مادەنيەت جانە سپورت ءمينيسترى ارىستانبەك مۇحامەدي ۇلى اقش-تاعى The World's best حالىقارالىق تالانتتار شوۋىنا قاتىسىپ جاتقان قازاقستاندىق تانىمال جۇلدىزدار ديماش قۇدايبەرگەن مەن دانەليا تولەشوۆاعا ساتتىلىك تىلەدى.
قازاقستاندىق انشىلەرگە دەگەن جۇرەكجاردى لەبىزىن مينيستر ءوزىنىڭ فەيسبۋكتەگى پاراقشاسىنا جاريالادى.
«دوستارىم, اقش-تا The World's best حالىقارالىق تالانتتار شوۋى جالعاسۋدا, وندا ەلىمىزدىڭ ەكى ءانشىسى - ديماش قۇدايبەرگەن مەن دانەليا تولەشوۆا باق سىناۋدا. ديماش قۇدايبەرگەننىڭ التى وكتاۆالى داۋىسى - شىنىمەن دە بىرەگەي قۇبىلىس. ديماشتى العاش رەت ەستىپ, ونىڭ عاجاپ دارىن ەكەنىن تۇسىنگەن ءسات ءالى ەسىمدە. قازىرگى تاڭدا ديماشقا جەتەتىن ءانشى جوق, ونىڭ ۆوكال كونكۋرستارىنا قاتىسۋى - باسقالاردىڭ مۇمكىندىكتەرىن كورىپ, ساحنالىق داعدى قالىپتاستىرۋ جولىنداعى انشىلىك تاجىريبە جيناۋ كەزەڭدەرى. سول سەبەپتى ءبىز ونىڭ وسى كونكۋرسقا قاتىسۋىنا اتسالىستىق», دەيدى مينيستر.
ونىڭ ايتۋىنشا, 12 جاسار دانەليا تولەشوۆا دا ءوزىنىڭ ۆوكالدىق قابىلەتىمەن تاڭقالدىرۋدا. ونىڭ تالانتى وزىمەن بىرگە ءوسىپ كەلە جاتىر دەسە دە بولادى. ءالى بالعىن بالا بولسا دا, دانەليا ۇلكەن ساحناعا جاسقانباي شىعىپ, تىڭدارماندى اۋزىنا قاراتىپ, كوزىنەن جاس شىعارىپ, اندەرىن وتە اسەرلى ورىندايدى.
«قىزدارىنىڭ ەرەكشە دارىنىن دامىتۋعا بارىن سالىپ جۇرگەن دانەليانىڭ اتا-اناسىنا العىسىم زور. كونكۋرستا ونىڭ داۋىسىن فەنومەن دەپ جاتىر, بۇل راسىندا دا سولاي. قازىلاردىڭ داۋىس بەرۋ ناتيجەسىنە كەلسەك, الۋعا مۇمكىن 100 ۇپايدان ديماش - 98, دانەليا 96 ۇپاي جينادى. كەز كەلگەن كونكۋرس قاتىسۋشىلارى ءۇشىن سترەسس ەكەنى بەلگىلى. ءبىزدىڭ دارىندارىمىز قانداي ناتيجەمەن ورالسا دا, ولار ءبىز ءۇشىن The World's best بولىپ قالا بەرمەك, دوستارىم. ديماش ءوزىن الەمگە مويىنداتىپ ءجۇر, ال جاس تالانت, جۇلدىزىمىز دانەليانى زور بولاشاق كۇتىپ تۇر! ءبىز سەندەردى جاقسى كورەمىز! جولدارىڭ بولسىن! تەك قانا العا!», دەپ اياقتاعان مينيستر جاس دارىندارعا دەگەن ىزگى تىلەگىن.