«تسيفرلىق قازاقستان» مەملەكەتتىك باعدارلاماسىن ىسكە اسىرۋ شەڭبەرىندە ءوڭىردىڭ بارلىق مەديتسينالىق ۇيىمدارىندا «دامۋمەد» كەشەندى مەديتسينالىق اقپاراتتىق جۇيەسىن, مەديتسينالىق كومەكتى باسقارۋدىڭ «Idea» اۆتوماتتاندىرىلعان جۇيەسىن, ال اقتوبە قالاسىنىڭ ەمحانالارىندا ەلەكتروندىق كەزەكتى باسقارۋ جۇيەسىن ەنگىزۋ جۇمىستارى كەزەڭ-كەزەڭىمەن جۇرگىزىلدى. بۇل تۋرالى وڭىرلىك كوممۋنيكاتسيالار قىزمەتىنە وبلىستىق دەنساۋلىق ساقتاۋ باسقارماسىنداعىلار حابارلادى.
ەلەكتروندىق فورماتقا مەديتسينالىق قۇجاتتامانىڭ بارلىق قولدانىلاتىن نىساندارى اۋىستىرىلدى, اۋرۋحانالىق پاراقتاردى, اقىلى پرەپاراتتاردىڭ رەتسەپتتەرىن ەلەكتروندى تۇردە بەرۋ جۇمىستارى جۇرگىزىلۋدە. بۇگىنگى كۇنى مەديتسينالىق ۇيىمداردا 4179 اۋرۋحانا پاراعى بەرىلىپ, 1309 اقىلى رەتسەپت جازىلعان.
اعىمداعى كەزەڭدە وبلىستىڭ امبۋلاتوريالىق قىزمەتتەرى 760736 ەلەكتروندىق دەنساۋلىق تولقۇجاتىن تسيفرلادى, بۇل تىركەلگەن حالىقتىڭ 99,3% - ىن قۇرايدى (حالىقتىڭ كوشى-قونىن ەسەپكە العاندا).
حالىققا قولايلى بولۋ ءۇشىن «DamuMed» جانە «k-vrachu.kz» ءموبيلدى قوسىمشالارى ىسكە قوسىلدى, سونداي-اق ارنايى دارىگەرلەردىڭ جۇمىس كەستەسىمەن تانىسۋعا, تىركەلۋ ۋچاسكەسىن انىقتاۋعا, دارىگەردىڭ قابىلداۋىنا جازىلۋعا جانە قاجەت بولعان جاعدايدا جازىلۋدى توقتاتۋعا بولاتىن http://dmed.kz / جانە k-vrachu.kz web-پورتالدارى ىسكە قوسىلدى. ءموبيلدى قوسىمشا سكرينينگتەن ءوتۋ قاجەتتىلىگى تۋرالى Push-ەسكەرتپەلەردى جانە دارىگەرگە بارۋ تۋرالى ەسكەرتۋلەردى جىبەرەدى.
«وسىلايشا, دەنساۋلىق ساقتاۋ جۇيەسىن اقپاراتتاندىرۋدىڭ ارقاسىندا ايماقتىڭ مەديتسينالىق مەكەمەلەرىندە جۇمىس تيىمدىلىگى ارتتى: ەمدەلۋشىنىڭ كەزەكتە كۇتۋ ۋاقىتى 30 مينۋتتان 10 مينۋتقا دەيىن قىسقاردى, دارىگەردىڭ ناۋقاستى تەكسەرۋ ۋاقىتى 20-30 مينۋتقا دەيىن ۇزارتىلىپ, جەدەل جاردەمنىڭ كەلۋ ۋاقىتى 15 مينۋتتان 10 مينۋتقا دەيىن قىسقاردى. 2019 جىلعا ارنالعان جوسپاردا دياگنوستيكالىق جابدىقتاردا شىعارىلعان سۋرەتتەردى ەلەكتروندىق فورماتقا كوشىرۋ, «وليمپ» جانە «Invitro» زەرتحانالارىنىڭ اقپاراتتىق جۇيەلەرىمەن ينتەگراتسيالاۋ جۇمىستارى بار», - دەدى دەنساۋلىق ساقتاۋ باسقارماسىندا.