«جاستار جىلى» اياسىندا قىزىلجار اۋدانىنىڭ ورتالىعى – بەسكول اۋىلىندا جاستارعا قىزمەت كورسەتۋ ورتالىعى پايدالانۋعا بەرىلدى.
«نۇر وتان» پارتياسى اۋداندىق فيليالىنىڭ عيماراتىندا ورنالاسقان جاڭا كەڭسەدە مەملەكەتتىك باعدارلامالار, كاسىپكەرلىك, جۇمىسقا ورنالاسۋ, ءبىلىم الۋ باعىتتارى بويىنشا اقىل-كەڭەستەر, باسقا دا ماعۇلماتتار بەرىلەدى. «قىزىلجار» جاستارعا قىزمەت كورسەتۋ ورتالىعىنىڭ كەڭەسشىسى گۇلاسەل حاميتوۆانىڭ ايتۋىنشا, بىلتىر پەتروپاۆل قالاسىندا وتكەن سەمينارعا الماتى, تالدىقورعان قالالارىنداعى جاستارعا قىزمەت كورسەتۋ ورتالىعىنىڭ وكىلدەرى كەلىپ, تاجىريبە الماسىپتى. كەيىن جەرگىلىكتى بيلىك ورىندارىنا ورتالىق اشۋ تۋرالى ۇسىنىس ءبىلدىرىپ, قولداۋ تاۋىپتى. مۇندا اۋداندىق جۇمىسپەن قامتۋ ورتالىعىنىڭ ماماندارى ەڭبەكپەن قامتۋ, جۇمىسقا ورنالاسۋ ماسەلەلەرى بويىنشا كومەكتەسىپ وتىرادى. «باستاۋ بيزنەس» جوباسى اياسىندا قۇقىقتىق كەڭەستەر الۋعا بولادى.
كەڭسەنىڭ اشىلۋىمەن جينالعانداردى اۋدان اكىمى جانات سادۋاقاسوۆ قۇتتىقتادى.
«قازىرگى تاڭدا مىڭعا جۋىق قىزىلجارلىق جاس ۋنيۆەرسيتەتتە, كوللەجدەردە وقىپ جاتىر. ولاردىڭ جۇزگە جۋىعى بيىل ءبىلىم وشاقتارىن ءتامامداپ, مامان يەسى اتانادى. كەيىن, جەرلەستەرىمىز وسى جەردەگى قىزمەتكەرلەرگە جۇگىنىپ «ديپلوممەن اۋىلعا» باعدارلاماسى ارقىلى جۇمىسقا ورنالاسا الادى. جالپى, اتالعان جوبا جاريالانعالى قىزىلجار اۋدانىنا 830 جاس كەلىپ, ەڭبەكپەن قامتىلدى», دەدى ول ءوز سوزىندە.
«قىزىلجار» جاستارعا قىزمەت كورسەتۋ ورتالىعى ونلاين رەجيمدە دە جۇمىس ىستەيتىن بولادى. ءسويتىپ شالعايدا ورنالاسقان اۋىلدارمەن تىكەلەي بايلانىسقا شىعىپ, تولعاندىرعان سۇراقتارعا جاۋاپ بەرەدى.
ءومىر ەسقالي,
«ەگەمەن قازاقستان».
سولتۇستىك قازاقستان وبلىسى