«مەملەكەت باسشىسىنىڭ تاپسىرماسى بويىنشا ستۋدەنت جاستاردىڭ جاعدايىن جاقسارتۋ ماقساتىندا الماتىدا 1200 ورىندى 3 جاتاقحانا سالىندى, ونىڭ بىرەۋى مودەرنيزاتسيالانعان. جىل سوڭىنا دەيىن 2680 ورىندى 5 جاتاقحانا قۇرىلىسى اياقتالادى جانە 6300 ورىندى 12 جاتاقحانا قۇرىلىسى قاتار جۇرەدى. جالپى, 2020 جىلعا دەيىن 19 480 ورىندى 42 جاتاقحانا سالىنىپ, پايدالانۋعا بەرىلەدى», دەيدى قالا اكىمنىڭ ءباسپاسوز قىزمەتى.
الماتىدا ءبىلىم سالاسىن دامىتۋعا باعىتتالعان جۇمىستار جۇيەلى جۇزەگە اسىپ كەلەدى. قالا اۋماعىنا قوسىلعان ەلدى مەكەندەردەگى ينتەنسيۆتى ميگراتسيا مەن تۋ قارقىنى ەسەبىنەن مەكتەپتەگى ورىن جەتىسپەۋشىلىك پەن بالاباقشا كەزەگىن ازايتۋ ماقساتىندا وتكەن جىلى قالانىڭ ناۋرىزباي اۋدانىندا 1200 ادامعا ارنالعان سۋ جاڭا مەكتەپ پايدالانۋعا بەرىلگەن بولاتىن. شاھارداعى ءۇش بىردەي مەكتەپتىڭ جانىنان 1400 ورىندىق قوسالقى نىسان مەن 730 بالاعا شاقتالعان ءۇش مەملەكەتتىك بالاباقشا اشىلعان. بىلتىرعى جىلدىڭ قورىتىندىسىنا سايكەس, بۇدان بولەك 2,5 مىڭ ورىندى 6 جەكە مەكتەپ جانە 4936 بۇلدىرشىنگە ارنالعان 170 جەكە بالاباقشا ىسكە قوسىلعان. تاياۋ كۇندەرى 440 ورىندى 2 بالاباقشا پايدالانۋعا بەرىلمەك.
قالا اكىمدىگىنىڭ ءباسپاسوز قىزمەتى بەرگەن مالىمەتكە سۇيەنسەك, الاتاۋ اۋدانىندا 600 ورىندى مەكتەپ پەن 3 مەملەكەتتىك بالاباقشانىڭ قۇرىلىس جۇمىستارى ءجۇرىپ جاتىر. مەملەكەتتىك-جەكە ارىپتەستىك جانە بيزنەستىڭ الەۋمەتتىك جاۋاپكەرشىلىگى اياسىندا وقۋشىلار تىعىز ورنالاسقان ورتالىقتاعى 4 مەكتەپتىڭ جانىنان قوسالقى وقۋ كورپۋستارى سالىنباق.
ارمان وكتيابر,
«Egemen Qazaqstan»
الماتى