كحدر باسشىسى كيم چەن ىن قىتاي كوشباسشىسى سي ءتسزينپيننىڭ شاقىرۋىمەن پحەنيان مەن ۆاشينگتون كوشباسشىلارى اراسىنداعى ەكىنشى ءسامميتتى ۇيىمداستىرۋ جونىندەگى ماسەلەلەر اياسىندا قىتايعا رەسمي ساپارمەن كەلدى دەپ حابارلايدى Yonhap اقپارات اگەنتتىگى.
ساپار 10 قاڭتارعا دەيىن جالعاسادى.
كيم چەن ىننىڭ قىتايعا ساپارى وسىعان دەيىن قۇپيا بولدى. تەك 7 قاڭتار كۇنى كەشكىسىن عانا باق سولتۇستىك كورەيانىڭ جوعارى لاۋازىمدى ادامى بار پويىز داندۋن شەكارالىق قالاسى ارقىلى وتكەنىن حابارلادى. حابارلامادا ايتىلعانداي, بۇعان دەيىن كحدر قاۋىپسىزدىك قىزمەتىنىڭ ونداعان كولىگى شەكارالىق قالا ۆوكزالىنا اپاراتىن جولداردى جاۋىپ تاستاعان.
بۇل ساپار ۆاشينگتوننىڭ سكەپتيزمى سالدارىنان پحەنياننىڭ يادرولىق قارۋدان باس تارتۋىنا بايلانىستى تىعىرىققا تۇسكەن اقش پەن كحدر اراسىنداعى كەلىسسوزدەرگە ىقپال ەتۋى تيىس دەپ حابارلايدى RT.
بۇل - كيم چەن ىننىڭ قىتايعا جاساعان ءتورتىنشى ساپارى. العاش رەت ونىڭ حالىقارالىق ساپارى 2018 جىلدىڭ ناۋرىز ايىندا بولسا, سوڭعى رەت 19 ماۋسىمدا بارعان.