قازىرگى ۋاقىتتا نەگىزگى قارىزىن تولەگەن جاعدايدا وسىمپۇل ەسەپتەن شىعارىلادى. مەملەكەت باسشىسىنىڭ تاپسىرماسىن ورىنداۋ ماقساتىندا مەملەكەتتىك كىرىستەر ورگاندارى جەكە تۇلعالار ءۇشىن سالىق راقىمشىلىعىن جۇرگىزۋ ءتارتىبىن ازىرلەپ جاتىر. اتاپ ايتساق, سالىق راقىمشىلىعى جۇرگىزىلەتىن جەكە تۇلعالاردىڭ ساناتتارى مەن قارىز سومالارى قاراستىرىلۋدا. بۇل تۋرالى مەملەكەتتىك كىرىستەر كوميتەتىنىڭ ءباسپاسوز قىزمەتى حابارلادى.
جاقىن ارادا ازىرلەنگەن ۇسىنىستار مۇددەلى مەملەكەتتىك ورگاندارمەن كەلىسۋگە بەرىلەتىن بولادى.
2019 جىلدىڭ 8 اقپانىنان باستاپ بەرەشەگىن تولەگەن جاعدايدا ءوسىمپۇل مەن ايىپپۇل سوماسىن ەسەپتەن شىعارۋ قاعيدالارى قولدانىسقا ەنەتىنىن ەستەرىڭىزگە سالامىز.
بۇل قاعيدالار ەلباسىنىڭ 2018 جىلعى 5 قازانداعى قازاقستان حالقىنا جولداۋىندا 2019 جىلدىڭ 1 قاڭتارىنان باستاپ سالىقتىڭ نەگىزگى سوماسىن تولەگەن جاعدايدا ءوسىمپۇلداردى جانە ايىپپۇلدى ەسەپتەن شىعارۋ جونىندە شاعىن جانە ورتا بيزنەس سۋبەكتىلەرى ءۇشىن سالىقتىق راقىمشىلىقتى جۇرگىزۋ تۋرالى بەرىلگەن تاپسىرماسىن ورىنداۋ ماقساتىندا ازىرلەنىپ, بەكىتىلگەن.
بۇگىنگى كۇنگى جاعداي بويىنشا 27 903 سالىق تولەۋشى بيۋدجەتكە 2018 جىلدىڭ 1 قازانىندا بولعان جالپى سوماسى 5,9 ملرد تەڭگە قۇرايتىن نەگىزگى قارىزىن تولەگەن.
وسىلايشا, جاقىن ارادا قاعيدالار قولدانىسقا ەنگىزىلگەن سوڭ, جوعارىدا كورسەتىلگەن سالىق تولەۋشىلەرگە 1,1 ملرد تەڭگە ءوسىمپۇل جانە 100 ملن تەڭگە ايىپپۇل ەسەپتەن شىعارىلاتىن بولادى.
شاعىن جانە ورتا بيزنەس سۋبەكتىلەرىنىڭ مەملەكەتتىك كىرىستەر ورگاندارىنا بارۋدىڭ قاجەتى جوق: ءوسىمپۇلدار مەن ايىپپۇلدار سالىق تولەۋشىنىڭ ءوتىنىشىنسىز ەسەپتەن شىعارىلادى. وڭالتۋ راسىمىندەگى جانە سالىقتار بويىنشا تولەۋ مەرزىمىن ۇزارتقان سالىق تولەۋشىلەرگە قاتىستى راقىمشىلىق قولدانۋدىڭ ءتارتىبى باسقاشا.