امەريكالىق كاسىپكەر جانە پروموۋتەر ريك گلەيزەر قازاقستاندىق بوكسشى گەننادي گولوۆكيننىڭ باسىنداعى جاعداي تۋرالى از-كەم پىكىر ءبىلدىرىپتى. وتىز جىلداي كاسىپقوي بوكستىڭ وتىمەن كىرىپ, ك ۇلىمەن شىعىپ جۇرگەن ماماننىڭ سوزىنە سپورت قوعامداستىعى قۇلاق تۇرە قالعان.
«مەنىڭ ويىمشا, GGG - گولوۆكيننىڭ كاسىپقوي بوكس تۋرالى تۇسىنىگى سونشالىقتى تەرەڭ ەمەس. بۇل – ونىڭ باسىنداعى پروبلەمالاردىڭ ەڭ ۇلكەنى بولۋى ابدەن مۇمكىن. مەنىڭشە, ول زەينەتكەرلىككە كەتۋ تۋرالى ويلانىپ جۇرگەن سياقتى» دەيدى ينسايدەر.
ريك گلەيزەر بوكسشى گولوۆكيننىڭ بۇرىنعى مەنەدجەرلەرىمەن سوتتاسىپ جاتقانىن دا تىلگە تيەك ەتىپ, بۇل جاعدايدىڭ سپورتشىنى قاتتى مازالاپ ءجۇرۋى مۇمكىن ەكەندىگىن ايتقان.
ەسكە سالا كەتسەك, اتاقتى بوكسشى ءوزىنىڭ ەكس-مەنەدجەرلەرى – ماكسيم جانە ولەگ گەرمانداردى سوتقا بەرگەن بولاتىن. گولوۆكيننىڭ ايتۋىنشا, اعايىندى گەرماندارمەن اراداعى قارىم-قاتىناسقا 2017 جىلى نۇكتە قويىلعان ەكەن. سوعان قاراماستان, ەكس-مەنەدجەرلەر زاڭسىز, ليتسەنزيالانباعان قارىم-قاتىناستى پايدالانىپ, الۆارەس پەن گولوۆكين اراسىنداعى ەكىنشى جەكپە-جەكتەن اقشا قارپىپ قالۋعا ارەكەتتەنگەن.
GGG سوتتان ءوزىنىڭ پايداسىنا گەرماندارمەن بۇرىن جاسالعان مامىلەلەردەن 3,5 ملن دوللار ءوندىرىپ بەرۋدى سۇراعان.
قايرات ءابىلدا,
«ەگەمەن قازاقستان»
قاراعاندى