17-19 قاڭتار ارالىعىندا باتىس قازاقستان وبلىسىندا «اۆتوبۋس» جەدەل-ساۋىقتىرۋ شاراسى ءوتىپ جاتىر. شارانىڭ ماقساتى – الىس-جاقىن قاشىقتىقتا جولاۋشى تاسىمالىمەن اينالىساتىن كولىك يەلەرىنىڭ ءتارتىبىن تەكسەرۋ.
جۋرناليستەردىڭ قاتىسۋىمەن وتكەن العاشقى كۇندىك رەيد كەزىندە «رۋبەج-ورال» ستاتسيونارلىق بەكەتىندە تەكسەرىلگەن «گازەل» اۆتوكولىگى جۇرگىزۋشىسىنىڭ قۇجاتتارى دۇرىس بولماي شىقتى. وزبەكستان رەسپۋبليكاسىنىڭ ازاماتتارىن تيەپ الىپ, «ۆورونەج-شىمكەنت» باعىتىنا جول تارتقان كولىك قازاقستان رەسپۋبليكاسى اكىمشىلىك قۇقىقبۇزۋشىلىق تۋرالى كودەكستىڭ ءۇش بىردەي بابىن بۇزعان ەكەن. جۇرگىزۋشىنىڭ ەڭبەك رەجيمى ساقتالماعان, قاۋىپسىزدىك بەلدىگىن قولدانباعان جانە كولىك قۇرالىن پايدالانۋ ەرەجەسىن بۇزعان جۇرگىزۋشى اكىمشىلىك جاۋاپكەرشىلىككە تارتىلدى.
- 2018 جىلى وڭىردە قوعامدىق كولىكتەر 11 مارتە جول-كولىك وقيعاسىنا ۇشىراعان. بۇل وقيعالاردان 7 ادام قازا تاۋىپ, 15-ءى ءارتۇرلى جاراقات الدى. وسى 11 وقيعانىڭ التاۋى – اۆتوبۋس جۇرگىزۋشىنىڭ كىناسىنەن بولعان ەكەن. ناتيجەسىندە 3 ادام ءولىپ, 6 جولاۋشى جارالاندى, - دەيدى باتىس قازاقستان وبلىستىق پوليتسيا دەپارتامەنتىنىڭ ءباسپاسوز قىزمەتكەرى ءاليا ناۋرىزعاليەۆا.
قازاقستاندا 16-20 قاڭتار ارالىعىندا ەلىمىزدىڭ كوشى-قون زاڭدىلىقتارىن بۇزۋشىلاردى انىقتاۋ ماقساتىندا «ميگرانت» جەدەل-ساۋىقتىرۋ شاراسى دا ءوتىپ جاتىر.
قازبەك قۇتتىمۇرات ۇلى,
«ەگەمەن قازاقستان»
باتىس قازاقستان