بۇگىن الماتىداعى پەدياتريا جانە بالالار حيرۋرگياسى عىلىمي ورتالىعى «قازاقستان رەسپۋبليكاسىنداعى پەدياتريالىق قىزمەتتىڭ سوڭعى 10 جىلداعى جەتىستىگى» تاقىرىبىندا ءباسپاسوز بريفينگىن وتكىزىپ, تومەندەگىدەي مالىمەتتەردى جاريالادى.
انا مەن بالا دەنساۋلىعىن قورعاۋ بويىنشا باسىمدىق بەرىلگەن ستراتەگيالىق شارالار 2016–2020 جىلدارعا ارنالعان قر دەنساۋلىق ساقتاۋ سالاسىن دامىتۋدىڭ «دەنساۋلىق» مەملەكەتتىك باعدارلاماسىن ىسكە اسىرۋ ارقىلى ءوز شەشىمىن تاۋىپ, سوڭعى جىلدارى بالالار مەن نارەستەلەردىڭ ءولىم-ءجىتىمى كورسەتكىشىنىڭ تومەندەۋىنە مۇمكىندىك بەردى. سوڭعى 10 جىلدا بالالار ءولىم-ءجىتىمىنىڭ كورسەتكىشى 2 ەسەگە (2017 جىلى 1000 نارەستەگە شاققاندا 10,2) جانە نارەستەلەر ءولىم-ءجىتىمىنىڭ 2,6 ەسەگە (2017 جىلى 1000 نارەستەگە شاققاندا 7,9) تومەندەدى.
پەدياتريا جانە بالالار حيرۋرگياسى عىلىمي ورتالىعىنىڭ باسقارما ءتورايىمىنىڭ مىندەتىن اتقارۋشى جانار ساۋرانباەۆانىڭ ايتۋىنشا, قر دەنساۋلىق ساقتاۋ سالاسىن دامىتۋدىڭ 2016-2019 جىلدارعا ارنالعان «دەنساۋلىق» مەملەكەتتىك باعدارلاماسىنىڭ اياسىندا قازاقستان رەسپۋبليكاسىندا بوساندىرۋ مەن بالالىق شاق قىزمەتىنىڭ تيىمدىلىگىن ارتتىرۋ بويىنشا بىرىكتىرىلگەن ۇلگىنى ەنگىزۋ جونىندەگى جول كارتاسى جۇزەگە اسىرىلۋدا. «بالالار دەنساۋلىعىن قورعاۋ دەنساۋلىق ساقتاۋ سالاسىنىڭ, مەملەكەت پەن قوعامنىڭ ەڭ وزەكتى جانە ەڭ ماڭىزدى ماسەلەلەرىنىڭ ءبىرى. سەبەبى, بالالاردىڭ دەنىنىڭ ساۋلىعى ەرەسەكتەر دەنساۋلىعىنىڭ الەۋەتىن قالىپتاستىرۋدىڭ ىرگەلى نەگىزىن قۇرايدى. ەلىمىز دۇنيەجۇزىلىك دەنساۋلىق ساقتاۋ ۇيىمىنىڭ انا مەن بالانىڭ بىرگە بولۋى, تەك قانا ەمىزۋ, كۇنى جەتىپ تۋعان جانە ەرەسەك بالالاردى باعىپ كۇتۋگە جىبەرۋگە ارنالعان «قاۋىپسىز انا» ستراتەگياسىن قابىلدادى. قازاقستاندا ورتالىق ازياداعى تاۋەلسىز مەملەكەتتەر دوستاستىعى ەلدەرىمەن سالىستىرعاندا ءبىر جاسقا دەيىنگى بالالار ءولىمى (7,9‰) نارەستەلەر ءولىمى كورسەتكىشى دەڭگەيىنەن 1,2 ەسەگە تومەن (تمد بويىنشا – 9,3‰: قىرعىزستان – 19,9‰; تاجىكستان – 11,8‰, وزبەكستان – 10,7‰; ءازىربايجان – 9,8‰; رەسەي – 7,3‰). قر دسم-ءنىڭ جانىنان بالالارعا مەديتسينالىق كومەك كورسەتۋدىڭ بىرىكتىرىلگەن ۇلگىسىن ەنگىزۋ بويىنشا ۇيلەستىرۋ كەڭەسى جۇمىس ىستەيدى. وڭىرلەردەگى بالالارعا مەديتسينالىق كومەك كورسەتۋ ىسىنە مونيتورينگ جاساي وتىرىپ, انا مەن بالا ءولىمىن تومەندەتۋ بويىنشا شۇعىل شارالار قابىلداۋ جونىندەگى رەسپۋبليكالىق شتاب ۇيىمداستىرىلدى, كوشپەلى وتىرىستار وتكىزىلدى.
2018 جىلى باسقارۋشىلىق شەشىمدەر قابىلدانعان رەسپۋبليكالىق شتابتىڭ 13 وتىرىسى ءوتتى. ەلىمىزدە پەدياتريالىق كومەك كورسەتۋدى ۇيىمداستىرۋ ستاندارتى ەنگىزىلدى», دەدى جانار ساۋرانباەۆا.
بريفينگتە پەدياتريالىق قىزمەتتىڭ سوڭعى 10 جىلداعى جەتىستىگى اتاپ ءوتىلدى.
ايناش ەسالي,
«ەگەمەن قازاقستان».
الماتى