قاراعاندى وبلىسىنداعى قىزىلجار اۋىلىندا ءبىر جىل بۇرىن كۇردەلى جوندەۋدەن وتكەن مەكتەپ جابىلىپ قالدى. سەبەپ – مۇندا بالا وقىتۋ ءتىپتى دە مۇمكىن ەمەس ەكەن: عيماراتتىڭ قابىرعالارى قاقىراپ, سىزدىڭ سالدارىنان ەدەنى ءشىري باستاعان.
80 ميلليوننان استام تەڭگەگە ساپاسىز جوندەۋ جۇرىگىزىلگەن ءبىلىم وشاعى جابىلعاننان كەيىن, ونداعى بالالار 10 شاقىرىم جەردەگى كورشى اۋىلدىڭ مەكتەبىنە قاتىناپ وقىپ ءجۇر.
قىزىلجار مەكتەبىندە بالا وقىتۋ, جۇمىس ىستەۋ ءتىپتى دە مۇمكىن ەمەس دەگەندى ايتادى پەداگوگ ماماندار. ويتكەنى, كەيىنگى كەزدەرى بالالار اراسىندا قىشىما قوتىرعا ۇقساس بەلگىلەرى بار اۋرۋ تۇرلەرى پايدا بولعان. ۇستازدار دا ءتۇرلى دياگنوزبەن بىرىنەن سوڭ ءبىرى اۋرۋحاناعا تۇسە باستاپتى.
جەرگىلىكتى بيلىك كۇردەلى جوندەۋ جۇرگىزگەن مەردىگەر فيرما ءوز بىلىعىن جويۋ ءۇشىن ءبىر اي ۋاقىت سۇراعانىن ايتادى.
– مەردىگەرلەر اعاش ەدەندى الىپ تاستاپ, ورنىنا بەتون قۇيامىز دەيدى. نەگىزى ولاردىڭ جەتى جىلعا بەرگەن كەپىلدەمەسى بار, ءبارىن دە رەتتەيمىز دەپ وتىر. جۇمىس بىتكەننەن كەيىن سانەپيدستانسا قىزمەتكەرلەرىن شاقىرامىز. ەگەر ولار رۇقسات بەرمەسە, وندا بالالاردى كورشى اۋىلعا تاسىپ وقىتا بەرۋدەن باسقا امال جوق, – دەيدى بۇقار جىراۋ اۋداندىق ءبىلىم ءبولىمى جەتەكشىسىنىڭ مىندەتىن اتقارۋشى ايدار وسپانوۆ.
قايرات ءابىلدا,
«ەگەمەن قازاقستان»
قاراعاندى وبلىسى