بىرلىكتىڭ جوعارى كورسەتكىشى

رەفەرەندۋم تاڭعى ساعات 07.00-دە باستالدى. ورتالىق رەفەرەندۋم كوميسسياسى كۇنى بويى ەكى ساعات سايىن بريفينگ وتكىزىپ, حالىقتىڭ داۋىس بەرۋ قارقىنىن حابارلاپ وتىردى. ماسەلەن, ورك توراعاسىنىڭ ورىنباسارى مۇحتار ەرمان وبلىستار مەن استانا, الماتى, شىمكەنت قالالارىنىڭ كوميسسيالارى ۇسىنعان اقپاراتقا سايكەس, ساعات 07.00-دە وڭىرلەردە 10 388 ۋچاسكە داۋىس بەرۋگە كىرىسكەنىن مالىمدەدى.

– 92 ۋچاسكەدە اۋماقتىق كوميسسيا­لاردىڭ قابىلداعان شەشىمدەرىنە سايكەس داۋىس بەرۋ تاڭعى ساعات 06.00-دە باستالدى. تىزىمدەرگە 12 461 796 ازامات ەنگىزىلدى. ۋچاسكەلىك كوميسسيالار ازاماتتاردىڭ جازباشا وتىنىشتەرى بويىنشا داۋىس بەرۋ قۇقىعىن بەرەتىن بارلىعى 17 514 ەسەپتەن شىعارۋ كۋالىگىن بەردى. رەسپۋبليكادا 10 388 داۋىس بەرۋ ۋچاسكەسى بار, – دەدى م.ەرمان.

ءۇش ساعاتتىڭ ىشىندە (ساعات 10.00-دەگى جاعداي بويىنشا) ەلدە 2 393 844 ازامات داۋىس بەردى. ورتالىق رەفەرەندۋم كوميسسياسىنىڭ مۇشەسى ءلاززات سۇيىندىكتىڭ مالىمەتىنە سايكەس بۇل كورسەتكىش تىزىمگە ەنگەن ازاماتتاردىڭ 19,21 پايىزىن قۇرادى. تاڭعى ۋاقىتتا داۋىس بەرگەندەردىڭ اراسىندا قاراعاندى وبلىسىنىڭ حالقى بەلسەندىلىك تانىتتى, ساعات 7.00-10.00 ارالىعىندا قاراعاندىلىقتاردىڭ 26,64 پايىزى داۋىس بەرىپ ۇلگەرگەن. ودان كەيىن قىزىلوردا وبلىسى – 24,02, تۇركىستان وبلىسى 21,21 پايىزبەن كوش باستادى. ال پاۆلودار (16,36 پايىز) مەن اباي (17,98 پايىز) وبلىستارى تۇرعىندارىنىڭ بەلسەندىلىگى تومەن بولدى. سونداي-اق الماتى قالاسىنىڭ حالقى وزگە مەگاپوليستەرمەن سالىستىرعاندا ادەتتەگىدەي ەڭ تومەنگى كورسەتكىشكە يە بولدى, 9,54 پايىز. استانا قالاسى – 20,68, شىمكەنت قالاسى 21,36 پايىزدى كورسەتكەن.

تۇسكى ساعات 12.00-دە ورك مۇشەسى اسەل ءجانابىلوۆا 4 677 595 ازاماتتىڭ داۋىس بەرگەنىن مالىمدەدى, بۇل جالپى رەفەرەندۋمعا قاتىسۋشى حالىقتىڭ 37,54 پايىزىن قۇرادى. ورك مۇشەسىنىڭ ايتۋىنشا, ازاماتتاردىڭ ۋاقىتشا بولۋ ورىندارىنداعى 106 ۋچاسكەدە داۋىس بەرۋ اياقتالدى.

بۇل ۋاقىتتا اقتوبە وبلىسىنىڭ تۇرعىندارى 45,37 پايىزدىق كورسەتكىش­پەن كوش باستادى. اباي, اقمولا, الماتى, اتىراۋ, جەتىسۋ, قاراعاندى, قىزىلوردا, تۇركىستان, سولتۇستىك پەن شىعىس قازاقستان وبلىستارىنىڭ دا بەلسەندىلىك كورسەتكىشى 40 پايىزدان, ال باتىس قازاقستان, جامبىل, قوستاناي, ماڭعىستاۋ, پاۆلودار, ۇلىتاۋ وڭىرلەرىنىڭ كورسەتكىشى 30 پايىزدان استى. الماتى قالاسىنىڭ كورسەتكىشى بەس پايىزعا كوتەرىلىپ, 14,85 پايىزدى قۇرادى. ەلوردا حالقىنىڭ داۋىس بەرۋ كورسەتكىشى – 31,23, شىمكەنت قالاسى 42,59 پايىزعا جەتتى.

