قازاقستان رەسپۋبليكاسىنىڭ مەملەكەتتىك حاتشىسى گۇلشارا ابدىقالىقوۆا «قازاقستاننىڭ وتباسىلىق جانە گەندەرلىك ساياساتى: جەتىستىكتەر مەن پەرسپەكتيۆالار» اتتى حالىقارالىق كونفەرەنتسياعا قاتىستى.
ءىس-شاراعا قازاقستان رەسپۋبليكاسى پرەزيدەنتىنىڭ جانىنداعى ايەلدەر ىستەرى جانە وتباسىلىق-دەموگرافيالىق ساياسات جونىندەگى ۇلتتىق كوميسسيانىڭ مۇشەلەرى, پارلامەنت دەپۋتاتتارى, مەملەكەتتىك ورگانداردىڭ باسشىلارى, ديپلوماتيالىق كورپۋس, حالىقارالىق ۇيىمدار, بيزنەس قۇرىلىمدارى, ازاماتتىق قوعام وكىلدەرى كەلدى.
وتىرىستى اشقان مەملەكەتتىك حاتشى ەلباسى نۇرسۇلتان نازارباەۆتىڭ ەگەمەندىكتى ورناتۋ جانە ونى نىعايتۋ ىسىندە قازاقستان ايەلدەرىنىڭ زور ءرول اتقارعانى جونىندە ايتقان سوزىنە توقتالدى.
– انا مەن بالانى قورعاۋ, ايەلدەردىڭ قۇقىعى مەن مۇمكىندىكتەرىن كەڭەيتۋ ماسەلەلەرى – مەملەكەتتىك ساياساتتىڭ ماڭىزدى باسىمدىقتارىنىڭ ءبىرى. قازاقستاننىڭ وتباسىلىق-گەندەرلىك ساياسات سالاسىنداعى جەتىستىكتەرىنە مەملەكەتتىك ورگانداردىڭ, ازاماتتىق قوعام مەن بيزنەس قوعامداستىقتىڭ ءوزارا ءتيىمدى ءىس-ارەكەتى ناتيجەسىندە قول جەتكىزىلدى, – دەدى گ.ابدىقالىقوۆا.
ۇلتتىق كوميسسيانىڭ 20 جىلداعى قىزمەتى بارىسىندا گەندەرلىك تەڭدىك ستراتەگياسى جۇزەگە اسىرىلدى. گەندەرلىك باعىتتاعى «ەرلەر مەن ايەلدەردىڭ تەڭ قۇقىقتارىنىڭ جانە تەڭ مۇمكىندىكتەرىنىڭ مەملەكەتتىك كەپىلدىكتەرى تۋرالى», «تۇرمىستىق زورلىق-زومبىلىق پروفيلاكتيكاسى تۋرالى» زاڭدار قابىلداندى. قازاقستان رەسپۋبليكاسىنداعى 2030 جىلعا دەيىنگى وتباسىلىق جانە گەندەرلىك ساياسات تۇجىرىمداماسى ىسكە اسىرىلۋدا. بارلىق مەملەكەتتىك ورگاندا گەندەرلىك ساياساتتى ىسكە اسىرۋعا جاۋاپتى تۇلعالار بەلگىلەندى.
بۇگىندە دەپۋتاتتاردىڭ جالپى سانىنىڭ 22 پايىزى نەمەسە 34-ءى – ايەل, مەملەكەتتىك قىزمەتتە 55 پايىزعا جۋىق, ساياسي مەملەكەتتىك قىزمەتشىلەر اراسىندا 10 پايىزدان استام ايەل ەڭبەك ەتەدى. شاعىن جانە ورتا بيزنەستە 500 مىڭنان اسا كومپانيانى ايەلدەر باسقارادى.
– قازاقستاننىڭ ايەلدەر قوعامداستىعى الدىندا تۇرعان باستى مىندەتتەر: «قازاقستان-2050» ستراتەگياسىن ىسكە اسىرۋ, 2030 جىلعا دەيىنگى ورنىقتى دامۋ ماقساتتارىنا قول جەتكىزۋ, 2030 جىلعا دەيىنگى وتباسىلىق جانە گەندەرلىك ساياسات تۇجىرىمداماسى ينديكاتورلارىنىڭ ورىندالۋىنا بەلسەنە اتسالىسۋ, – دەدى مەملەكەتتىك حاتشى.
سوڭىندا قازاقستان رەسپۋبليكاسىنىڭ مەملەكەتتىك حاتشىسى گۇلشارا ابدىقالىقوۆا كونفەرەنتسيادا ايتىلعان جاڭا يدەيالار, ويلار مەن ۇسىنىستار ۇلتتىق كوميسسيانىڭ ودان ءارى جۇمىسىندا قولدانىلاتىنىن اتاپ كورسەتتى.
مارجان تىلەۋبەك,
«ەگەمەن قازاقستان»