ەسكەك ەسۋ سپورتىندا جەرلەستەرىمىز ازيا ويىندارى, قۇرلىق بىرىنشىلىگى جانە باسقا دا حالىقارالىق دودالاردا سان مارتە دارالانعانىمەن, الەمدىك دەڭگەيدەگى جارىستاردا جەڭىس تۇعىرىنا كوتەرىلە الماي ءجۇر. ماسەلەن, دۇنيەجۇزىلىك دودادا جومارت ساتىبالدين عانا جۇلدەگە قول جەتكىزدى. 2005 جىلى زاگرەبتە وتكەن جارىستا 200 مەترگە كانوە ەسكەن ول قولا مەدالدى كەۋدەسىندە جارقىراتتى. ال قايسار نۇرماعانبەتوۆ افينى وليمپياداسىندا 500 جانە 1000 مەترلىك قاشىقتىقتا سايىسقا ءتۇسىپ, ەكى رەتىندە بەسىنشى ورىنعا تابان تىرەدى. مىنە, ايتۋلى جارىستاردا وتانداستارىمىزدىڭ ەڭ ۇزدىك ناتيجەلەرى وسى عانا.
اتالمىش سپورت ءتۇرىن سەرىك ەتكەن قانداستارىمىزدىڭ اراسىندا ءانۋار اقچۋرين ەسىمدى قانداسىمىزدىڭ سوڭعى كەزدەرى ورەلى ونەرىمەن كوزگە ءتۇسىپ جۇرگەنىن جانكۇيەرلەر جاقسى بىلەدى. ونىڭ اكەسى ايسۇلتان دا كەزىندە ەسكەك ەسۋمەن اينالىسقان. رەسەيدىڭ جاستار قۇراما كومانداسى ساپىندا بولىپ, سپورت شەبەرلىگىنە ۇمىتكەر دەڭگەيىنە دەيىن جەتتى. كونكي تەبۋدەن دە ەلىشىلىك جارىستاردا ەلەۋلى تابىستارعا قول جەتكىزدى. كەيىننەن قازاقستانعا ورالعاننان كەيىن ايسۇلتان باسقا كاسىپتى تاڭدادى. مىنە, ءدال وسى ازامات ۇلىنىڭ سپورتتىڭ سوقپاعىنا تۇسۋىنە سەبەپكەر بولدى.
بىردە اكەم مەكتەپ تاقتايشاسىنداعى جارنامانى كورىپ, مەنى وسى سپورت تۇرىمەن اينالىسۋعا ۇگىتتەدى. بۇل – 2012 جىل ەدى. اكەمنىڭ اقىلىنا قۇلاق اسىپ, الماتىداعى «تولقىن» دەپ اتالاتىن سپورت كەشەنگە كەلدىم. ول جەردەگىلەر مەنەن «قايسىسىن تاڭدايسىڭ: اكادەميالىق ەسۋ مە, الدە كانوە مەن بايداركا ما؟» دەپ سۇرادى. قاپەلىمدە نە دەپ جاۋاپ بەرەرىمدى بىلمەي ءبىراز ابدىراپ قالدىم. بۇعان دەيىن سپورتپەن شۇعىلدانباعان 12 جاستاعى بالانىڭ اكادەميالىق ەسۋ نەمەسە كانوە مەن بايداركانى اجىراتا المايتىنى انىق قوي. باعىما وراي, سول كەزدە جانىمىزعا بىلىكتى باپكەرلەردىڭ ءبىرى كەلە قالدى. ول مەنى قولىمنان جەتەكتەدى دە, ءوزى جەتەكشىلىك ەتەتىن ۇيىرمەگە الىپ باردى. وسىلايشا, مەن كانوە ەسۋدىڭ قىر-سىرىنا قانىعا باستادىم, – دەپ ءانۋار ەزۋ تارتتى.