ەكى ساعاتتىڭ ىشىندە جاڭا اتا زاڭ جوباسىن قابىلداۋ بويىنشا رەفەرەندۋمدا داۋىس بەرۋشىلەردىڭ سانى 6 471 378 ادامعا جەتتى. بريفينگتە ورتالىق رەفەرەندۋم كوميسسياسىنىڭ حاتشىسى شاۆحات وتەمىسوۆ 14.00-دەگى جاعداي بويىن­شا 6 339 425 ازامات بيۋللەتەن الىپ, داۋىس بەرۋشى ەل حالقىنىڭ جارتىسىنان استامى (51,93 پايىز) تاڭداۋ جاساعانىن حابارلادى.

– «رەسپۋبليكالىق رەفەرەندۋم تۋرالى» كونستيتۋتسيالىق زاڭنىڭ 31-بابى 2-تارماعىنا سايكەس ەگەر رەفەرەندۋمعا قاتىسۋ قۇقىعى بار ازاماتتاردىڭ جارتىسىنان كوبى داۋىس بەرۋگە قاتىسقان بولسا, رەفەرەندۋم وتكىزىلگەن دەپ سانالادى, – دەدى كوميسسيا مۇشەسى ش.وتەمىسوۆ. ەسكە سالساق, جالپى رەفەرەندۋمعا قاتىسۋعا 12 461 796 ادامنىڭ قۇقىعى بار.

ال ساعات 16.00-گە دەيىن 8 ملن-نان ءسال استام ادام داۋىس بەردى. ورتالىق رەفەرەندۋم كوميسسياسىنىڭ مۇشەسى اسەل ءجانابىلوۆا: «8 029 286 ازامات بيۋللەتەن الدى. بۇل تىزىمگە ەنگىزىلگەن ازاماتتاردىڭ 64,43 پايىزىن قۇرادى», دەپ مالىمدەدى. بۇل ۋاقىتتا دا وبلىس حالقىنىڭ بەلسەندىلىگى جوعارى بولدى. ماسەلەن, قىزىلوردا وبلىسى بويىنشا – 82,02, اقتوبە وبلىسى – 77,65, قوستاناي وبلىسى – 70,96, الماتى وبلىسى – 68,23, باتىس قازاقستان وبلىسى – 60,61, اتىراۋ وبلىسى بويىنشا 64,33 پايىزعا جەتتى.

ال باستى مەگاپوليستەردە رەفەرەن­دۋمعا تۇرعىنداردىڭ قاتىسۋى اركەلكى بولدى, استانا قالاسىندا – 47,76, الما­تى قالاسىندا 28,16 پايىز كورسەتكىش تىركەلدى. شىمكەنت حالقىنىڭ 72,61 پايى­زى داۋىس بەردى.

ساعات 18.00-دە داۋىس بەرۋشىلەردىڭ سانى 6 پايىزعا كوتەرىلدى. ورتالىق رەفەرەندۋم كوميسسياسىنىڭ حاتشىسى شاۆحات وتەمىسوۆتىڭ حابارلاۋىنشا, ەل بويىنشا داۋىس بەرۋشىلەر سانى شامامەن 8 845 280 ادامعا جەتىپ 70,98 پايىزدى قۇرادى. قىزىلوردا وبلىسى تۇرعىندارىنىڭ 91,80 پايىزى ساياسي ءىس-شاراعا قاتىسىپ, داۋىس بەردى. سونداي-اق 6 ءوڭىر (اقتوبە, جامبىل, قاراعاندى, قوستاناي, تۇركىستان, شىعىس قازاقستان) حالقىنىڭ قاتىسۋ كورسەتكىشى 80 پايىزدان اسىپ, وسى رەفەرەندۋمدا بەلسەندىلىك تانىتتى.

20.00-دە داۋىس بەرۋ اياقتالىپ, رەفەرەندۋم ۋچاسكەلەرى جۇمىسىن توقتاتتى. ورتالىق رەفەرەندۋم كوميسسياسى توراعاسىنىڭ ورىنباسارى مۇحتار ەرمان: «ۋچاسكەلىك كوميسسيالار داۋىس­تاردى ساناۋعا كىرىستى. قولدانىستاعى زاڭدار نورمالارىنا سايكەس رەفەرەندۋم ۋچاسكەلەرiندە داۋىستاردى ساناۋ ۋاقىتى داۋىستاردى ساناۋ باستالعان ساتتەن باس­تاپ ون ەكى ساعاتتان اسپاۋعا تيiس», دەپ مالىمدەدى بريفينگتە.

وسىلايشا, 9 126 850 ەل ازاماتى (73,24 پايىز) بيۋللەتەن الىپ, داۋىس بەردى. داۋىس بەرۋ باستالعالى الدا كەلە جاتقان قىزىلوردا وبلىسىنىڭ ساي­لاۋشىلارى كوش باسىندا بولدى – 93,04 پايىز. استانادا سايلاۋشىلاردىڭ – 60,36, ال شىمكەنتتە 75,82 پايىزى قاتىستى. وڭتۇستىك استانانىڭ بەلسەندىلىگى تومەن بولدى, الماتى تۇرعىندارىنىڭ 33,43 پايىزى عانا داۋىس بەرۋگە كەلدى.