شىمكەنت قالالىق سوت عيماراتىندا «تۇرعىنداردى قابىلداۋ» ورتالىعى اشىلدى. مۇنان بىلاي قابىلداۋ بولمەسىندە سوت قىزمەتىنە جۇگىنۋشىلەر وزدەرىن جايلى جانە پسيحولوگيالىق تۇرعىدا ەركىن سەزىنىپ, تولعاندىرعان ماسەلەلەرىنە قاجەتتى كەڭەس الا الادى.
مەملەكەتتىك قىزمەتەگى اشىقتىقتى ساقتاۋ ماقساتىندا وسىدان ىلگەرى شىمكەنت اكىمدىگى مەن قالالىق سوت اراسىندا ءوزارا ىنتىماقتاستىق تۋرالى مەموراندۋمعا قول قويىلعان ەدى. مىنە, سول كەلىسىم ناتيجەسىندە ازاماتتاردى قابىلداۋدىڭ جاڭا فورماتى ەنگىزىلىپ وتىر.
«ەلباسى ن.نازارباەۆ «قازاقستاندىقتاردىڭ ءال اۋقاتىنىڭ ءوسۋى: تابىس پەن تۇرمىس ساپاسىن ارتتىرۋ» اتتى جولداۋىندا سوت جۇيەسىن ودان ءارى جاڭعىرتۋدا ناقتى تاپسىرمالار بەرگەن بولاتىن. ونى باستىسى داۋلاردى سوتقا جەتكىزبەي, بىتىمگەرلىك جولمەن شەشۋدىڭ بالامالى ءتۇرىن دامىتۋ ماسەلەسى دە بار. تاراپتاردىڭ داۋىن سوتقا جەتكىزبەي رەتتەۋدە وسى ورتالىقتىڭ ماڭىزى زور. وندا سۋديالار, مەدياتورلار ازاماتتاردى دەمالىس, مەرەكە كۇندەرىنەن باسقا ۋاقىتتىڭ بارىندە قابىلدايدى», - دەيدى قالالىق سوت توراعاسى ەربول راحىمبەكوۆ.
قالالىق سوت وكىلدەرى وتكەن جىلى شىمكەنتتە 29 مىڭعا جۋىق ازاماتتىق ءىس قارالىپ, سوت جۇيەسىندە مەدياتسيا ينستيتۋتىن دامىتۋ ماقساتىندا بىرقاتار جاقسى جوبالاردى جۇزەگە اسىرىپ جاتقاندىعىن ايتادى. بۇگىنگە دەيىن قالالىق سوت جانىنان تاتۋلاستىرۋ كابينەتتەرى, ارداگەرلەر كەڭەسىنىڭ قولداۋىمەن بيلەر كەڭەسى قۇرىلىپ, جۇمىس ىستەپ كەلەدى.
ەندى مەملەكەتتىك ورگانداردا مەدياتسيالىق كابينەتتەر اشۋ مەن كاسىبي مەدياتورلاردىڭ سانىن كوبەيتۋ ماسەلەسى تۇر. جەرگىلىكتى اكىمدىك پەن قالالىق سوتتىڭ مەموراندۋمى اياسىندا بۇل باستامالار الداعى ۋاقىتتا ونان ارى جاندانا تۇسپەك.
يگىلىكتى باستامانىڭ باسىندا بولعان قالا اكىمى عابيدوللا ءابدىراحىموۆ شاھارداعى مەكەمەلەردە مەدياتسيالىق كابينەتتەر اشۋ بويىنشا بىرلەسە جۇمىس ىستەپ, ۇيىمداستىرۋ جاعىنان كومەك كورسەتۋگە دايىن ەكەندىگىن جەتكىزدى.
نۇرشات توكەن,
«Egemen Qazaqstan»