قاراعاندى وبلىستىق ن.گوگول اتىنداعى امبەباپ عىلىمي كىتاپحانانىڭ «امەريكاندىق بۇرىشىندا» «NASا» استرونوميا اۋەسقايلارى كلۋبىنىڭ العاشقى كەزدەسۋى ءوتتى.
كىتاپحانانىڭ اكت زالىنا لىق تولعان اۋەسقويلار الدىندا كەزدەسۋدىڭ مودەراتورى دامير كارىموۆ استرونوميالىق بىرلىكتەر, مەتەوريتتەر مەن مەتەورلار اراسىنداعى ايىرماشىلىقتار تۋرالى, سيريۋستىڭ ەرەكشەلىگى جانە عارىش الەمىنە قاتىستى باسقا دا تارتىمدى تاقىرىپتار بويىنشا قىزىقتى ۆيكتورينا ۇيىمداستىردى. سۇراق-جاۋاپ ويىنى بارىسىندا بىلىمپازدىعىمەن كوزگە تۇسكەن جاستارعا ەستەلىك سىيلىقتار تابىس ەتىلدى.
سونىمەن قاتار, دامير كارىموۆ تەلەسكوپ تاڭداۋ كەزىندە ەسكەرەتىن بىرنەشە جايت تۋرالى كەڭەس بەردى.
– كوپ ادام تەلەسكوپ ۇزىن بولسا, سوعۇرلىم جۇلدىزداردى جاقىنداتىپ كورسەتەدى دەپ ويلايدى. مۇلدە ولاي ەمەس. شىندىعىنا كەلگەندە, ماسەلە – تەلەسكوپتىڭ لينزاسىندا. مىسالى, فيزيكادا مىناداي ەرەكشەلىك بار: لينزانىڭ ديامەترى ۇلكەن بولعان سايىن, ول جارىقتى كوبىرەك جۇتادى. ەگەر سالىستىرار بولساق, ادام كوزىنىڭ قاراشىعى 10 مم بولسا, وندا ول 5 مىڭعا جۋىق جۇلدىزدى كورە الادى. ال تەلەسكوپتىڭ ديامەترى 200 مم بولاتىن لينزاسىنىڭ كومەگىمەن ميلليوننىڭ شاماسىنداعى عارىش دەنەلەرىن تاماشالاۋعا بولادى, – دەيدى ول.
كەزدەسۋگە قاتىسۋشىلار استرونوميا جانە فيزيكا عىلىمدارى تۋرالى كىرىسپە ءدارىس تىڭداعاننان كەيىن, ءتۇرلى تەلەسكوپتاردى تاماشالاپ, ولاردى ءىس جۇزىندە سالىستىرۋ مۇمكىندىگىنە يە بولدى.
شارانى ۇيىمداستىرۋشىلار قاراعاندىلىق ورەندەردىڭ عارىش الەمى مەن وعان قاتىستى دۇنيەلەرگە دەگەن قىزىعۋشىلىقتارىنىڭ كۇننەن كۇنگە ارتىپ كەلە جاتقانىن ايتادى. اتالعان شارانى ۇيىمداستىرۋشىلاردىڭ ءبىرى, «American corner» ۇيلەستىرۋشىسىنىڭ كومەكشىسى شۇعىلا ساعىنبەكوۆا الداعى ۋاقىتتا مۇنداي كەزدەسۋلەردى ايىنا ەكى رەت وتكىزىپ تۇرۋ جوسپارلانعانىن ءمالىم ەتتى.
قايرات ءابىلدا,
«ەگەمەن قازاقستان»
قاراعاندى