ەلىمىزگە بەلگىلى سپورت ءجۋرناليسى, «ەگەمەن قازاقستان» گازەتىنىڭ ارداگەرى, جازۋشى-جۋرناليست وڭداسىن ەلۋبايدىڭ «دۇنيەنى دۇبىرلەتكەن جەتى دودا» اتتى جيناعى جارىق كوردى. بۇل كىتاپ «قازاق سپورتى» گازەتىنىڭ 60 جىلدىعىنا ارنالعان.
وڭداسىن ەلۋبايدىڭ بۇل ەڭبەگىندە جەتى وليمپيا ويىندارىنا قاتىسىپ, كوزبەن كورىپ, ساناسىنا تۇيگەن جايتتارى قاعاز بەتىنە تۇسكەن. قولىمىزعا تيگەن «دۇنيەنى دۇبىرلەتكەن جەتى دودا» كىتابىن پاراقتاي وتىرىپ, قازاق سپورتىنىڭ ەلىمىز تاۋەلسىزدىك العان جىلدارىندا قول جەتكىزگەن تابىستارىنا, كەيىنگى تولقىن جاس ۇرپاققا ۇلگى-ونەگە بولاتىن, ولاردىڭ بويىندا وتانسۇيگىشتىك قاسيەتتەردى, پاتريوتتىق سەزىمدەردى قالىپتاستىرۋعا ارنالعان شىعارما ەكەنىنە كوز جەتكىزدىك.
اۆتور قازاق ەلى ساڭلاقتارىنىڭ سوڭعى جەتى وليمپيادادا قول جەتكىزگەن تابىستارى مەن كەمشىلىكتەرى تۋرالى وي بولىسەدى جانە ءوزى تۇسىرگەن سۋرەتتەرىن ۇسىنادى. بۇل جيناق اسىرەسە سپورتتى جانىنا سەرىك ەتكەن جەتكىنشەكتەرگە, ستۋدەنت جاستارعا, سپورت جانكۇيەرلەرىنە پايدالى. 368 بەتتەن, 500-دەن اسا سۋرەتتەن تۇراتىن كىتاپتىڭ ءتىلى جاتىق, وقۋعا جەڭىل.
كىتاپتا اۆتور تەك سپورت تۋرالى عانا ەمەس, ءوزى بارعان جەتى مەملەكەتتىڭ, ياعني اۋستراليا, ۇلىبريتانيا, قىتاي, يتاليا, رەسەي جانە وڭتۇستىك كورەيا مەملەكەتتەرىنىڭ تاريحىن, ەكونوميكاسى مەن مادەنيەتىن, تاريحي جەتىستىكتەرىن جازىپ, وقىرمانمەن وي ءبولىسۋدى دە ۇمىتپاعان.
ءالي بيتورە,
«ەگەمەن قازاقستان»