ەقىۇ مۇشە-ەلدەردىڭ سىرتقى ىستەر مينيسترلەرى كەڭەسىنىڭ (سىمك) ميلانداعى كەزدەسۋى اياسىندا «ەقىۇ كەڭىستىگىندە ەكونوميكالىق ءوزارا بايلانىستىلىقتى ىلگەرىلەتۋ» اتتى تاقىرىپتىق وتىرىس ءوتتى. ەقىۇ ەكونوميكالىق جانە ەكولوگيالىق كوميتەتىنىڭ توراعاسى بولىپ تابىلاتىن قازاقستان ۇيىم حاتشىلىعىنىڭ ەكونوميكالىق جانە ەكولوگيالىق قىزمەت ۇيلەستىرۋشىسىنىڭ كەڭسەسىمەن بىرلەسىپ اتالعان ءىس-شارانى ۇيىمداستىردى, دەپ حابارلايدى ءسىم ءباسپاسوز قىزمەتى.
ء«وزارا بايلانىستىلىق كولىكتىك بايلانىستار, ەكونوميكالىق جانە ەنەرگەتيكالىق جەلىلەر, ساندىق جانە ادامدىق ءوزارا ارەكەتتەردەن تۇراتىن كوپتەگەن ولشەمدەرگە يە. ول قولدانىستاعى بايلانىستاردىڭ تيىمدىلىگىن كۇشەيتە جانە جاڭا بايلانىستاردى قۇرا الادى. ەقىۇ ءوزارا بايلانىستى ىلگەرىلەتۋدە ماڭىزدى ءرول اتقارا الار ەدى», - دەدى ءوز سوزىندە قازاقستاننىڭ سىرتقى ىستەر ءمينيسترى قايرات ءابدىراحمانوۆ.
قازاقستان ۆانكۋۆەردەن ۆلاديۆوستوكقا دەيىنگى كەڭىستىكتە سوزىلعان قاۋىپسىزدىك قوعامداستىعى تۋرالى 2010 جىلعى استانا دەكلاراتسياسىن ەنگىزۋدى جۇزەگە اسىرۋ ءۇشىن وسى باعىتتا ۇلكەن سەرپىن بەرۋ ماڭىزدى دەپ ەسەپتەيدى. سونداي-اق, مينيستر 1994 جىلى پرەزيدەنت نۇرسۇلتان نازارباەۆ ۇسىنعان ەۋرازيالىق ىقپالداستىق يدەياسى ەۋرازيالىق ەكونوميكالىق وداققا ءساتتى ەنگىزىلگەندىگىن ەسكە سالدى. بۇگىنگى كۇنى ەۋرازياداعى ءتۇرلى ينتەگراتسيالىق جوبالار اراسىنداعى ءوزارا ارەكەتتەستىكتى قامتاماسىز ەتۋ ماسەلەسى وزەكتى.
ءوزارا بايلانىستىلىق تۇرعىسىندا قازاقستان ەقىۇ-نىڭ استاناداعى قاتىسۋىن ودان ءارى باعدارلاما كەڭسەسىنەن تاقىرىپتىق ورتالىعىنا ترانسفورماتسيالاۋ بويىنشا ءوز كوزقاراسىن ۇسىندى. مينيستر دالالىق ميسسيانىڭ ەۆوليۋتسياسى ارقاشان ەلدىڭ دامۋىمەن قاتار ءجۇرىپ جاتقاندىعىن جانە «قازاقستاننىڭ ەكونوميكالىق جانە ساياسي دامۋداعى قازىرگى جەتىستىكتەرى جاڭا تاسىلدەردى قاجەت ەتەتىنىن» مالىمدەدى.
«جاڭا قۇرىلىم تاجىريبە, اناليتيكالىق جانە زەرتتەۋ جۇمىستارىمەن الماسۋعا جاردەمدەسۋ ارقىلى تۇراقتى ءوزارا بايلانىستىلىق پەن «جاسىل» ەكونوميكاعا كوشۋ ماسەلەلەرىنە باعىتتالۋى كەرەك. مىسالى ءتيىستى باسقارۋ, جاسىل ەكونوميكانى دامىتۋ, اپاتتاردىڭ الدىن الۋ, ەنەرگەتيكالىق قاۋىپسىزدىكتى قامتاماسىز ەتۋ, ەقىۇ كەڭىستىگىندە ساۋدا مەن كولىك سالالارىن ىلگەرىلەتۋ سالاسىنداعى جوبالاردى جۇزەگە اسىرۋ مۇمكىن», - دەپ اتاپ وتىلگەن حابارلامادا.
قازاقستان ەقىۇ-نىڭ استاناداعى جاڭا بۋىنى ەقىۇ, اوسشك, شىۇ, اسەان جانە باسقا دا ۇيىمدار اراسىنداعى ءوزارا ءتيىمدى سەرىكتەستىك ءۇشىن جاڭا مۇمكىندىكتەر اشادى دەپ ەسەپتەيدى.
ەقىۇ-داعى يتالياندىق توراعالىقتىڭ وكىلى, يتاليانىڭ سىرتقى ىستەر ءمينيسترىنىڭ ورىنباسارى گيلەرمو پيككي ەقىۇ كەڭىستىگىندەگى قاقتىعىس الەۋەتىنىڭ ارتۋى جاعدايىندا ەكونوميكالىق جانە ەكولوگيالىق ولشەمنىڭ ءرولىن اتاپ ءوتتى.
بەلارۋس رەسپۋبليكاسىنىڭ سىرتقى ىستەر ءمينيسترى ۆلاديمير ماكەي ەقىۇ-نىڭ ەكونوميكالىق ءوزارا بايلانىستىلىق پلاتفورماسى رەتىندەگى ءرولىن اتاپ ءوتتى.
ءازىربايجان سىرتقى ىستەر ءمينيسترى ەلمار مامەدياروۆ كولىك دالىزدەرىن جانە ەقىۇ اياسىندا ءتيىستى باسقارۋدى دامىتۋعا شاقىردى.
بيرمينگەم ۋنيۆەرسيتەتىنىڭ پروفەسسورى ستەفان ۆولف ەقىۇ-داعى ەكونوميكالىق ديپلوماتيانىڭ ۇلكەن الەۋەتىن اتاپ ءوتتى.
ءىس-شارا دامۋ جانە قاۋىپسىزدىك ماسەلەلەرى اراسىنداعى اجىراماس بايلانىس قاعيداتى نەگىزىندە قازاقستان قولداۋ كورسەتەتىن ەقىۇ-نىڭ ەكونوميكالىق جانە ەكولوگيالىق ولشەمىنىڭ الەۋەتىن تاعى ءبىر رەت كورسەتۋگە مۇمكىندىك بەردى.