سپورتتىڭ وسى ءتۇرىن تاڭداعانىنا ءانۋار ەش وكىنبەيدى. شەبەرلىگى شىندالا كەلە ول ءوز قاتارلاستارىنىڭ الدى بولدى. قالا جانە رەسپۋبليكا دەڭگەيىندەگى دودالاردا جەڭىس تۇعىرىنا كوتەرىلىپ, كوپشىلىكتىڭ كوزىنە ءتۇستى. سول جارىستاردان العان ماقتاۋ قاعازدارىن ءۇيىنىڭ كەرەگەسىنە ءىلىپ قويىپ, كەلەشەكتى بۇدان بيىك بەلەستەردى باعىندىرسام دەپ ارمانادى. سپورت سالاسىنداعى العاشقى قادامىن جاساپ جۇرگەن ارمانشىل بالانىڭ ءاربىر جەتىستىگىنە, ەڭ ءبىرىنشى كەزەكتە, اكەسى ايسۇلتان مەن اناسى الماگۇل شاتتانا قۋانىپ, ۇنەمى قولداۋ كورسەتىپ ءجۇردى.
ەلىمىزدىڭ جاسوسپىرىمدەر قۇراماسى قابىلدانعان 16 جاسار ءانۋار اقچۋرين 2016 جىلى حالىقارالىق ارەناداعى ءوزىنىڭ تىرناقالى تابىسىنا قول جەتكىزدى. وزبەكستاننىڭ سامارقاند قالاسىندا وتكەن ازيا كۋبوگى جولىنداعى جارىستا ول س-4 (كانوە-تورتتىك) جاتىعۋى بويىنشا 1 000 مەرلىك سايىستا باس جۇلدەنى ولجالادى. بۇل جەڭىس ونى قاناتتاندىرىپ, ءوز-وزىنە دەگەن سەنىمىن نىعايتا ءتۇستى. 2017 جىلعى شانحايداعى ازيا چەمپيوناتىندا قانداسىمىز ءتورتىنشى ورىنعا تابان تىرەدى.
2008 جىلى ءانۋار تولاعاي تابىستارعا قول جەتكىزدى. اتاپ ايتساق, كانوە-بىرلىككە (س-1) ابدەن ماشىقتانعان قازاقتىڭ ۇلى ەل بىرىنشىلىگىندە الدىنا جان سالماي, جەڭىس تۇعىرىنىڭ ەڭ بيىك ساتىسىنا كوتەرىلدى. وسى جەتىستىكتىڭ ارقاسىندا حالىقارالىق جارىستارعا قايتا جول اشىلدى. سلوۆاكيانىڭ پيتەشتي قالاسىندا وتكەن رەگاتادا ول ءوزىنىڭ وڭ جامباسىنا كەلەتىن جاتتىعۋدا التىن السا, 500 مەترلىك سايىستا كۇمىسپەن كۇپتەلدى. سامارقاندتاعى ازيا بىرىنشىلىگىندە ەكى بىردەي باس جۇلدەنى يەلەنسە, بولگاريانىڭ پلوۆديۆىندە جالاۋى جەلبىرەگەن الەم بىرىنشىلىگىندە كۇمىس مەدالدى موينىنا ءىلدى.
نەگىزى ءبىز باتىس قازاقستان وبلىسىنىڭ تۋمالارىمىز, – دەپ اكەسى ايسۇلتان اڭگىمەگە ارالاستى. – اكە-شەشەم رەسەيدىڭ ساراتوۆ قالاسىنداعى ينستيتۋتتا وقىپ جۇرگەن كەزدەرىندە شاڭىراق كوتەرگەن ەدى. مەن سول شاھاردا دۇنيەگە كەلدىم. جاستىق شاعىمدا ءتاپ-ءتاۋىر ناتيجە كورسەتتىم. بىراق سپورتتىڭ سوڭىنا شىنداپ تۇسپەدىم. سودان ۇلىمنىڭ وسى سوقپاقپەن ءجۇرۋىن قالادىم. ول ءۇمىتتى اقتادى. جاسوسپىرىمدەر مەن جاستار بۋىنى اراسىنداعى جاۋاپتى جارىستاردا ۇنەمى جۇلدە الىپ ءجۇر. سامارقاند پەن پلوۆديۆتە وتكەن قۇرلىق جانە الەم بىرىنشىلىكتەرىندە قاسىندا بىرگە بولىپ, بارىنشا قولداۋ كورسەتۋگە تىرىستىم. ناتيجەسى ءبىز كۇتكەندەي بولىپ, ۇلىمنىڭ ونەرى كوڭىلىمنەن شىقتى.
