ەلباسى جارلىعىمەن زىريان اۋدانى مەن زىريان قالاسى بۇدان بىلاي التاي اۋدانى ءھام التاي قالاسى دەپ اتالاتىن بولدى. بۇل جاڭالىقتى ءوڭىر جۇرتشىلىعى ىستىق ىقىلاسپەن قۋانا قابىلداپ جاتىر. «شىعىس قازاقستاننىڭ كارتاسىندا التاي اتتى قالانىڭ پايدا بولعانىنا قۋانىشتىمىز. جاڭا اتاۋ اۋدانىمىزعا جاڭا تىنىس, تىڭ سەرپىن بەرىپ, تۋريستەردىڭ اعىلۋىنا, ينۆەستيتسيا تارتۋعا, سايكەسىنشە جاڭا جۇمىس ورىندارىنىڭ اشىلۋىنا سەپتىگىن تيگىزەدى دەپ ويلايمىز. ءبىزدىڭ اۋداننىڭ ءاربىر تۇرعىنى مەن التايلىقپىن دەپ ماقتانىشپەن ايتاتىن بولادى», دەيدى اۋداندىق جاستار رەسۋرستىق ورتالىعىنىڭ جەتەكشىسى ماينا ليسوۆتسوۆا.
زىرياننىڭ التاي اتاۋىن العانىن جاستار عانا ەمەس, قاريالار دا قۋانا قۇپتاپ وتىر. «التاي – تاعىلىمدى تاريحى بار, تامساندىرار تابيعاتى بار عاجاپ ءوڭىر. اۋدانىمىزعا ەجەلدەن كەلە جاتقان وسىنداي تاريحي اتاۋ بەرىلگەنىنە ريزامىز», دەيدى اۋداندىق ارداگەرلەر كەڭەسىنىڭ ءتورايىمى ەللا گەيگەر.
التاي تاۋى باۋرايىنداعى زىرياننىڭ التاي اتانۋىنا وڭىردەگى, ونىڭ ىشىندە وسكەمەندەگى زيالى قاۋىم وكىلدەرىنىڭ ءبىرشاما ۇلەس قوسقانىن ايتپاسقا بولماس. سونداي ازاماتتاردىڭ ءبىرى – قازاقستان جازۋشىلار وداعى وبلىستىق فيليالىنىڭ ديرەكتورى, جازۋشى الىبەك قاڭتارباەۆ. «بەلگىلى عالىم عاريفوللا ەسىمگە «وسكەمەندى التاي دەپ اتايىق, بۇيتپەسەك ەرتەڭ التايدان ايىرىلىپ قالۋىمىز مۇمكىن» دەپ ۇسىنىس ايتقان ەدىم وسىدان ءبىر-ەكى جىل بۇرىن. نە بولسا دا, وبلىستىڭ ءبىر اۋدانى كيەلى اتاۋدى يەلەندى. ءبىز وسىعان قۋانا ءبىلۋىمىز كەرەك. سوڭعى كەزدەرى ءبىز ءوزى قۋانبايتىن بولىپ كەتتىك قوي. ونە بويىمىز تۇنعان قارسىلىق. زىرياننىڭ التاي اتانعانى جاقسىلىقتىڭ شۋاعى كەلە جاتقانىن اڭعارتادى. ەندى بۇل ءۇردىس التايدىڭ اۋىلدارىنىڭ قازاقىلانۋىمەن جالعاسسا قۇبا-قۇپ», دەيدى ول.
بۇرىنعى زىريان, بۇگىنگى التاي – شىعىستاعى وزگە ۇلت وكىلدەرى كوپ قونىستانعان اۋدانداردىڭ ءبىرى. اۋدانداعى 9 اۋىلدىق وكرۋگتىڭ 8-ءى (مالەەۆ, سەۆەرنوە, سرەديگورنىي, چاپاەۆ, پارىگينو, نيكولسك, سولوۆەۆو, پەرۆوروسسيسك) ءالى كۇنگە ورىسشا اتاۋعا يە. بۇعان اتالعان اۋىلدىق وكرۋگتەر ىشىندەگى الەكساندروۆكا, اندرەەۆكا, ەرماكوۆكا, بەدارەۆكا, پۋتينتسەۆو, بوگاتىرەۆو, سنەگيرەۆو, كرەستوۆكا, پرولەتاركا, ورلوۆكا, لەنينسك, بورودينو, پودورلەنوك, وگنيوۆكا, ۆاسيلەۆكا, دورودنيتسا, بىكوۆا, نوۆوكرەستيانكا سەكىلدى اۋىلداردى قوسىپ قويىڭىز. دەگەنمەن دە قازىر التاي اۋدانىندا جەر-سۋ, كوشە اتاۋلارىن اۋىستىرۋ جۇمىستارى بىرتىندەپ جۇرگىزىلىپ جاتىر. 2018 جىلى التاي اۋدانىندا 26 كوشە, ال التاي قالاسىندا 6 كوشەنىڭ اتى اۋىسىپتى. قالاداعى ورتالىق ەكى كوشەگە تاۋەلسىزدىك جانە استانا اتاۋلارى بەرىلىپتى. التاي اۋدانى اكىمىنىڭ ورىنباسارى جاننا اسقارقىزى بۇل باعىتتاعى جۇمىستار بيىل دا جالعاسىن تاباتىنىن, قازىر جالپى ءبىلىم بەرەتىن مەكتەپتەرگە كورنەكتى تۇلعالاردىڭ ەسىمىن بەرۋ ءۇشىن ءتيىستى شارالاردىڭ قولعا الىنىپ جاتقانىن جەتكىزدى.
ءيا, ەندى زىريانعا قاراي زۋلامايمىز, التايعا قاراي الىپ ۇشامىز.
ەندەشە, التايعا كەل, اعايىن!
ازامات قاسىم,
«ەگەمەن قازاقستان»
شىعىس قازاقستان وبلىسى