قاراعاندى وبلىستىق تاريحي-ولكەتانۋ مۇراجايىندا ۇلىتاۋ اۋدانىنداعى «بولعان انا» مازارىنان تابىلعان كونە جادىگەرلەر تانىستىرىلدى.
مامانداردىڭ بولجامى بويىنشا, قۇندى جادىگەرلەر ءحىىى عاسىردا سالتانات قۇرعان التىن وردا داۋىرىنە تيەسىلى بولۋى مۇمكىن. دەسە دە, مۇنىڭ انىق-قانىعىن ءبىلۋ ماقساتىندا ارتەفاكت ماتەريالدار اقش جانە جاپونيانىڭ عىلىمي ورتالىقتارىنا زەرتحانالىق ساراپتامادان وتكىزىلۋگە جىبەرىلگەن. ونىڭ قورىتىندىسى جىلدىڭ سوڭىنا تامان بەلگىلى بولادى.
– قازان ايىندا جۇرگىزىلگەن قازبا جۇمىستارى كەزىندە 2 مەتر 35 سانتيمەتر تەرەڭدىكتەن ايەل ادامنىڭ سۇيەكتەرى شىقتى. وكىنىشكە قاراي, تاس تابىت ۋاقىت وتە كەلە قيراپ قالعان. قابىر ىشىنەن التىنعا ۇقساس سارى مەتالدان جاسالعان توستاعان, سىرعا مەن شاشقا ارنالعان تۇيرەۋىش سياقتى اشەكەي بۇيىمدارى, سونداي-اق, توزعان ماتانىڭ قالدىقتارى – التىن جىپتەرى بار جىبەك جانە بىلعارى ەتىك تابىلدى, – دەدى ارحەولوگ, «حالىك كازىناسى» عىلىمي-زەرتتەۋ ينستيتۋتىنىڭ قىزمەتكەرى ايبار قاسەنالين.
التىننان جاسالعان دەپ توپشىلانعان توستاعاننىڭ تۇبىندە قىزعالداق پىشىنىندە بەدەرلەنگەن ورنەك بار. مامانداردىڭ بولجاۋىنشا, قابىردە اسىل تۇقىمدى اۋلەتتەن شىققان ايەل جەرلەنگەن, ال تابىلعان جادىگەرلەر مەن بۇيىمداردىڭ تۇرلەرى يسلامعا دەيىنگى كەزەڭگە جاتۋى ابدەن مۇمكىن.
– جوبا ماقساتى – ورتاعاسىرلىق مازاردى انتروپولوگيالىق تۇرعىدان زەرتتەپ, جەرلەۋدىڭ قاي كەزەڭدە ىسكە اسىرىلعانىن جانە جەرلەنگەن ايەلدىڭ دارەجەسى قانداي ەكەنىن انىقتاۋ. ءبىز تابىلعان باس سۇيەك بويىنشا بەتتىڭ ءپىشىنىن قالىپقا كەلتىرۋدى جوسپارلاپ وتىرمىز, – دەپ مالىمدەدى تاريحي-مادەني مۇرانى ساقتاۋ جونىندەگى ورتالىقتىڭ ديرەكتورى تۇلكىباي تولەۋوۆ.
ورتاعاسىرلىق ساۋلەت ونەرىنىڭ ەسكەرتكىشى سانالاتىن «بولعان انا» كەسەنەسى ۇلىتاۋدان وڭتۇستىك-شىعىسقا قاراي 60 شاقىرىم جەردە, سارىسۋ مەن قاراكەڭگىر وزەندەرىنىڭ قۇيىلىسىندا ورنالاسقان.
قايرات ءابىلدا,
«ەگەمەن قازاقستان»
قاراعاندى