بۇل كۇندەرى ءانۋار اقش-تىڭ مايامي قالاسىندا ينجەنەر ماماندىعى بويىنشا ءبىلىم الۋدا. دەسەك تە ول سپورتتان دا قول ۇزگەن جوق. ساباقتان بوس ۋاقىتتىڭ بارلىعىن ەسكەك ەسۋ بازاسى مەن ترانەاجەر زالىندا وتكىزەدى. كۇنىنە ءۇش ۋاقىت جاتتىعادى. وسىدان ءبىراز ۋاقىت بۇرىن قانداسىمىز اتلانتيكا مۇحيتىنىڭ جاعالاۋىنا گەرمانيا مەن رۋمىنيا قۇرامالارى كەلىپ, بىرلەسكەن وقۋ-جاتتىعۋى جيىنىن وتكىزىپ جاتقانىن ەستىدى. ال ايتۋلى مەملەكەتتەردە ەسكەك ەسۋ مىقتى دامىعانى بارشاعا ءمالىم. ولار وليمپيا ويىندارى مەن الەم چەمپيوناتتارىندا جەڭىپ العان جۇلدەلەر سانى جاعىنان ۇزدىك بەستىكتىڭ قاتارىندا.
جوعارىداعى جاڭالىقتان قۇلاعدار بولاعاننان كەيىن گەرمانيا مەن رۋمىنيا قۇرامالارىنىڭ باپكەرلەرىنە جولىعىپ «سىزدەرمەن بىرگە جاتتىعۋعا بولادى ما؟» دەپ ءوتىنىش ءبىلدىردىم. ولار سوزگە كەلمەي, ءوز كەلسىمدەرىن بەردى. قۋانىشتان توبەم كوككە جەتتى. راسىندا دا, ايتۋلى مەملەكەتەردە سپورتتىڭ بۇل تۇرىندە جەڭىسپەن ورىلگەن باي ءداستۇرى بار. سول ەلدەردەن چەمپيوندار كوپتەپ شىققان. جالعىز عانا سەباستيان برەندەلدىڭ ءوزى نەگى تۇرادى! 30 جاستاعى نەمىس سپورتشىسىنىڭ ءۇش دۇركىن وليمپيادا چەمپيونى دەگەن دارداي اتاعى بار. الەم چەمپيوناتىندا ول 18 مارتە (10 التىن+5 كۇمىس+3 قولا) جانە ەۋروپا بىرىنشىلىگىندە 23 رەت (13 التىن+7 كۇمىس+3 قولا) جەڭىس تۇعىرىنا كوتەرىلدى. مىنە, وسىنداي اتى اڭىزعا اينالعان تۇلعالارمەن بىرگە جاتتىعۋ ءار سپورتشى ءۇشىن زور مارتەبە, – دەپ ءانۋار اعىنان جارىلدى.
بيىل ءساۋىر ايىندا الماتىدا قازاقستان چەمپيوناتى وتەدى. قازىرگى كەزدە گەرمانيا مەن رۋمىنيا ماماندارىنىڭ قول استىندا جاتتىعىپ جۇرگەن ءانۋار اقچۋرين ايتۋلى جارىستا باق سىناۋدى كوزدەپ وتىر. باستى ماقسات – ۇزدىكتەر قاتارىنان كورنىپ, قازاقستان قۇراماسى ساپىنا قابىلدانۋ. كەيىپكەرىمىزدىڭ جەكە باپكەرى سەرگەي تيۋنوۆ ءوز شاكىرتىنە سەنىمدى. بارشا جانكۇيەرلەر دە ءانۋار اقچۋريندەي اسا دارىندى سپورتشىدان الداعى ۋاقىتتا ءىرى جەڭىستەر كۇتەدى. قازاقتىڭ وسىنداي ۇلدارى بارىندا, ەسكەك ەسۋدە ەشكىمگە ەسەمىز كەتە قويماس...
عالىم سۇلەيمەن,
«ەگەمەن قازاقستان»