تارباعاتاي اۋدانىنىڭ اكىمى دىلدابەك ورازباەۆ سەمەي قالاسىنىڭ ستۋدەنت جاستارىمەن كەزدەستى. سەمەي مەديتسينا ۋنيۆەرسيتەتىندە وتكەن كەزدەسۋگە شاھارداعى ۋنيۆەرسيتەتتەر مەن كوللەدج باسشىلارى, زيالى قاۋىم وكىلدەرى, جوعارى وقۋ ورىندارى مەن كوللەدجدەرىنىڭ ستۋدەنتتەرى قاتىستى. ءىس-شارانىڭ اياسىندا ۇيىمداستىرىلعان جارمەڭكەدە تارباعاتاي اۋدانى اكىمدىگىنىڭ وكىلدەرى ءبىلىم بەرۋ, دەنساۋلىق ساقتاۋ, اۋىل شارۋاشىلىعى جانە تاعى باسقا سالالارداعى بوس جۇمىس ورىندارىن ۇسىندى. بۇل تۋرالى وقۋ ورنىنىڭ فەيسبۋكتەگى پاراقشاسى حابارلادى.
جيىندى اشقان سەمەي مەديتسينا ۋنيۆەرسيتەتىنىڭ رەكتورى ەرسىن ءجۇنىسوۆ تارباعاتاي اۋدانىنىڭ اكىمىن قۇرمەت گراموتاسىمەن ماراپاتتادى.
دىلدابەك ورازباەۆ ءوز كەزەگىندە اۋداننىڭ قازىرگى جاعدايى, دامۋ باعىتتارى, مەملەكەتتىك باعدارلامالاردىڭ جۇزەگە اسىرىلۋى جونىندە بايانداما جاساپ, اۋدان ارداگەرلەرىن «تارباعاتاي اۋدانىنىڭ قۇرمەتتى ازاماتى» اتاعىمەن ماراپاتتادى. وقۋدا وزدەرىن ۇزدىك كورسەتكەن ستۋدەنتتەرگە سىيلىقتار مەن العىس حاتتار تابىستالدى.
كەزدەسۋ بارىسىندا «نۇر وتان» پارتياسى سەمەي قالالىق فيليالىنىڭ ۇيىمداستىرۋ ءبولىمىنىڭ مەڭگەرۋشىسى ايدوس تولەۋقانوۆ ءسوز سويلەپ, وسىنداي شارالاردىڭ وقۋىن ءتامامداۋشى جاستارعا دا, جاس كادرلاردى قاجەت ەتەتىن اۋداندار ءۇشىن دە پايداسى مول ەكەنىن اتاپ ءوتتى. كەزدەسۋدە تارباعاتاي ءوڭىرىنىڭ تۋمالارى - سەمەي مەديتسينا ۋنيۆەرسيتەتىندە ۇزاق جىلدار قىزمەت اتقارعان ارداگەر جەڭىسبەك بازاربەك ۇلى جانە تەراپيا ماماندىعى بويىنشا ينتەرن جانەركە جۇماعاليەۆا ءسوز سويلەدى. جۇزدەسۋ ۋنيۆەرسيتەتتىڭ ونەرلى ستۋدەنتتەردىڭ كونتسەرتىمەن اياقتالدى.
«قازىرگى تاڭدا سەمەي مەديتسينا ۋنيۆەرسيتەتى تارباعاي اۋدانى اكىمدىگىمەن بىرقاتار باعىتتار بويىنشا ارىپتەستىك قاتىناستاردى دامىتۋدا. ۋنيۆەرسيتەتتىڭ بىلىكتى ماماندارى مەن پروفەسسورلارىنان قۇرالعان مۋلتيديستسيپلينارلىق توپ تارباعاتاي اۋدانىندا بولىپ, اۋدان تۇرعىندارىن قابىلداعان بولاتىن. اۋدان دارىگەرلەرىنىڭ بىلىكتىلىگىن كوتەرۋ ماقساتىندا سەمينار جۇرگىزىلدى. سونىمەن بىرگە, سەمەي مەديتسينا ۋنيۆەرسيتەتى ازىرلەگەن SMU-كونسۋلتانت جوباسىنىڭ پيلوتتى اۋدانى رەتىندە تارباعاتاي اۋداندىق اۋرۋحاناسى تاعايىندالعان بولاتىن. كەزدەسۋ بارىسىندا ۋنيۆەرسيتەت رەكتورى ەرسىن تۇرسىنحان ۇلى كەلەر جىلى تارباعاتاي اۋدانىندا عىلىمي-پراكتيكالىق كونفەرەنتسيانى وتكىزۋ جونىندە ۇسىنىس تاستادى. اتالعان باستاماعا اۋدان اكىمى دىلدابەك ءتاجىباي ۇلى قولداۋ ءبىلدىردى», - دەپ جازادى ۋنيۆەرسيتەتتىڭ فەيسبۋكتەگى پاراقشاسى.
ازامات قاسىم,
«ەگەمەن قازاقستان»
سەمەي