استانانىڭ 20 جىلدىق مەرەيتويىنا وراي سوفيادا «استانا» كوشەسىنىڭ اشىلۋىنا ارنالعان سالتاناتتى ءىس-شارا ءوتتى, دەپ حابارلايدى قازاقستان رەسپۋبليكاسى سىرتقى ىستەر مينيسترلىگىنىڭ ءباسپاسوز قىزمەتى.
ءىس-شاراعا بولگاريا سىرتقى ىستەر مينيسترلىگىنىڭ وكىلدەرى, «قازاقستانمەن دوستىق ءۇشىن» پارلامەنتتىك توبىنىڭ مۇشەسى - دەپۋتات بوريس يانچەۆ, سوفيا قالاسى مەرىنىڭ ورىنباسارى دونچو باربالوۆ, سوفيا وبلىسىنىڭ مەرى يليان تودوروۆ, قالالىق ماسليحات كەڭەسشىسى سيمەون سلاۆچەۆ, قازاقستان ۇلتتىق فۋتبول قۇراما كومانداسىنىڭ جاتتىقتىرۋشىسى ستانيمير ستويلوۆ, بوكستان الەم چەمپيونى كۋبرات پۋلەۆ, ديپلوماتيالىق كورپۋس, بولگاريانىڭ ىسكەر, عىلىمي, ساراپشلىق توپتارىنىڭ جانە باق-تار جانە قازاق دياسپورانىڭ وكىلدەرى قاتىستى.
ءىس-شارا بارىسىندا قر بولگارياداعى ديپلوماتيالىق ميسسياسىنىڭ باسشىسى تەمىرتاي ءىزباستين استانا قالاسىنىڭ دامۋ تاريحى تۋرالى جان-جاقتى ايتىپ بەردى. ءوز كەزەگىندە, سوفيا قالاسى مەرىنىڭ ورىنباسارى د.باربالوۆ «استانا» كوشەسى سوفيانىڭ ەڭ ادەمى ورىندارىنىڭ بىرىندە ورنالاسقاندىعىن اتاپ ءوتتى.
سالتاناتتى ءىس-شارا اياسىندا بەلگىلى بولگار كومپوزيتورى مەن ءانشىسى ورلين گورانوۆتىڭ ورىنداۋىندا «استانا» اتتى ءانى شىرقالىپ, ءاننىڭ CD ديسكتەرى مەن قر ديپلوماتيالىق ميسسياسى ازىرلەگەن قازاق-بولگار ءتىلاشارلار تاراتىلدى.
اتاپ كەتەرلىك جايت, «استانا» كوشەسى سوفيا ورتالىعىندا «بلگاريا» داڭعىلىنىڭ قاسىندا ورنالاسقان.