بوكستان قىزدار اراسىنداعى ۇلتتىق قۇراما مۇشەسى, جاستار اراسىنداعى الەم چەمپيوناتىنىڭ قولا جۇلدەگەرى نازىم يشانوۆا دوپينگ قولدانعانى ءۇشىن ەكى جىلعا جارىستاردان شەتتەتىلدى. بۇل تۋرالى قازاقستاننىڭ دوپينگكە قارسى ۇلتتىق ورتالىعى (KazNADC) حابارلادى.
سپورتشىنىڭ قانىنان تيىم سالىنعان فۋروسەميد پرەپاراتى حالىقارالىق جارىستاردىڭ بىرىنە قاتىسار الدىندا تاپسىرعان تەستىدەن تابىلعان. اتالعان پرەپارات تىكەلەي دوپينگ بولىپ ەسەپتەلمەسە دە, ول دەنەدەن اۋىر زاتتاردى تەزدەتىپ شىعارۋ ءۇشىن قولدانىلادى. سونداي-اق ول سالماقتىڭ وسۋىنە ىقپال ەتەدى.
نازىم يشانوۆانى سپورتتان شەتتەتۋ مەرزىمى 2 جىل. جازا مەرزىمى 2018 جىلدىڭ 26-قاراشاسىنان باستالىپ, 2020 جىلدىڭ 25-قاراشاسىندا اياقتالدى. بۇل دەگەنىڭىز يشانوۆا 2020 جىلعى توكيو وليمپياداسىنا قاتىسا المايدى دەگەن ءسوز.
ايتا كەتەيىك, نازىم يشانوۆا 2013 جانە 2015 جىلى جاستار اراسىنداعى الەم چەمپيوناتىنىڭ قولا جۇلدەسىن يەلەنگەن. سونداي-اق ەل چەمپيوناتىندا بىرنەشە رەت توپ جارعان. بىلتىر ءۇندىستاندا وتكەن الەم چەمپيوناتىندا جەرلەسىمىز 57 كيلو سالماقتا باق سىناپ, 1/16 كەزەڭدە چەرنوگوريالىق بوكسشىدان جەڭىلىپ قالعان بولاتىن.