وڭىردە قازىرگى تاڭدا 63,5 مىڭ ادام ءتۇرلى الەۋمەتتىك كومەك الىپ وتىر. 2018 جىلى ولاردىڭ ءومىر ساپاسىن جاقسارتۋعا 5,4 ملرد تەڭگە جۇمسالعان.
- بۇدان بولەك, مەملەكەت وڭىردەگى 12,6 مىڭ كوپبالالى وتباسىنا كومەكتەسۋ ءۇشىن كەشەندى شارالاردى جۇرگىزىپ وتىر, - دەدى التاي كولگىنوۆ حالىقپەن جۇزدەسۋىندە.
باتىس قازاقستان وبلىسىندا «التىن القا» جانە «كۇمىس القا» العان 7684 انا بار. ودان بولەك, 4954 انا 4 جانە ودان دا كوپ بالا تاۋىپ, تاربيەلەپ وتىر.
«مەكتەپكە جول», «قامقور» اكتسيالارى اياسىندا بىلتىر وقۋ جىلى قارساڭىندا از قامتىلعان وتباسىلاردىڭ 32 مىڭ ۇل-قىزى 204 ملن تەڭگە كولەمىندە ماتەريالدىق كومەك العان. 12 مىڭ وقۋشىعا مەكتەپ فورماسىن الۋعا 68 ملن تەڭگە قارجى بولىنگەن. جازعى لاگەرلەردە 3,5 مىڭ وقۋشى دەمالدى.
باتىس قازاقستان وبلىسى – ەلىمىز بويىنشا 1-4 سىنىپ وقۋشىلارىن تۇگەلدەي ىستىق تاماقپەن قامتاماسىز ەتىپ وتىرعان جالعىز ءوڭىر.
- دەگەنمەن وڭىردە كوپبالالى وتباسىلار ءۇشىن شەشىلمەگەن ماسەلەلەر بار, - دەدى التاي كولگىنوۆ. – سوڭعى كۇندەرى 2 مىڭداي اداممەن كەزدەستىك, ولاردىڭ ءبارىنىڭ مۇڭ-مۇقتاجىن تىڭداپ, باقىلاۋعا الىپ وتىرمىز. مەملەكەتىمىز ۇنەمى الەۋمەتتىك جاعدايى تومەن ءارى كوپ بالالى وتباسىلارعا قولداۋ كورسەتىپ كەلەدى. ءبىزدىڭ قوعام ولاردى ەشقاشان شەتتەتكەن ەمەس. ويتكەنى, وتباسى قوعامنىڭ جاي عانا ءبىر بولىگى ەمەس, بۇكىل مەملەكەتتىڭ نەگىزى. سوندىقتان وڭىرىمىزدە ءداستۇرلى «مەيىرىمدى كوكتەم» جوباسىن جۇزەگە اسىرۋدى ۇسىنىپ, بارلىعىن بەلسەندى قاتىسۋعا شاقىردىم. اتالعان جوبا كوپ بالالى وتباسىلاردى جانە مۇمكىندىگى شەكتەۋلى جانداردى قولداۋعا باعىتتالعان. «مەيىرىمدى كوكتەم» اياسىندا ۇيىمداستىرۋ ورتالىعى قۇرىلادى. بۇدان بولەك وبلىستا وسى ساناتتاعى ازاماتتارعا كەڭەس بەرۋ, الەۋمەتتىك, قۇقىقتىق جانە ماتەريالدىق كومەك كورسەتۋگە باعىتتالعان مىڭنان استام ءتۇرلى ءىس-شارا وتكىزىلەدى. ءبىزدىڭ مىندەتىمىز – جۇيەلى تۇردە جەكەلەي جانە ءار وتباسىعا قولداۋ كورسەتۋ, - دەدى التاي كولگىنوۆ.
ءوڭىر باسشىسىنىڭ ايتۋىنشا, جاعدايى تومەن ءارى كوپ بالالى وتباسىلاردىڭ الەۋمەتتىك جاردەماقى, ءبىلىم سالاسىنا قاتىستى تۇيىتكىلدەر, جۇمىسپەن قامتۋ, تۇرعىن ءۇي جانە باسقا دا ماسەلەلەرى جۇيەلى شەشىلۋى ءتيىس. قازىردىڭ وزىندە جەرگىلىكتى بيۋدجەتتىڭ بارلىق كىرىس-شىعىسىن ەسەپتەۋ ارقىلى قوسىمشا 500 ملن تەڭگەنى الەۋمەتتىك جاعدايى تومەن ءارى كوپ بالالى وتباسىلاردىڭ ماسەلەلەرىن شەشۋگە ارناۋعا شەشىم قابىلدانعان.
قازبەك قۇتتىمۇرات ۇلى,
«Egemen Qazaqstan»
باتىس قازاقستان
سۋرەتتى تۇسىرگەن رافحات حالەلوۆ