي. جىلان كەرى كەتكەن سوڭ جاتقان جەرىمنىڭ ءبىر جاق جانىنان ۋلى جاندىك –بۇيەنىڭ قۇم بەتىنە تىرمىسىپ جاتقانىن كوزىم شالىپ قالدى. سوندا قالاي, جىلان مەنىڭ قۇتقارۋشىم بولعانى ما؟ جوق, الدە قاراباس جىلان قالعىپ كەتكەن كەزىمدى پايدالانىپ, قوينىما جايعاسىپ ءتىلىنىڭ ءبىزىن سۇققىسى كەلدى مە ەكەن؟ الدە باۋىرىمەن جورعالاۋشى بۇيەنى نىساناعا الدى ما ەكەن؟بۇعان ءالى كۇنگە دەيىن كوزىم انىق جەتپەيدى.
تەمىر قۇسايىن,
«Egemen Qazaqstan»
اقتوبە