ەگەر گاز, جىلۋ, سۋ جانە ەلەكتر قۋاتى سەكىلدى الەۋمەتتىك ءمانى مەن ماڭىزى جوعارى كوممۋنالدىق قىزمەت تاريفتەرى نەگىزسىز كوتەرىلسە, مۇنداي جاعداي تۇرعىنداردىڭ ورىندى وكپە-رەنىشتەرىن تۋعىزۋى ابدەن مۇمكىن.
جاڭا جىلدان باستاپ اقتوبە ايماعىندا بۇعان كەرىسىنشە جاعىمدى جاعداي ورىن الىپ وتىر. ياعني جوعارىدا اتالعان حالىققا كورسەتىلەتىن كوممۋنالدىق قىزمەت تۇرلەرى بەستەن ون پايىزعا دەيىن ارزاندادى. اسىرەسە گاز بەن جىلۋ تاريفتەرىنىڭ ەداۋىر تومەندەۋى تۇرعىنداردىڭ جىلى ىقىلاسىنا يە بولىپ, ريزاشىلىق سەزىمدەرىن تۋعىزدى. سونىمەن بىرگە كوممۋنالىق قىزمەتتىڭ وزگە تۇرلەرى –سۋ, سونداي-اق كارىز ۇيەلەرى اعىندى سۋلارى مەن ليفت, پاتەر يەلەرى كووپەراتيۆتەرى, دوموفون, قوقىس شىعارۋ قىزمەتتەرىن پايدالانعانى ءۇشىن دە اقتوبەلىكتەر بۇعان دەيىنگى كەزبەن سالىستىرعاندا از تولەم تولەي باستادى.
بۇعان قالاي قول جەتتى؟ ياعني بۇل ءۇشىن وتكەن جىلى وڭىردە مەملەكەتتىك مەكەمەلەر مەن مونوپولياعا قارسى قىزمەت جانە پروكۋراتۋرا ورگاندارى وكىلدەرىن توعىستىراتىن ارنايى جۇمىس توبى قۇرىلدى. ولار دەرەۋ ىسكە كىرىسىپ, كوممۋنالدىق كاسىپورىندارداعى ارتىق شىعىنداردى الىپ تاستاۋعا قول جەتكىزدى. سودان سوڭ حالىققا قىزمەت كورسەتۋدىڭ اقىرعى قۇنىن انىقتاۋعا كۇش سالدى. ءسويتىپ, ارتىق-كەمى جوق ءاربىر ءتاريفتىڭ وزىندىك قۇنى بەلگىلى بولدى. مۇنداي جۇمىستار كوممۋنالدىق قىزمەتتەردىڭ ارلىق تۇرلەرى بويىنشا جۇرگىزىلدى, -دەدى بۇل جونىندە گازەت تىلشىسىنە اقتوبە قالاسىنىڭ اكىمى ءىلياس يسپانوۆ.
قازىرگى كۇنى كوممۋنالدىق قىزمەت تۇرلەرى باعالارىنىڭ تومەندەگەنىن اقتوبەلىكتەر سەزىنىپ وتىرعان سىڭايلى. مىنە, وڭىردە تاريفتەردى ءتۇسىرۋ جونىندە اتقارىلعان جۇمىستاردىڭ باستى ناتيجەلەرى وسىنداي. مۇندايدا بارەكەلدى دەمەگەندە نە دەمەكپىز!
تەمىر قۇسايىن,
«Egemen Qazaqstan»
اقتوبە