ءى.وماروۆ اتىنداعى وبلىستىق قازاق دراما تەاترى ء«انىم سەن ەدىڭ» اتتى سپەكتالدى كورەرمەندەرىنە ۇسىندى. يسرايل ساپاربايدىڭ پەساسىنىڭ نەگىزىندە ساحناعا ىڭعايلاعان قويىلىم رەجيسسەر ءاليا اكىمقىزىنىڭ توسىن فورما, ءتۇر تابۋى مەن اكتەرلەر شەبەرلىگىنىڭ جەتىستىگى دەسە بولادى.
زال قويىلىمدى ءبىر دەممەن كورىپ شىقتى. قازاق ءان الەمىندە ءبىر ءوزى ءبىر ءداۋىر بولعان ءشامشى قالداياقوۆتىڭ اندەرىن بىلمەيتىن قازاق جوق. ءتىپتى وزگە ۇلت وكىلدەرىنىڭ دە سۇيىكتى انىنە اينالدى. بىراق ءانىن ايتقاندار ءشامشىنىڭ ءومىرى مەن ىشكى جان دۇنيەسىندەگى بولىپ جاتاتىن الاپات دۇنيەنى, ونىڭ نازىك جۇرەك ءلۇپىلىن, ومىردە قىزعانشاقتار مەن توڭمويىنداردىڭ اياعىنان شالعان پەندەشىلىكتەرىن بىلە بەرمەس.
تسىگان توبىرىنا ەرىپ كەتەتىن ءشامشى وتانى, بەلگىلى تۇراعى جوق بولسا دا ءوز ۇلتىنىڭ ءداستۇرى مەن سالتىن اسىلداي ساقتاپ جۇرگەن تسىگان ۇلتىنا ريزا بولادى. ۇلتتىڭ قۇندىلىقتارى ساقتالعان جەردە ءشامشى كاۋسار بۇلاقتىڭ تازالىعىن سەزىنەدى. كەرەمەت ءان تۋادى. ءشامشى ومىردەگى پەندەشىلىكتەردىڭ كەرگەن جىبىنەن جىعىلىپ-تۇرىپ جۇرگەندە, ەلدى ونىڭ اندەرى الديلەپ, اسپانىندا ونىڭ ءانى شارىقتاپ تۇردى. سپەكتاكلدىڭ سوڭىندا ساحناداعى حور ءشامشىنىڭ «مەنىڭ قازاقستانىم!» ءانىن الىستان باياۋ, الىستان ەستىلىپ تۇرعانداي, ۋىلدەپ ايتۋىمەن اياقتالادى. دەمەك, ءشامشىنىڭ ءانى تاۋەلسىز ەلمەن بىرگە الداعى عاسىرلارعا دا ماڭگىلىككە كەتە بەرەدى.
سپرەكتاكلدە اتاقتى كومپوزيتوردىڭ بەينەسىن اكتەر ءالىمحان مىرزاحان ءساتتى سومداپ شىقتى.
ء«شامشىنىنىڭ بەينەسىن الىپ شىعۋ وڭاي بولمادى. سەبەبى ءشامشىنى بىلمەيتىن قازاق, بىلمەيتىن قازاقستاندىق جوق دەۋگە بولادى. كورەرمەننىڭ كوز الدىنداعى جاتتاندى ونىڭ بەينەسىن بەرۋمەن قالىپ قويماي, قالاي تۇلعالاندىرۋعا بولادى؟» دەگەن سۇراق كوز ىلدىرمەدى. مەن دە, رەجيسسەر دە بۇل قويىلىمدا ءشامشىنى تەك كومپوزيتور عانا ەمەس, ءوزى ءومىر سۇرگەن قوعامداعى كورىنىستەردى مەملەكەتتىك بيىك تۇرعىدان ويلاي بىلەتىن سۇڭعىلا رەتىندە الىپ شىعۋدى ويلادىق. ىزدەنىسىمىز, ەڭبەگىمىز ماڭداي تەردى اقتادى-اۋ دەپ ويلايمىن. ءشامشىنىڭ تەرەڭ ادام بولعانىنا ونىڭ زامانداستارى قالدىرعان ەستەلىكتەر كۋا» دەدى اكتەر الەمحان مىرزاحان.
سپەكتاكلدە يزولدانى بەينەلەگەن ديانا تۇرسىنوۆانىڭ, ساعىنىشتى ويناعان قىمبات اۋەزحاننىڭ, ءشامشىنىڭ اانسىن بەينەلەگەن اقدامە دوسانوۆا مەن شارا ءمۇسىلوۆانىڭ, باروندى سومداعان قونىسبەك بەگايداروۆتىڭ, ابزالدى ويناعان ايبول شاكىرجانوۆتىڭ ونەرىنە كورەرمەن ريزاشىلىقپەن قول سوقتى.
ايتپاقشى, قويىلىمدا كورەرمەن وسى تەاتردا العاش رەت حور تىڭداۋعا مۇمكىندىك العانداي بولدى. ونى قوستاناي مەملەكەتتىك پەداگوگيكالىق ۋنيۆەرسيتەتىنىڭ پروفەسسورى سالتانات جاقاەۆا قويدى.
ءنازيرا جارىمبەت,
«ەگەمەن قازاقستان»
قوستاناي